ހަނގުރާމަ ހުއްޓައިލުމަށް ގޮވައިލައި އިސްރާއީލުގެ އެތައް ހާސް ބަޔަކު މުޒާހަރާ ކުރަން ފަށައިފިއެވެ.
ހަނގުރާމަ ހުއްޓައިލުމުގެ އެއްބަސްވުމަށް ދިއުމަށް ގޮވައިލައި އިސްރާއީލުގެ ލޭބާ ޕާޓީ އިސްވެ އޮވެ، މުޒާހަރާ ފެށީ އިސްރާއީލުގެ ހަ އަސީރުން މަރުވެފައިވާ ތިއްބައި ޣައްޒާއިން ފެނުމާ ގުޅިގެންނެވެ.
މިއީ މީގެ ގާތްގަނޑަކަށް 11 މަސް ކުރިން ޣައްޒާ ހަނގުރާމަ ފެށި ފަހުން އިސްރާއީލުގައި ސަރުކާރާ ދެކޮޅަށްކުރާ އެންމެ ބޮޑު އެއް މުޒާހަރާއެވެ. މުޒާހަރާގެ ބައިވެރިންނާއި ސަލާމަތީ ބާރުތަކާ ދެމެދު އިއްޔެ ރޭ ކުރިމަތިލުންތަކެއް ހިނގާފައިވާ ކަމަށްވެސް ބޭރުގެ މީޑިއާތަކުން ރިޕޯޓްކޮށްފައިވެއެވެ.
އިސްރާއީލުގެ ވެރިރަށް ތެލް އަވީވްގެ މަގުތައް ބަންދުކޮށް، ހުޅަނގު ގުދުސްގައި ހުންނަ އެ ގައުމުގެ ބޮޑު ވަޒީރު ބެންޖަމިން ނަތަންޔާހޫގެ އޮފީސް ބޭރުގައި އިސްރާއީލުގެ ގިނަ ބަޔަކު ވަނީ މުޒާހަރާކޮށްފައެވެ.
ޣައްޒާގައި ބަންދުކޮށްފައިވާ އަސީރުންގެ އާއިލާތައް ތަމްސީލުކުރާ ހޮސްޓޭޖްސް އެންޑް މިސިން ފެމިލީސް ފޯރަމް އިން ނެރުނު ބަޔާނެއްގައި ބުނީ އެ ހަ އަސީރުން މަރުވުމަކީ ހަނގުރާމަ ހުއްޓާލުމަށް ނަތަންޔާހޫ އެއްބަސްނުވުމުން ލިބުނު ނަތީޖާ ކަމަށެވެ.
މީގެ އިތުރުން އޮކްޓޯބަރު ހަތް ވަނަ ދުވަހަށް ފަހު ފުރަތަމަ ފަހަރަށް އިސްރާއީލުގެ އެންމެ ބޮޑު ޓްރޭޑްސް ޔޫނިއަން ފެޑެރޭޝަން، ހިސްޓަޑްރޫޓުން ވަނީ ހަނގުރާމަ ހުއްޓާލުމުގެ އެއްބަސްވުމެއްގައި ސޮއިކުރުމަށް ސަރުކާރަށް ޕްރެޝަރު ކުރުމަށް އާންމު ހަޅުތާލަކަށް ގޮވައިލާފައެވެ.
އެ ޔޫނިއަނުން ބުނީ އިސްރާއީލުގެ މައި އެއާ ޓްރާންސްޕޯޓް ހަބް، ބެން ގުރިއަން އެއާޕޯޓް ހޯމަ ދުވަހުގެ ހެނދުނު 08:00 އިން ފެށިގެން ބަންދުކުރާނެ ކަމަށާއި އެމީހުންގެ އަމާޒަކީ ބޭންކިން އާއި ސިއްޚީ ޚިދުމަތް ހިމެނޭހެން އިސްރާއީލުގެ އިގްތިސާދުގެ ބޮޑެތި ދާއިރާތައް ބަންދުކުރުން ނުވަތަ އެތަން ތަނުން ދޭ ޚިދުމަތްތަކަށް ބުރޫއެރުވުން ކަމަށެވެ.
އިސްރާއީލުގެ އިގްތިސާދީ މަރުކަޒު ތެލް އަވީވްގެ މުނިސިޕަލް ޚިދުމަތްތައް ވެސް ހޯމަ ދުވަހު ބަންދުކުރާނެއެވެ.
"އެހެން ހުރިހާ ކަމަކަށް ވުރެ އެއްބަސްވުމެއް މުހިންމު،" ހިސްޓަޑްރޫޓްގެ ވެރިޔާ އާނަން ބާ-ޑޭވިޑް ވިދާޅުވިއެވެ.
ޑޭވިޑް ވިދާޅުވި ގޮތުގައި މުޒާހަރާ ކުރުމުގައި އެމީހުންނަށް ތާއީދު ކުރަނީ އިސްރާއީލުގެ މައިގަނޑު އުފެއްދުންތެރިންނާއި ހައިޓެކް ދާއިރާގައި ވިޔަފާރިވެރިންނެވެ.
އޭގެއިތުރުން މެންފެކްޗާ އެސޯސިއޭޝަން އޮފް އިސްރާއީލާއި، އިސްރާއީލުގެ އިދިކޮޅު ލީޑަރު އަދި ކުރީގެ ބޮޑު ވަޒީރު ޔައިރް ލެޕިޑް ވަނީ އެ މުޒާހަރާއަށް ތާއީދު ކުރައްވާނެ ކަމަށް ވިދާޅުވެފައެވެ.
ނަމަވެސް އިސްރާއީލުން އަންނަނީ އެ މުޒާހަރާ ހުއްޓުވުމަށް ކޯޓު އަމުރެއް ހޯދުމުގެ މަސައްކަތްކުރަމުންނެވެ.
އިސްރާއީލާއި ޣައްޒާގެ ވެރިކަން ކުރާ ހަމާސް ޖަމާއަތާ ދެމެދު ހަނގުރާމަ ހުއްޓާލުމުގެ މަޝްވަރާތައް ކުރާތާ މަސްތަކެއް ވެފައިވާއިރު، އެއްބަސްވުމަކަށް އަދިވެސް އާދެވިފައި ނުވާތީ، އިސްރާއީލުގެ ގިނަ ބަޔަކު އަންނަނީ ނަތަންޔާހޫއަށް ފާޑުކިޔަމުންނެވެ.
މިދިޔަ އަހަރު އޮކްޓޫބަރު ހަތްވަނަ ދުވަހުން ފެށިގެން އިސްރާއީލު ފައުޖުތަކުން ޣައްޒާގައި ހިންގަމުންދާ ލޭއޮހޮރުންވުންތަކުގައި މިހާތަނަށް 40،738 މީހުން ވަނީ ޝަހީދުކޮށްލައިފައެވެ. ހަމަލާތަކުގައި ޒަޚަމްވި މީހުންގެ އަދަދު ވަނީ 94،154 އަށް އުފުލިފައެވެ.