ސަރުކާރުން އިތުރު ބަހަނާތަކެއް ނުދައްކައި، ރާއްޖޭގެ އިގްތިސާދު ރައްކާތެރިކުރުމަށް ޓަކައި މަސައްކަތް ކޮށްދިނުމަށް އިދިކޮޅު އެމްޑީޕީން ސަރުކާރަށް މިއަދު ގޮވާލައިފިއެވެ.
އެ ޕާޓީން މިރޭ ނެރުނު ނޫސް ބަޔާނެއްގައިވަނީ ވޭތުވެދިޔަ ތިން މަހުގެ ތެރޭގައި ދެވަނަ ފަހަރަށް، އަދި އެއްފަހަރާ ތިން ދަރަޖަ ތިރިއަށް، ރާއްޖޭގެ ކްރެޑިޓް ރޭޓިން ދަށްކުރުމާ ގުޅިގެން ކަންބޮޑުވުން ފާޅުކޮށްފައެވެ.
އެ ބަޔާނުގައިވަނީ މިދިޔަ ރިޔާސީ އިންތިޚާބަށް ފަހު ފިޗުން ރާއްޖޭގެ ކްރެޑިޓް ރޭޓިން ދަށްކޮށްފައި ނުވުމަކީ އެމްޑީޕީ ސަރުކާރުގެ މާލީ ސިޔާސަތުތަކަށް ބައިނަލްއަގުވާމީ އިދާރާތަކުގެ އިތުބާރު އޮތް ކަމާއި، އިސްލާހީ ފިޔަވަޅުތައް ތަންފީޒު ކުރާނެ ކަމުގެ ޔަގީންކަން އެ އިދާރާތަކަށް އޮތްކަން ދައްކުވައިދޭ ކަމެއް ކަމަށް ބުނެފައެވެ.
އެހެން ނަމަވެސް މިދިޔަ ތިން މަހުގެ ތެރޭގައި ދެވަނަ ފަހަރަށް ރާއްޖޭގެ ރޭޓިން ދަށް ކުރުމަކީ ސަރުކާރުގެ ދޯހަޅި ސިޔާސަތުގެ ސަބަބުން މާލީ ހާލަތު އިންތިހާއަށް ގޯސްވަމުންދާކަން ދައްކުވައިދޭ ކަމެއް ކަމަށް އެމްޑީޕީން ބުނެއެވެ.
އެމްޑީޕީން ބުނީ ދައުލަތުގެ ޚަރަދު ބޮޑުވުމާއި، މާލީ އިސްލާހުތައް ލަސްކުރުމާއި، ރާއްޖޭގެ ރަސްމީ ރިޒާވް މެނޭޖްނުކުރެވި ދަށަށް ދިއުމާއި، ބޭރުން ފައިސާ ހޯދުމަށް ނުކުޅެދިފައިވުމަކީ، މާލީ ހާލަތު ގޯސްވަމުންދާކަން ރަމްޒުކޮށްދޭ ކަންތައްތައް ކަމަށެވެ.
ފިޗުން ރާއްޖޭގެ ކްރެޑިޓް ރޭޓިން ދަށްކުރުމަކީ އިޤްތިޞާދީ ގޮތުން ކަންބޮޑުވާންޖެހޭ އެތައް ކަމެއް ދައްކުވައިދޭ ކަމެއް ކަމަށް އެމްޑީޕީން ވަނީ ބުނެފައެވެ.
އެ ގޮތުން ފިޗުން ފާހަގަކޮށްފައިވާ ކަންކަމުގެ ތެރޭގައި ބޭރު ފައިސާގެ ރިޒާވް ބޮޑުތަނުން ދަށަށް ދިއުމާއި ބޭރުގެ ދަރަނި އަދާކުރުމަށް ބޭނުންވާ ފައިސާގެ މިންވަރު އިތުރުވުން އެ ބަޔާނުގައި ވަނީ ފާހަގަ ކޮށްފައެވެ.
އެމްޑީޕީން ބުނީ އެ ޕާޓީން ދެކޭ ގޮތުގައި މައްސަލަތަކާ ގުޅުންހުރި ކަންކަން ދެނެގަތުމަކީ މި ހާލަތުގެ ނުރައްކާތެރިކަން ވަޒަންކުރުމަށް ވަރަށް މުހިންމު ކަމެއް ކަމަށެވެ.
އެ ބަޔާނުގައިވަނީ ރާއްޖޭގެ ރޭޓިން ދަށްކުރުމަށް މެދުވެރިވި ސަބަބުތައް ވެސް ފާހަގަކޮށްފައެވެ. އޭގެ ތެރޭގައި ހިމެނެނީ:
- ސަރުކާރުގެ އަމަލުތަކުގެ ސަބަބުން ފަތުރުވެރިކަމަށާއި އިގްތިސާދަށްވީ ގެއްލުން
- ބޭކާރު އަދި ރޭވުމެއްނެތި ސަރުކާރުން ކުރާ ޚަރަދުތަކުގެ ސަބަބުން ރިޒާވް ހީނަރުވުން
- ފިސްކަލް ރިފޯމް ލަސްކުރުން
އެމްޑީޕީން މި އިގްތިސާދީ ނުރައްކާތައް ކުޑަކުރުމަށް ވަގުތުން ފިޔަވަޅު އަޅަން ފެށުމަށް ސަރުކާރަށް ގޮވާލައިފައެވެ. އެ ފިޔަވަޅުތަކުގެ ތެރޭގައި:
- ބޭކާރު ޚަރަދުތައް ހުއްޓައިލުން، މި ވަގުތަށް މުހިންމު ނޫން ހުރިހާ ޚަރަދުތައް މަދުކުރުން
- މާލީ އިސްލާހުތައް ނުވަތަ ފިސްކަލް ރިފޯމް އަވަސް ކުރުން
- އަދި ރަހުމަތްތެރި ޤައުމުތަކާއި ބައިނަލްއަޤްވާމީ އިދާރާތަކުގެ އެހީތެރިކަން ހޯދައި، އަވަސް ގޮތެއްގައި ރާއްޖޭގެ ރިޒާވް ސަޕޯޓްކުރުމަށް ބޭނުންވާ ބޭރު ފައިސާ ހޯދުން
- ދައުލަތުގެ މާލީ ހިސާބުތައް ޢާންމު ކުރުމަށް އަލުން ފެށުން
ކްރެޑިޓް ރޭޓިން މަތިވާނެ ކަންކަމުގެ ގޮތުގައި ފިޗުން ފާހަގަކޮށްފައިވަނީ ބޭރުގެ ފައިނޭންސް ހޯދުމާއި މާލީ އިސްލާހުތައް ގެނައުމުގައި ފާހަގަކުރެވޭ ކުރިއެރުން ހޯދުންކަން ފާހަގަކޮށް، މި ކަންކަން ލަސްނުކޮށް ކުރުމަށް ވަނީ ސަރުކާރަށް ގޮވާލައިފައެވެ.