ޖަރުމަނު ބުންޑެސްލީގާގައި އެންމެ ފަހުގެ ޗެމްޕިއަން ބަޔާ ލެވަކޫސެން 35 މެޗަށް ފަހު, ފުރަތަމަ ފަހަރަށް ލީގުގައި މެޗަކުން ބަލިވެއްޖެއެވެ.
ލެވަކޫސެން ބަލިވެފައިވަނީ އަމިއްލަ ދަނޑުގައި އާރްބީ ލެއިޕްޒިގާ ބައްދަލުކުރި މެޗުގައި 3-2 އިންނެވެ.
މެޗުގެ ފުރަތަމަ ލަނޑު މެޗުގެ 38 ވަނަ މިނެޓުގައި ޖަހައި ލީޑު ނަގާފައިވަނީ ލެވަކޫސެނުންނެވެ. މި ލަނޑު އެ ޓީމަށް ކާމިޔާބުކޮށްދިނީ ޖެރެމީ ފްރިމްޕޮންއެވެ. މި ލަނޑު ޖެހިތާ ހަތް މިނެޓް ފަހުން ފްލޮރިއަން ވާޓްޒް ތަނަވަސްކޮށްދިން ފުރުސަތެއްގައި އެލެކްސް ގްރިމަލްޑޯވަނީ ލެވަކޫސެންގެ ލީޑު ފުޅާކޮށްދީފައެވެ.
މެޗުގައި ލެއިޕްޒިގުން ކާމިޔާބުކުރި ފުރަތަމަ ލަނޑު ފުރަތަމަ ހާފުގެ އިތުރު ވަގުތުގެ ހަތްވަނަ މިނެޓުގައި ޖަހައިދީ، ފަރަގު ކުޑަކޮށްދިނީ ކެވިން ކާމްޕުލްއެވެ.
ލެއިޕްޒިގަށް ނަތީޖާ ހަމަހަމަ ކޮށްދިނީ މެޗުގެ 57 ވަނަ މިނެޓުގައި ލޮއިސް އޮޕެންޑާއެވެ. އަދި، މެޗު ނިމެން 10 މިނެޓަށް ވެފައިވަނިކޮށް ލެއިޕްޒިގް މޮޅުވި ލަނޑު ޖަހައިދިނީ ވެސް އޮޕެންޑާއެވެ.
ލެވަކޫސެން މިދިޔަ ސީޒަންގައި ބަލިވެފައިވަނީ ޔުއޭފާ ޔޫރޮޕާ ލީގުގެ ފައިނަލްގައި އެޓަލާންޓާ އަތުން އެކަންޏެވެ.
ބުންޑެސްލީގާގައި އެ ޓީމު އެންމެ ފަހުން ބަލިވެފައިވަނީ 2022-2023 ވަނަ ސީޒަންގެ ފަހު މެޗުގައި ބޯކަމް އަތުން 3-0 އިންނެވެ. މިދިޔަ ސީޒަންގައި ލެވަކޫސެންއިން ލީގު ކާމިޔާބުކޮށްފައިވަނީ އެއްވެސް މެޗަކުން ބަލިނުވެއެވެ. އެ ޓީމުން ވަނީ ބަލިނުވެ، 462 ދުވަސް ހޭދަކޮށްފައެވެ.
ލެވަކޫސެންގެ މައްޗަށް ހޯދި ކާމިޔާބީއާ އެކު ލެއިޕްޒިގް ވެސް މިހާރު ވަނީ ބަލިނުވެ، 13 މެޗު ލީގުގައި ހަމަކޮށްފައެވެ. މި ކާމިޔާބީއާ އެކު ލިބިފައިވާ ހަ ޕޮއިންޓާ އެކު ލެއިޕްޒިގް ވަނީ ތާވަލުގެ އެއްވަނައަށް ވެސް އަރައިފައެވެ.
މި މުބާރާތުގައި ބޮރުޝިއާ ޑޯޓްމުންޑާއި ވާޑާ ބްރޭމަން ބައްދަލުކުރި މެޗު ލަނޑެއް ނުޖެހި އެއްވަރުވިއިރު ވީއެފްބީ ސުޓުޓްގާޓާއި މައިންޒް ބައްދަލުކުރި މެޗު ނިމުނީ 3-3 އިން ދެ ޓީމު އެއްވަރުވެގެންނެވެ.