އިނގިރޭސި ޕްރިމިއާ ލީގުގެ މެންޗެސްޓާ ސިޓީއަށް ކުޅެމުން އަންނަ ޕޯޗުގަލްގެ ހުނަރުވެރި ޑިފެންޑަރު ޖާއޮ ކަންސޭލޯ ސައުދީ ޕްރޯ ލީގުގެ އަލް ހިލާލްއަށް ވިއްކާލަން ސިޓީން އެއްބަސްވުމަކަށް އަތުވެއްޖެއެވެ.
ކުޅިވަރު ރިޕޯޓުތައް ބުނާ ގޮތުން ސިޓީން ކަންސޭލޯ ވިއްކާލަން އެއްބަސްވެފައިވަނީ 21.2 މިލިއަން ޕައުންޑަށެވެ. ދެ ކްލަބްގެ ދެމެދުގައި އެއްބަސްވުމަކަށް އާދެވުނުއިރު ކަންސޭލޯ އަދި އެ ކަމަށް އެއްބަސްވިކަން ހާމަކޮށްފައެއް ނުވެއެވެ.
މި ކަމަށް ކަންސޭލޯ އެއްބަސްވެއްޖެނަމަ އުމުރުން 30 އަހަރުގެ ކަންސޭލޯ އަލް ހިލާލާ އެކު ތިން އަހަރު ދުވަހުގެ އެއްބަސްވުމެއްގައި ސޮއި ކުރާނެއެވެ. އަދި، އޭނާ ސިޓީއާ އެކު ސޮއިކޮށްފައިވާ ފަސް އަހަރު ދުވަހުގެ އެއްބަސްވުން ނިމުމަކަށް އަންނާނެއެވެ.
ސިޓީގެ ކޯޗު ޕެޕް ގާޑިއޯލާއާއި ކަންސޭލޯއާ ދެމެދު މީގެ 18 މަސް ދުވަސް ކުރިން ހިނގި ދެބަސްވުމުގެ ސަބަބުން އޭނާ ވަނީ ޖަރުމަނު ބުންޑެސްލީގާގެ ބަޔެން މިޔުނިކާއި ސްޕެނިޝް ލަލީގާގެ އެފްސީ ބާސެލޯނާއަށް ލޯން އެއްބަސްވުންތަކުގެ ދަށުން ކުޅެފައެވެ. އަދި، މި ފަހަރު ޕްރީ ސީޒަނަށް އޭނާ އެނބުރި ސިޓީއަށް އައިސް ކުޅެމުންދިޔަ ނަމަވެސް ޕެޕްގެ ފުރަތަމަ 11އިން އޭނާއަށް ޖާގައެއް ނުލިބެއެވެ.
ސިޓީގައި މޮޅު ކުޅުމެއް ކުޅެމުންދިޔަ ކަންސޭލޯއާއި ގާޑިއޯލާއާ ދެމެދު މައްސަލަ ޖެހުނީ 2022 ވަނަ އަހަރު އޭނާ ސިޓީއާ އެކު ހަދާފައިވާ އެއްބަސްވުން އާކުރިތާ މާ ގިނަ ދުވަހެއް ނުވަނީހެވެ. މި ސީޒަންގައި މިހާތަނަށް ސިޓީ ކުޅުނު ކޮމިއުނިޓީ ޝީލްޑް މެޗާއި ލީގުގައި ކުޅުނު ދެ މެޗުގައި އޭނާއަށް ކުޅުމުގެ ފުރުސަތު ލިބިފައެއް ނުވެއެވެ.