މަޝްހޫރު ކޮމެޑީ ފިލްމުތައް ގެނެސްދޭ ޕްރޮޑިއުސަރު ސާޖިދު ނަދިއަދުވާލާގެ ކުންފުނީގެ މަގުބޫލު ފްރެންޗައިސް "ހައުސްފުލް"ގެ ފަސް ވަނަ ފިލްމަށް ބަތަލާ ޖެކްލީން ފެނާންޑެޒް ސޮއިކޮށްފައިވާ ކަމަށް ރިޕޯޓުތައް ބުނެފިއެވެ.
ކުރިން މި މަހު މަސައްކަތް ފަށަން ނިންމާފައިވާ ފިލްމު "ހައުސްފުލް 5"ގެ މަސައްކަތް ތާވަލުކުރެވިފައި ވަނީ ކުރިއަށް އޮތް ސެޕްޓެމްބަރު މަހު ފަށާ ގޮތަށެވެ.
މިހާރު ވެސް ބޮޑު ކާސްޓެއް ހިމެނޭ މި ފިލްމަށް ޖެކްލީން ސޮއިކޮށްފައިވާ ކަމުގެ އަޑުތައް ފެތުރިފައިވާއިރު ޖެކްލީން އަކީ ފިލްމަށް ސޮއިކުރިކަމަށް ރިޕޯޓުތައް ބުނެފައިވާ ފުރަތަމަ ބަތަލާއެވެ.
ފިލްމުގެ ލީޑް ރޯލް ކުޅޭ މުހިއްމު އެކްޓަރުންގެތެރޭ އަކްޝޭ ކުމާރު، އަރުޖުން ރާމްޕާލް، އަބީޝެކް ބައްޗަން، ރިތޭޝް ދޭޝްމުކް، ފަރުދީން ޚާން އަދި ސަންޖޭ ދަތު ހިމެނެއެވެ.
މުޅިއެކު 300 ކްރޯޑު ރުޕީސްގެ ބަޖެޓަކުން އުފައްދާ މި ފްރެންޗައިސްގެ ފިލްމުތަކަކީ މިހާތަނަށް ސާޖިދުގެ ކުންފުނިން އެންމެ ބޮޑު ހޭދައެއްކޮށްގެން އުފައްދާ ފްރެންޗައިސެވެ. ފިލްމުގައި ޖެކްލީން ފެންނާނީ އަކްޝޭ ކުމާރުގެ ލަވް އިންޓަރެސްޓްގެ ގޮތުގައެވެ.
ޖެކްލީން އަދި އަކްޝޭ ފިލްމު "ރާމް ސެތޫ"ގެ މަންޒަރެއްގައި--ފޮޓޯ/ފިލްމުފެއަ
ޖެކްލީން އަކީ 2012ވަނަ އަހަރު ރިލީޒްކުރި "ހައުސްފުލް2" އަދި 2016ވަނަ އަހަރު ރިލީޒްކުރި "ހައުސްފުލް3" ވެސް މުހިއްމު ރޯލެއް ކުޅުނު ތަރިއެކެވެ.
އަކްޝޭއާ އެކު ޖެކްލީން ކުޅެފައިވާ ފާހަގަކޮށްލެވޭ ބައެއް ފިލްމުތަކުގެތެރޭ 2015ވަނަ އަހަރު ރިލީޒްވި ފިލްމު "ބްރަދާސް"، 2022ވަނަ އަހަރު ރިލީޒްވި ފިލްމު "ރާމް ސެޓޫ"، "ބައްޗަން ޕާންޑޭ" އަދި މިދިޔަ އަހަރު ރިލީޒްވި ފިލްމު "ސެލްފީ" ހިމެނެއެވެ.