ރައްޔިތުންގެ މަޖިލީހުގެ ހުރާ ދާއިރާގެ މެންބަރު އަނާރާ ނައީމް ލާޖައްސައިގެން ހުޅުމާލޭ އަތިރިމަތިން ގޯއްޗެއް ހޯއްދަވައިފިއެވެ.
އަނާރާ ހުޅުމާލޭ އަތިރިމަތިން ގޯއްޗެއް ހޯއްދެވީ އޭނާގެ ނަމުގައި ހުޅުމާލޭގައި އޮތް ގެއެއް ލާޖައްސައިގެންނެވެ.
ސިވިލް ކޯޓުން މިދިޔަ ބުރާސްފަތި ދުވަހު ކުރި ހުކުމުގައި ވާގޮތުން އާނާރާ ހުޅުމާލޭ އަތިރިމަތިން ހޯއްދެވީ އަމިއްލަ މީހެއްގެ ގެއެކެވެ. އެ މީހާ ވަނީ އަނާރާގެ ނަމުގައި ހުޅުމާލޭގައި އޮތް ގޯއްޗާ ލާޖައްސައިގެން ބަދަލުކުރަން އެއްބަސްވެފައެވެ.
ހުޅުމާލޭ އަތިރިމަތީގައި ހުރި ގެއާއި އަނާރާގެ ނަމުގައި ހުޅުމާލޭގައި އޮތް ގޯތި ލާޖައްސަން އެއްވެސް ހުރަހެއް ނެތް ކަމަށް ވަނީ ކަނޑައަޅައިފައެވެ.
އެހެންވެ، ހުޅުމާލޭ އަތިރިމަތީގައި ހުރި ގެއާއި އެ ގޭގައިވާ އެންމެހައި އިމާރާތްތަކާއި ނުއުފުލޭ މުދާ އަނާރާއަށް މިލްކުކޮށްދޭން ސިވިލް ކޯޓުން ވަނީ ހުކުމްކޮށްފައެވެ. އަދި، އަނާރާގެ ނަމުގައި ހުޅުމާލޭގައި އޮތް ގޯތި، ހުޅުމާލޭ އަތިރިމަތީގައި ހުންނަ ގޯތީގެ ކުރީގެ ވެރިޔާއަށް މިލްކުކޮށްދިން ކަމަށް ވެސް ހުކުމުގައި ވެއެވެ.
ލާޖެއްސުމަކީ އެއް ގޯތި އަނެއް ގޯއްޗާ ބަދަލުކުރުމެވެ.
ލާޖެއްސުމަކީ ބިމާ ބެހޭ ގާނޫނުގައި ބަޔާންކުރާ މުއާމަލާތެއް ނޫން ނަމަވެސް މި މުއާމަލާތަކީ ބިމާބެހޭ ގާނޫނު ވުޖޫދުވުމުގެ ކުރިން ވެސް ކުރަމުން އައި ކަމެއްކަން ކުރީގެ ހުކުމްތަކުން އެނގެއެވެ.