އިއްޔެ ހިންގަން އުޅުނީ ބަޣާވާތެއް، ނުފޫޒު ނުފޯރުވާ މައްސަލަ ބަލާނަން: ރައީސް

ބޭންކް އޮފް މޯލްޑިވްސް (ބީއެމްއެލް)ގެ ނިންމުމާ ގުޅިގެން އިއްޔެ ހިންގަން އުޅުނީ ބަޣާވާތެއްކަމަށާއި، ނުފޫޒު ނުފޯރުވާ މައްސަލަ ބަލާނެކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވީ މިއަދު ބޭއްވި ޕީއެންސީ ޖަގަހަ ޖަލްސާގައި ވާހަކަ ދައްކަވަމުންނެވެ. އެމަނިކުފާނު ވިދާޅުވީ، އެ މައްސަލަ ގާނޫނު އަސާސީގައި އޮތް ގޮތަށް ބަލައި އަޅަންޖެހޭ ފިޔަވަޅުތައް އަޅާނެކަމަށެވެ.

ރައީސް ޑރ. މުހައްމަދު މުއިއްޒު ވިދާޅުވީ އިއްޔެ ބޭންކް އޮފް މޯލްޑިވްސް (ބީއެމްއެލް)އިން ނިންމި ނިންމުން އިއުލާނުކުރަން އުޅޭކަން އެ މަނިކުފާނަށް އެނގިވަޑައިގަތް ހިސާބުން ވަރަށް ގިނަ މަސައްކަތްތަކެއް ކުރެއްވި ކަމަށެވެ.

އެހެން ނަމަވެސް އެ ނިންމުން ނެރުނީ، އެ މަނިކުފާނުގެ އަޑު ނާހައި ކަމަށް ރައީސް ވިދާޅުވިއެވެ.

ރައީސް ވިދާޅުވި ގޮތުގައި އެމްޑީޕީން އެ މަސައްކަތް ކުރީ ވަރަށް ދުރާލާ ރާވައިގެންނެވެ. އެ ގޮތުން ކައިރި ބައެއް ގައުމުތަކުގައި ރައްޔިތުން މަގުމައްޗަށް ނުކުތުމުގެ މިސާލު ދައްކައިގެން ހިތްވަރުދިނުމަށް މަސައްކަތްތަކެއް އެޕާޓީން ކުރި ކަމަށް އެމަނިކުފާނު ވިދާޅުވިއެވެ.

"މިއީ ރޭވިގެން ކުރި ކަމެއް. އެ ކުރި ގޮތެއް ބަލަން ފުލުހުން އެވަނީ ފަށާފައި، ފުލުހުން ކުރާނީ ޕްރޮފެޝަނަލް މަސައްކަތް. މި ސަރުކާރުން ފުލުހުންގެ އިދާރާއަކަށް އަދި ސިފައިންގެ އިދާރާއަކަށް ސިޔާސީ ނުފޫޒެއް ނުފޯރުވާނެ. އެއީ އަޅުގަނޑު ކުރާނެ ކަމެއް ނޫން. އެ ބޭފުޅުން ކުރާ ޕްރޮފެޝަނަލް މަސައްކަތުން ފެންނަ ކަމެއް ފެނުނީމާ، އެ ދާނީ ރައްޔިތުންނާ ވެސް ހިއްސާ ކުރަމުން" ރައީސް ވިދާޅުވިއެވެ.

އެމަނިކުފާނު ވިދާޅުވީ، ސަލާމަތް ބުއްދި ހުރި ކޮންމެ މީހަކު ވިސްނާލުމުން މިއީ ބަޣާވާތެއްކަން ވިސްނޭނެކަމަށެވެ.

"އެހެންވީމާ ސަރުކާރު ގައިރު ގާނޫނީ ގޮތަށް ބަދަލު ކުރުމަށް، އަދި އެ ނޫން ވެސް ގައިރު ގާނޫނީ ގޮތަކަށް ރައްޔިތުންގެ ނިންމުން ބަދަލުކުރަން ކުރާ މަސައްކަތް، ގާނޫނުއަސާސީގައި އޮންނަ ގޮތަކަށް ކުރަން ޖެހޭ ކޮންމެ ކަމެއް ކުރުމުގައި ފުރިހަމަ ބާރާއި އެކުގައި، ގާނޫނުއަސާސީގައި އޮންނަ ގޮތަށް ހުރިހާ ކަމެއް އަޅުގަނޑުމެން ކުރާނަން."

ރައީސް ވިދާޅުވި ގޮތުގައި ބީއެމްއެލްގެ ބޯޑުގައި ތިއްބެވި ޑިރެކްޓަރުންގެ ތެރެއިން ސަރުކާރަށް ނިސްބަތްވަނީ ހަތަރު ޑިރެކްޓަރުން ކަމަށާއި، ބާކީ ފަސް ޑިރެކްޓަރުންނަކީ ސަރުކާރަށް ނިސްބަތްވާ ޑިރެކްޓަރުން ނޫން ކަމަށެވެ.

