މަތީ ތައުލީމާއި ތަމްރީނުދޭ 101 މަރުކަޒަކުން ރީ-ރަޖިސްޓްރީ ނުކުރާތީ، އެ ތަންތަނުން ހިންގާ ކޯސްތަކުގެ ސަނަދުތައް ބަލައިނުގަތުމަށް, މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން ނިންމައިފިއެވެ.
އެމްކިއުއޭއިން ކުރި އިއުލާނެއްގައި ބުނީ، މަތީ ތައުލީމާއި ތަމްރީނުގެ ގާނޫނުގެ ދަށުން ދިވެހިރާއްޖޭގައި މަތީ ތައުލީމާއި ތަމްރީނުދޭ މަރުކަޒުތައް ހިންގޭނީ، މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާ ބެހޭ ވުޒާރާގައި ރަޖިސްޓާ ކުރުމަށް ފަހު ކަމަށެވެ. ނަމަވެސް މިއަދާ ހަމައަށް ރީ-ރަޖިސްޓްރީ ކޮށްފައިނުވާ 101 މަރުކަޒެއް ހިމެނޭ ކަމަށް އެމްކިއުއޭއިން ބުންޏެވެ.
އަދި އެ ލިސްޓްގައި ހިމެނޭ 101 މަރުކަޒަކުން ކުރިން ހުއްދަދީގެން ހިންގަމުން އައި ޕްރޮގްރާމްތައް މިއަދުން ފެށިގެން މަތީ ތައުލީމާއި ތަމްރީނުގެ ގާނޫނުގެ ދަށުން އެ އޮތޯރިޓީން ގަބޫލުނުކުރާނެ ކަމަށް ވަނީ ބުނެފައެވެ.
އެމްކިޔުއޭއިން ވަނީ ގެޒެޓްގައި އެ މަރުކަޒުތަކުގެ ލިސްޓް އާއްމުކޮށްފައެވެ.
ނަމަވެސް ކުރިން އެޕްރޫވަލް ދީފައިވާ ޕްރޮގްރާމްތަކުން ކިޔަވާފައިވާ އަދި އެމްކިއުއޭއަށް ބެޗް އޮޑިޓަށް ފޮނުވާފައިވާ ދަރިވަރުންގެ ސަނަދު އެ އޮތޯރިޓީން ގަބޫލުކުރާނެ ކަމަށް އެ އޮތޯރިޓީން ބުންޏެވެ.
މީގެ އިތުރުން އެކިއެކި ފަރާތްތަކުން އެ އޮތޯރިޓީއަށް ހުށަހަޅައިގެން ވެލިޑޭޓް ކޮށްފައިވާ ސަނަދުތަކުގެ ތެރޭގައި، ކުރިން ވެލިޑޭޓް ކޮށްފައިވާ ގިނަ ސަނަދުތަކެއް ވެރިފަރާތުން ނުގެންގޮސްވާތީ އެކަން ވެސް އެމްކިއުއޭއިން ވަނީ އިއުލާނުކޮށްފައެވެ. އަދި ޑިސެމްބަރު 31، 2022ގެ ކުރިން ވެލިޑޭޓް ކޮށްފައިވާ ސަނަދުތައް، ޖުލައި 31، 2025ގެ ކުރިން ސަނަދުތަކާ ވެރިފަރާތުން ހަވާލުވުމަށް ވަނީ އެދިފައެވެ.
އެމްކިއުއޭއިން ބުނީ އެ މުއްދަތުގައި ނުގެންދާ ސަނަދުތައް ފައިލް ކުރެވޭނެ ކަމަށާއި އޭގެ ފަހުން އެ ތާރީޚުގެ ސަނަދެއް ބޭނުންވެއްޖެނަމަ އަލުން އާ އެޕްލިކޭޝަނެއްގެ ގޮތުގައި އެ އޮތޯރިޓީއަށް ހުށަހަޅަން ޖެހޭނެ ކަމަށެވެ.
އަދި 2023 އާއި 2024ގައި ވެލިޑޭޓްކޮށް ވެރިފަރާތުން ހަވާލުނުވާ ސަނަދުތައް ވެސް ވީ އެންމެ އަވަހަށް ވެރިފަރާތުން ހަވާލުވުމަށް ވަނީ އެދިފައެވެ.