ފޭކު އޯލެވެލް ސެޓްފިކެޓްތަކެއް ދައުރުވަމުންދާތީ އެމްކިއުއޭއިން އެ މައްސަލަ ބަލަން ފަށައިފިއެވެ.
އެ އޮތޯރިޓީއިން މިއަދު ނެރެފައިވާ ނޫސް ބަޔާނެއްގައި ވަނީ ދިވެހިރާއްޖޭގައި ރަޖިސްޓްރީ ކޮށްގެން ހިންގާ މަތީ ތައުލީމު ދޭ މަރުކަޒުތަކުން ކުރިއަށްގެންދާ ތައުލީމާއި ތަމްރީނު ޕްރޮގްރާމްތައް ފުރިހަމަކުރުމުން ދޭ ލޯކަލް ސަނަދުތަކުގައި "ރިކޮގްނިޝަން" ތައްގަނޑު ޖެހުން 2016 ވަނަ އަހަރުގެ ސެޕްޓެމްބަރު މަހުގެ އެއްވަނަ ދުވަހުން ފެށިގެން ހުއްޓާލާފައިވާ ކަމަށެވެ.
އަދި އެ އޮތޯރިޓީގެ ޚިދުމަތްތަކަށް އެދި ދެ ފަރާތަކުން ހުށައަޅާފައިވާ ލިޔެކިޔުންތަކާއެކު މަތީ ތައުލީމުދޭ ދެ މަރުކަޒެއްގެ ފޭކު ސަނަދު ފާހަގަކުރެވިފައިވާ ކަމަށެވެ.
އަދި މިކަމާ ގުޅޭ ގޮތުން އެ ފަރާތްތަކާއި އެކު މަޝްވަރާކުރުމުން އެ ފަރާތްތަކުންވެސް އެ ސަނަދަކީ ފޭކު ސަނަދެއް ކަމަށް އެ އޮތޯރިޓީއަށް ކަށަވަރު ކޮށްދީފައިވާ ކަމަށް ވެސް އެމްކިއުއޭގެ ބަޔާނުގައިވެއެވެ.
އަދި އެ ދެ ސަނަދުގެ ތެރެއިން އެއް ސަނަދަކީ ޓީޗިން ދާއިރާއާ ގުޅުންހުރި ސަނަދަކަށް ވުމުން އެމްކިއުއޭއިން ވަނީ ވަޒީފާދޭ ފަރާތްތަކުން ވަޒީފާ ދިނުމުގައި ސަމާލުކަން ދިނުމަށް ވެސް އެދިފައެވެ.
އަދި އެކަމާ ގުޅުންހުރި ފަރާތްތަކާއެކު މި މައްސަލައިގައި މަޝްވަރާ ކުރަމުން ދާކަމަށާއި މިކަން އިތުރަށް ތަހުގީގު ކުރުމަށް މި މައްސަލަ ފުލުހުންނަށް ހުށަހެޅުމުގެ މަސައްކަތް ވެސް ކުރަމުން އަންނަކަމަށް އެމްކިއުއޭއިން ވަނީ ބުނެފައެވެ.