އިއްޔެ ސަރުކާރުން އެޅި ފިޔަވަޅާ އެކު، ބޭންކް އޮފް މޯލްޑިވްސް (ބީއެމްއެލް)އަށް ރައްޔިތުންނާއި ބޭރުގެ ފަރާތްތަކުގެ އިތުބާރު ގެއްލި، ބޭންކިން ގާނޫނު ފުނޑާލާފައިވާ ކަމަށް ދަ ޑިމޮކްރެޓްސްއިން މިއަދު ބުނެފިއެވެ.
ބީއެމްއެލްގެ ބޯޑުން މިދިޔަ ހަފުތާގައި ނިންމި ނިންމުމާ އެއްގޮތަށް، އެ ބޭންކުން އިއްޔެ ހެނދުނު ވަނީ ޕްރައިމަރީ އެކައުންޓަކަށް ރުފިޔާ އެކައުންޓު ބޭނުންކުރާ ކާޑުތަކަށް ޑޮލަރު ނުދޭން ނިންމައިފައިވާކަން އިއުލާންކޮށްފައެވެ. ނަމަވެސް, އިއްޔެ ހަވީރު އެ ބޭންކުން ވަނީ އެ ނިންމުން ބަދަލުކޮށްފައެވެ.
އެއާ އެކު އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ބީއެމްއެލްއިން އެކަން އިއުލާންކުރީ އެގޮތަށް އަމަލުނުކުރަން ރައީސް ޑރ. މުޙައްމަދު މުއިއްޒު އަންގަވައިފައިވަނިކޮށް ކަމަށް ސަރުކާރުން ވަނީ ބުނެފައެވެ.
އެ ކަމާ ގުޅިގެން ޑިމޮކްރެޓްސްއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑިމޮކްރެޓްސްއަށް ނިސްބަތްވާ ރައްޔިތުންގެ މަޖިލީހުގެ ހުޅުދޫ ދާއިރާގެ ކުރީގެ މެންބަރު އިލްޔާސް ލަބީބު ވިދާޅުވީ، މިދިޔަ އޭޕްރީލް މަހުން ފެށިގެން ބޭންކުން ތަކުރާރުކޮށް ސަރުކާރާއި މަރުކަޒީ ބޭންކު (އެމްއެމްއޭ)އަށް އެ ބޭންކަށް ޑޮލަރު ނުލިބޭ ވާހަކަ ހިއްސާކުރަމުން އައި ކަމަށާއި އެ ކަމަށް ހައްލެއް ހޯދައިދިނުމަށް އެދެމުންދިޔަ ކަމަށެވެ.
އެހެންނަމަވެސް، ސަރުކާރުން އެ ކަމަށް އަޅާލާފައިނުވާ ކަމަށް އިލްޔާސް ތުހުމަތުކުރެއްވިއެވެ.
އަދި، އިއްޔެ ބޭންކުން އެ ގޮތަށް އިއުލާނުކުރުމަށް ފަހު އެ ނިންމުން އަނބުރާ ގެންދިޔައީ ސަރުކާރުގެ ނުފޫޒުން ކަމަށް ވެސް އިލްޔާސް ވިދާޅުވިއެވެ.
ސަރުކާރުން އަޅައެއް ނުލާ. އެމްއެމްއޭއިން އަޅައެއް ނުލާ. އެންމެ ފަހުން އެ މީހުންނަށް ނުކަތާވަރުވީމާ ބޭންކުން އެންމެ ފަހުން އެ ނިންމީ ތިމަންނަމެންނަށް އެކަން ކުރެވޭކަށް ނެތޭ. އަޅުގަނޑުމެންނަށް މި ފެންނަނީ މިނިވަން މުސްތަގިއްލު ބޭންކެއް، ސަރުކާރު ހިއްސާ އޮތް ބޭންކަކަށް ރައީސުލްޖުމްހޫރިއްޔާ ސަރުކާރުގެ ޑިޕާޓްމަންޓެއްހެން އަމުރުކުރައްވައިގެން ބޭންކު ހިންގަން އުޅޭތަން، އިލްޔާސް ލަބީބް
އެ ނިންމުމުގެ ސަބަބުން އެ ގެއްލުނީ ބޭންކުގެ ކަސްޓަމަރުންގެ އިތުބާރާއި ޚާއްސަކޮށް ރާއްޖެއިން ބޭރުން ބޭންކާ މުއާމަލާތްކުރާ ފަރާތްތަކުގެ އިތުބާރު ކަމަށް އިލްޔާސް ވިދާޅުވިއެވެ. އަދި، ވަކިން ޚާއްސަކޮށް ބޭންކިން ގާނޫނާއި، ކުންފުނިތަކާ ބެހޭ ގާނޫނާއި ކޯޕަރޭޓް ގަވަނަންސް ކޯޑު އެކީ ފުނޑާލިތަން އިއްޔެ ފެނިގެން ދިޔަކަމަށް އިލްޔާސް ވިދާޅުވިއެވެ.
