ރާއްޖޭގެ ކޮލެޖު ޔުނިވާސިޓީތަކުގައި ދަރިވަރުން ހަދާ ކޯސްތަކުގައި، ކޯހުން ފާސްވާން ކޮންޓްރޯލްޑް އެސެސްމަންޓު ހަދައި އޭގެން 50 ޕަސެންޓު ހޯދައިގެން ނޫނީ ފާސްނުވެވޭނެހެން މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން އުސޫލަށް ބަދަލު ގެނެސްފިއެވެ.
މި ބަދަލު ގެނެސް އެމްކިއުއޭއިންވަނީ އުސޫލަށް ގެނައި ބަދަލު މިދިޔަ އާދިއްތަ ދުވަހު ގެޒެޓު ކޮށްފައެވެ.
އަލަށް ގެނައި ބައެއް ބަދަލުތަކާއެކު:
- ދަރިވަރުންގެ އަމިއްލަ ޤާބިލިއްޔަތު ވަޒަންކުރެވޭނެ މަދުވެގެން އެއް މަސައްކަތެއް (ލިޔުމުން ނުވަތަ އެހެން ގޮތަކުން) އުފައްދަން ޖެހޭނެއެވެ. ލެވެލް އެކަކުން ފެށިގެން ލެވެލް ނުވަޔަކާ ހަމައަށް ހުރި ހުރިހާ ޕްރޮގްރާމްތަކުގެ މޮޑިއުލްތަކުގައި (މާސްޓަސް ބައި ރިސާޗް ފިޔަވައި) މަދުވެގެން ޖުމްލަ މާކްސްގެ 50 ޕަސެންޓާ އެއްވަރުގެ އިމްތިޙާނު ހިމަނަންވާނެއެވެ. މި އިމްތިޙާނުތަކަކީ ސުޕަވައިޒްކުރެވޭ، ވަގުތު ކަނޑައެޅިފައިވާ އަދި ކޮންޓްރޯލްކުރެވޭ އިމްތިޙާނުތަކެކެވެ.
- މޮޑިއުލްއެއްގެ ޖުމްލަ އެސެސްމަންޓްގެ ފަންސާސް ޕަސެންޓަކީ ކޮންޓްރޯލްކުރެވިފައިވާ (އެހީތެރިކަމެއް ނުލިބޭ) އެސެސްމަންޓްތަކަކަށް ވާންޖެހޭނެއެވެ. މީގެ އިތުރުން، ހުރިހާ ދަރިވަރުން ވެސް މޮޑިއުލްއެއްގެ ޖުމްލަ އެސެސްމަންޓްގެ 50 ޕަސެންޓަށް ގުނޭ ކޮންޓްރޯލްކުރެވިފައިވާ ކޮންމެ އެސެސްމަންޓަކުން ފާސްވާން ޖެހޭނެއެވެ.
މިހާރު ވެސް ގައުމީ ޔުނިވާސިޓީ، އެމްއެންޔޫގައި އަމަލުކުރަމުން އަންނަނީ މި ގޮތަށެވެ.
ދަރިވަރުން ހަދާ ކޯސްތަކުން ފާސްވުމާއި ކިޔެވުމުގެ ފެންވަރު ގިނަ ފަހަރަށް ކަނޑައަޅަނީ ދަރިވަރުން ހަދާ އެސައިމަންޓުތަކުންނެވެ. އެގޮތުން، ބައެއް ޔުނިވާސިޓީތަކާއި ކޮލެޖުތަކުގައި ދަރިވަރުން ކޯސްތަކުން ފާސްވާން 70 ޕަސެންޓު ނުވަތަ އެއަށް ވުރެ ބޮޑު ޕަސެންޓެއް ގުނަނީ އެސައިމަންޓުތަކަށް ބިނާކޮށެވެ.
އެސައިންމަންޓު ހެދުމުގައި ބައެއް ފަހަރު މަކަރު ހެދުން ފަދަ ކަންކަން ކުރުމުގެ މައްސަލަަ ވެސް ފެންމަތިވެއެވެ. ނަމަވެސް މި އާ އުސޫލާއެކު ފާސްވުމުގެ އުސޫލު ހަރުކަށިވާނެއެވެ.