"ވަރަށް މީހުން ސުވާލު އުފެދިދާނެ، ދިވެހިންގެ ބޭންކު، ސަރުކާރުގެ މެޖޯރިޓީ ހިއްސާ އޮންނައިރު، ކިހިނެއްހޭ ތިވީ. އެތާ ތިބީ އަދި ސަރުކާރުގެ ހަތަރު ޑިރެކްޓަރުން. ދެން ތިބި ފަސް މީހުންނަކީ ސަރުކާރު ޑިރެކްޓަރުންނެއް ނޫން. އެހެންމާ އަދި ނެތް މެޖޯރިޓީއެއް" ރައީސް ވިދާޅުވިއެވެ.

ރައީސް ވިދާޅުވި ގޮތުގައި ސަރުކާރުގެ ފަރާތުން އައްޔަން ކުރާ އިތުރު ދެ ޑިރެކްޓަރުންގެ ނަން ވަނީ ފޮނުވާފައެވެ. އެހެން ނަމަވެސް އެ ބޭފުޅުން އެ މަގާމަށް އައްޔަނު ކުރުމަށް އިތުރު ދެ ހަފުތާ ނަގާނެ ކަމަށް ރައީސް ވިދާޅުވިއެވެ. އަދި ބީއެމްއެލްގެ ބޯޑަށް ޗެއާމަނަކު ވެސް އައްޔަނު ކުރުމަށް ނަން ފޮނުވާފައިވާ ކަމަށާއި، އެހެން ނަމަވެސް އަދި އެ ނަން ވެސް ފާސްކުރެވިފައި ނުވާ ކަމަށް ރައީސް ވަނީ ވިދާޅުވެފައެވެ. އެހެން ކަމުން ބީއެމްއެލްގެ ބޯޑުގައި ސަރުކާރުގެ މެޖޯރިޓީ އޮތްކަމަށް ބުނެ އިދިކޮޅުން ދައްކާ ވާހަކަތައް ރައީސް ވަނީ ދޮގުކުރައްވާފައެވެ.

ރައީސް ވިދާޅުވި ގޮތުގައި އެމްޑީޕީން އިސްވެ ހިންގަން އުޅުނު ބަޣާވާތް ހުއްޓުވުމަށް ޓަކައި، ބީއެމްއެލްގެ ބޯޑުގައި ހިމެނޭ ޕްރައިވެޓް ޑިރެކްޓަރުންގެ ތެރެއިން ޗަމްޕާ މުޙައްމަދު މޫސާ (އުއްޗު)އާއި ޗަމްޕާ ޙުސައިން އަފީފް ވަރަށް ބޮޑު އެހީތެރިކަމެއް ދެއްވިއެވެ. އެ ގޮތުން ބީއެމްއެލްގެ ނިންމުން ބާތިލް ކުރެވުނީ، އެ ބޭފުޅުން ރިޕްރެޒެންޓް ކުރާ ޑިރެކްޓަރުންނާ ވާހަކަ ދައްކަވައިގެންނާއި، ކެބިނެޓުން ހުއްޓައިނުލައި މަސައްކަތްކޮށްގެން ކަމަށް ރައީސް ވިދާޅުވިއެވެ.

އިއްޔެ ބީއެމްއެލްއިން ވަނީ ރުފިޔާ ކާޑަށް ޑޮލަރު ދޫކުރުން ހުއްޓާލަން އިއުލާން ކުރުމާ ގުޅުވައި އިދިކޮޅުން ބަޣާވާތްކުރަން އުޅުނު ކަމަށް ތުހުމަތުކޮށް، ފުލުހުން މިރޭ ވަނީ އެ މައްސަލަ ތަހުގީގު ކުރަން ފަށައިފައެވެ.

ބޭންކުން އިއްޔެ ނިންމި ނިންމުން އަނބުރާ ގެންނަން ނިންމީ އެކަމާ ގުޅިގެން ގިނަ ބަޔަކު ނުރުހުން ފާޅުކޮށް، ސޯޝަލް މީޑިއާ ފުރާލާފައި ވަނިކޮށެވެ.

މި ނިންމުން އަނބުރާ ގެންނަން ނިންމުމާ އެކު ސަރުކާރުން ބޭއްވި ނޫސްވެރިންގެ ބައްދަލުވުމެއްގައި އިކޮނޮމިކް މިނިސްޓަރު މުޙައްމަދު ސައީދު ވިދާޅުވީ, ބީއެމްއެލްއިން އަމަލު ކުރީ ސީދާ ރައީސް އެ ކަމުގައި އެގޮތަށް އަމަލުނުކުރަން އަންގަވާފައި އޮއްވައި ކަމަށެވެ.

އެކަމުގެ ތަފުސީލު ދެއްވައި ފޮރިން މިނިސްޓަރު މޫސާ ޒަމީރު ވިދާޅުވީ، ޑޮލަރު މައްސަލައާ ގުޅޭ ގޮތުން މީގެ ކުރިން ސަރުކާރާއި ބޭންކާ ދެމެދު މަޝްވަރާތައް ކުރި ކަމަށެވެ. އެހެންނަމަވެސް، ބޭންކުން އަމަލު ކުރީ ސަރުކާރާ މަޝްވަރާކޮށްފައި އޮތް ގޮތަށް ނޫން ކަމަށް އޭނާ ވިދާޅުވިއެވެ.