އެކަމުގެ ސަބަބުން ރާއްޖޭގެ ފައިނޭންޝަލް ސެކްޓާއަށް އޮތް އިތުބާރު ގެއްލިގެން ދިޔަ ކަމަށާއި، އޭގެ އަސަރުތައް ކުރިއަށް އޮތް އެތައް ދުވަހެއްގައި މި ގައުމަށް ފެންނާނެ ކަމަށް އިލްޔާސް ވިދާޅުވިއެވެ.
އިލްޔާސް ލަބީބް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަނީ: އޭނާ ވިދާޅުވީ، އިއްޔެ ސަރުކާރުން އެ ފުނޑާލީ ބޭންކިން ގާނޫނު ކަމަށް -- ސަން ފޮޓޯ/ އަމަން ލަތީފް
ބޭންކުގެ ކަންކަން ނިންމާނީ ބޭންކުގެ ބޯޑުންކަން ފާހަގަކުރައްވާ އިލްޔާސް ވަނީ ސީދާ ރައީސުލްޖުމްހޫރިއްޔާ އިރުޝާދުދެއްވައިގެން ބޭންކުން ނިންމާ ނިންމުންތައް ހުއްޓަން ގޮވާލައްވާފައެވެ. އަދި، އެއީ ބޭންކުގެ ގާނޫނާ ވެސް ޚިލާފު ކަމެއް ކަމަށް އިލްޔާސް ވިދާޅުވިއެވެ.
އިއްޔެ ފެނުނީ އެމްއެމްއޭގެ ގަވަރުނަރު ވަޑައިގެން ބޭންކުގެ މެނޭޖަރެއްގެ ގޮތުގައި ހަރަކާތްތެރިވެވަޑައިގަތް މަންޒަރުކަމަށް އިލްޔާސް ތުހުމަތުކުރެއްވިއެވެ. އެހެންނަމަވެސް، އެމްއެމްއޭއަކީ ބޭންކުތަކުގެ ރެގިއުލޭޓަރެއް ކަމަށާއި ގަވަރުނަރަށް އެކަން ކުރައްވަން ޖެހިވަޑައިނުގަންނަވާނެ ކަމަށް އިލްޔާސް ތަކުރާރުކުރެއްވިއެވެ.
އޭގެ ބަދަލުގައި ސަރުކާރުން ކުރަންވީ ކަމަކީ ސަރުކާރުގެ އާމްދަނީ އިތުރުކުރުމާއި، ޑޮލަރުގެ އާމްދަނީ އިތުރުކުރުމުގެ އިތުރުން ޚަރަދުތައް ކުޑަކުރުން ކަމަށް އިލްޔާސް ވިދާޅުވިއެވެ.
އެހެންވީމާ ބޭންކުން ކޮޅަށް ހުރުމުގެ ބޭނުމުގައި ބޭންކު ސަލާމަތްކުރުމަށް، ބޭރު ފައިސާ ސަލާމަތްކުރުމަށް، ރާއްޖޭގެ ރައްޔިތުންގެ ފައިސާ ސަލާމަތްކުރުމަށް ނަގަންޖެހޭ ފިޔަވަޅުތައް ބޭންކުން ނެގީ. ނަގަންޖެހޭނެ އެ ގަޑީގައި. މާ ލަސް ވެސް ވެއްޖެ، އިލްޔާސް ލަބީބް
އިލްޔާސް ވަނީ އެ ގޮތަށް އެކަން ނުކުރެއްވުމަށް އެމްއެމްއޭއަށް ވެސް ގޮވާލައްވާފައެވެ.
ބީއެމްއެލްއިން އިއްޔެ ހެނދުނު ބުނީ، އެ ބަދަލު ގެނައީ ކާޑުތަކުން ކުރާ ބޭރު ފައިސާގެ އަދަދު ދުވަހުން ދުވަހަށް އިތުރުވަމުންދިޔަ ނަމަވެސް ބޭންކަށް ލިބޭ ބޭރު ފައިސާގެ އަދަދު އެއް ވަރެއްގައި ހިފެހެއްޓިފައި ހުރުމުން ކަމަށެވެ.
ނަމަވެސް، އިއްޔެ ހަވީރު ބޭންކުން ވަނީ އެމްއެމްއޭގެ އިރުޝާދުގެ ދަށުން އެ ނިންމުން ބަދަލުކޮށްފައިވާ ކަމަށް ބުނެފައެވެ. އެ ކަމާ ގުޅޭ އިތުރު ތަފުސީލެއް އެ ބޭންކުން ދީފައި ނުވެއެވެ.