މި މަހުގެ ސެޕްޓެމްބަރު މަހު ރިލީޒް ކުރާނެކަން އިއުލާނުކޮށްފައިވާ ބަތަލާ ކަންގަނާ ރަނައުތުގެ ފިލްމު "އިމަޖެންސީ" ރިލީޒްކުރުން އަނެއްކާ ވެސް ފަސްކޮށްފިއެވެ.
ކުރިން ތާވަލުކުރެވިފައިވާ ތާރީޚަށް ފިލްމު ސިނަމާތަކުގައި ދެއްކުމުގައި ގިނަ ހުރަސްތަކެއް ކުރިމަތިވެފައިވީ ނަމަވެސް މި ހަފުތާ ތެރޭގައި ފިލްމު ސިނަމާތަކަށް ގެންނާނެ ތާރީޚެއް އަލުން އިއުލާނުކުރާނެ ކަމަށް ފިލްމީ ޚަބަރުތައް ބުނެއެވެ.
މި ފިލްމުގައި އިންޑިއާގެ ބައެއް ކޮމިއުނިޓީތަކަށް ކުޑައިމީސްވާގޮތަށް މަންޒަރުތައް ހިމަނާފައިވާތީ އެކި ޖަމާޢަތްތަކުން ވަނީ ކަންގަނާގެ ޓީމު ކޯޓަށް ހާޒިރުކުރުމަށް ވެސް ގޮވާލާފައެވެ. މީގެއިތުރުން ސެންސަރު ބޯޑުން ފިލްމުގެ ބައެއް މަންޒަރުތަކާ ޑައިލޮގްތައް ކަނޑާލުމަށް ވެސް ގިނަބަޔަކު އަންނަނީ ގޮވާލަމުންނެވެ.
ފިލްމީތަރި މަހިމާ 'އިމަޖެންސީ'ގައި ފެންނާނެގޮތުގެ ޕޯސްޓަރެއް--ފޮޓޯ/ޓެލެގްރާފްއިންޑިއާ
ކަންގަނާ އަމިއްލައަށް ޑައިރެކްޓްކޮށް ލީޑް ރޯލް ކުޅޭ ފިލްމު "އިމަޖެންސީ"އަށް އެކި ފަރާތްތަކުން ފިއްތުންތައް ކުރިމަތިކުރަމުންދާތީ ބަތަލާ ވަނީ ސޯޝަލް މީޑިއާގައި ވެސް އެފަދަ މީހުންނަށް ބަހުގެ ހަމަލާތައް ރައްދުކޮށްފައެވެ.
އިންޑިއާގެ ޤާނޫނު ހަދާ މަޖިލީހުގެ މެމްބަރެއްގެ ގޮތުގައި މަސައްކަތް ކުރަމުން އަންނަ ބަތަލާ ވަނީ ފިލްމު އިންޑަސްޓްރީގެ އެއްވެސް ބަޔަކު އެކަމާ ކަންބޮޑުނުވާތީ އެކަމާ ވެސް ފާޑުކިޔާފައެވެ.
އިންޑިއާގެ ކުރީގެ ބޮޑުވަޒީރު އިންދިރާ ގާންދީގެ ވެރިކަމުގައި އިއުލާނުކުރި ކުއްލި ހާލަތުގެ ދުވަސްވަރަށް ބިނާކޮށް އުފައްދާފައިވާ މި ފިލްމުގައި ބަތަލާ ކުޅެނީ ބޮޑުވަޒީރު އިންދިރާ ގާންދީގެ ރޯލެވެ. ކަންގަނާގެ އިތުރުން ފިލްމުން ފެންނާނެ މުހިއްމު ތަރިންގެ ތެރޭ އަނޫޕަމް ހޭރު، ޝްރެޔާސް ތަލްޕަޅޭ، މިލިންދު ސޯނަމް އަދި ބަތަލާ މަހީމާ ޗައުދަރީ ހިމެނެއެވެ.