އެމެރިކާގައި މިހާރު ކުރިއަށްދާ ޔޫއެސް އޯޕަން ޓެނިސް މުބާރާތުގެ ފިރިހެން ސިންގަލްސް އިވެންޓްގެ ތިންވަނަ ބުރުން އެންމެ ފަހުގެ ޗެމްޕިއަން އަދި މި ފަހަރުގެ މުބާރާތުގައި ދެވަނައަށް ސީޑު ކުރެވިފައިވާ ސާބިއާގެ ނޯވަކް ޖޯކޮވިޗް ޖާގަ ހޯދައިފިއެވެ.
މި މުބާރާތުގެ ތިންވަނަ ބުރުން ޖޯކޮވިޗް ޖާގަހޯދީ ދެވަނަ ބުރުގައި އަމިއްލަ ޤައުމަށް ނިސްބަތްވާ ލާސްލޯ ޑިޔޭރޭއާ ބައްދަލުކުރި މެޗުގެ ފުރަތަމަ ދެ ސެޓު ކުޅެ އަދި ތިންވަނަ ސެޓުގެ ކުޅުން ކުރިއަށް ދަނިކޮށް ޑިޔޭރޭ މެޗުން ރިޓަޔާ ކުރުމުންނެވެ. އޭރު ތިންވަނަ ސެޓުގެ ފުރަތަމަ ދެ ގޭމްވަނީ ޖޯކޮވިޗް ކާމިޔާބުކޮށްފައެވެ.
އޭނާ މެޗުގެ ފުރަތަމަ ދެ ސެޓު ކާމިޔާބުކޮށްފައިވަނީ 6-4 އަދި 6-4 އިންނެވެ. މިމުބާރާތުގެ ތިންވަނަ ބުރުގައި ޖޯކޮވިޗް ބައްދަލުކުރުމަށް ހަމަޖެހިފައިވަނީ 28 ވަނައަށް ސީޑު ކުރެވިފައިވާ އޮސްޓްރޭލިއާގެ އެލެކްސީ ޕޮޕިރިންއާއެވެ. ޕޮޕިރިން ތިންވަނަ ބުރުން ޖާގަ ހޯދީ ސްޕެއިންގެ ޕެޑްރޯ މާޓިނޭޒާ ބައްދަލުކުރި ދެވަނަ ބުރުގެ މެޗު 6-2، 6-4 އަދި 6-0 އިން ކާމިޔާބު ކޮށްގެންނެވެ.
މުބާރާތުގައި ކުޅުނު އެހެން މެޗުތަކަށް ބަލައިލާއިރު ހަތަރުވަނައަށް ސީޑު ކުރެވިފައިވާ ޖަރުމަނުވިލަތުގެ އެލެގްޒެންޑާ ޒުވަރޭވާ ފަރަންސޭސިވިލާތުގެ އެލެގްޒެންޑްރޭ މުލާ ބައްދަލުކުރި މެޗު ސީދާ ތިން ސެޓުން ކަމިޔާބުކުރީ ޒުވަރޭވްއެވެ.
މެޗުގެ ފުރަތަމަ ސެޓު 6-4 އިން ޒުވަރޭވް ކާމިޔާބުކުރިއިރު ދެވަނަ ސެޓު ޓައި ބްރޭކަކަށް ގޮސް 7-5 އިން ކާމިޔާބުކުރީ ޒުވަރޭވްއެވެ. ފަހު ސެޓު އޭނާ ކާމިޔާބުކުރީ 6-1 އިންނެވެ. ތިންވަނަ ބުރުގައި ޒުވަރޭވް ބައްދަލުކުރުމަށް ހަމަޖެހިފައިވަނީ އާޖެންޓީނާގެ ތޯމަސް މާޓިން އެޓްޗެވެރީއާއެވެ.
އޭނާ މި މުބާރާތުގެ ތިންވަނަ ބުރުން ޖާގަހޯދީ މުބާރާތުގައި 29 ވަނައަށް ސީޑު ކުރެވިފައިވާ އަމިއްލަ ޤައުމަށް ނިސްބަތްވާ ފްރަންސިސްކޯ ސެރުންޑޫލޯއާ ބައްދަލުކުރި ދެވަނަ ބުރުގެ މެޗު ތިން ސެޓު ދެ ސެޓުން ކާމިޔާބުކޮށްގެންނެވެ. އެއީ 6-3، 6-4، 4-6، 1-6 އަދި 6-3 އިންނެވެ.
މުބާރާތުގައި ހަވަނައަށް ސީޑު ކުރެވިފައިވާ ރަޝިއާގެ އަންޑްރޭ ރުބްލޭވާ ފަރަންސޭސިވިލާތުގެ އާތާ ރިންޑާކްނެކް ބައްދަލުކުރި މެޗު ރުބްލޭވްއަށް ކާމިޔާބުކުރެވުނީ ވެސް ފަސް ސެޓަށް ގޮސްގެންނެވެ. މި ގޮތުން، ފުރަތަމަ ދެ ސެޓު ރިންޑާކްނެކް 4-6 އަދި 5-7 އިން ކާމިޔަބުކޮށްފައިވަނިކޮށް، ޖެހިގެން އައި ތިން ސެޓު ރުބްލޭވް ކާމިޔާބުކޮށްފައިވަނީ 6-1، 6-2 އަދި 6-2 އިންނެވެ. ތިންވަނަ ބުރުގައި ރުބްލޭވް ބައްދަލުކުރުމަށް ހަމަޖެހިފައިވަނީ 30 ދެވަނައަށް ސީޑް ކުރެވިފައިވާ ޔީރީ ލެހެޗްކާއާއެވެ.