ޣައްޒާ ހަނގުރާމަ ހުއްޓާލުމުގެ މަޝްވަރާތައް މިސްރުގެ ވެރިރަށް ގާހިރާގައި އަނެއްކާ ވެސް ފަށައިފިއެވެ.
ޣައްޒާގެ ވެރިކަންކުރާ ހަމާސް ޖަމާއަތުން ބުނީ އެ ޖަމާއަތުގެ މަންދޫބުން މިސްރަށް ފޮނުވި ނަމަވެސް މަޝްވަރާތަކުގައި އަމަލީ ގޮތުން ބައިވެރިނުވާނެ ކަމަށެވެ.
އޭގެ ބަދަލުގައި މަޝްވަރާތަކުގެ މައުލޫމާތު ހޯދުމަށް މަންދޫބުން ބައްދަލުކުރާނީ މިސްރުގެ އޮފިޝަލުންނާ ކަމަށް އެ ޖަމާއަތުގެ އޮފިޝަލަކާ ހަވާލާދީ ރޮއިޓާސް އިން ރިޕޯޓުކޮށްފައިވެއެވެ.
ފިލަޑެލްފީ ކޯރިޑޯގެ ނަމުން މަޝްހޫރު މިސްރާ ބޯޑަރު ސަރަހައްދު ހިމެނޭ ގޮތަށް މުޅި ޣައްޒާއިން އިސްރާއީލުގެ ހުރިހާ ސިފައިން އަނބުރާ ގެންދިއުމަށް ހަމާސްއިން ބާރުއަޅާނެ ކަމަށްވެސް އޮފިޝަލު ވިދާޅުވިއެވެ.
މަޝްވަރާތަކުގެ އަސާސަކީ އެމެރިކާގެ ރައީސް ޖޯ ބައިޑަން މެއި މަހުގެ 31 ވަނަ ދުވަހު ކަނޑައެޅުއްވި އޮނިގަނޑެވެ. ބައިޑެންގެ އެ ހުށަހެޅުއްވުމަށް ހަމާސް ލީޑަރު ޔަހުޔާ ސިންވާރު ވެސް އެއްބަސްވެވަޑައިގެންފައިވާ ކަމަށް ހަމާސް އިން ބުނެފައިވެއެވެ.
ހަނގުރާމަ ހުއްޓައިލުމަށް ބައިޑަން ހުށަހެޅުއްވި ހުށަހެޅުއްވުމުގައި ހިމެނެނީ މައިގަނޑު ތިން މަރުހަލާއެކެވެ. އެއީ ދެ ފަރާތުން ރަހީނުކޮށްފައިވާ ރަހީނުން ދޫކޮށްލުމަށް ހަ މަހުގެ މުއްދަތައް ހަނގުރާމަ މެދުކަނޑައިލުން، އޭގެފަހުން ދެ ވަނަ މަރުހަލާގައި ޣައްޒާ ހަނގުރާމަ ހުއްޓައިލުމާއި ފަހު މަރުހަލާގައި ޣައްޒާ އާރާސްތުކުރުމެވެ.
ޤާހިރާގެ މަޝްވަރާތަކުގައި ބައިވެރިވާ އެމެރިކާގެ އޮފިޝަލުންގެ ތެރޭގައި ސީއައިއޭގެ ވެރިޔާ ވިލިއަމް ބާންސް ހިމެނެއެވެ. އަދި އިސްރާއީލުގެ ޖާސޫސީ އިދާރާއާއި ޑޮމެސްޓިކް ސެކިއުރިޓީ ސާވިސްގެ އިސްވެރިން ވެސް އެ ބައްދަލުވުމުގައި ބައިވެރިވެއެވެ.
ހަނގުރާމަ ހުއްޓައިލުމުގެ މަޝްވަރާތައް އިއްޔެ ފެށި ނަމަވެސް ޣައްޒާ ސަރަހައްދަށް އިސްރާއީލުން ދެމުންގެންދާ ހަމަލާތައް ހުއްޓުމަކަށް އައިސްފައެއްނުވެއެވެ.
އިސްރާއީލުގެ ފައުޖުތަކާއި ހަމާސް ހަނގުރާމަވެރިންނާ ދެމެދު ހިނގަމުންދާ ހަނގުރާމަ ހުއްޓުމަށް ގެނައުމަށް އެމެރިކާ، މިސްރު، އަދި ގަތަރުން އަންނަނީ ހަނގުރާމަ ފެށުނީއްސުރެ މަސައްކަތްކުރަމުންނެވެ.
އިސްރާއީލުން މިހާރު އެންމެ ވަރުގަދަޔަށް ހަމަލާދެނީ ޣައްޒާގެ ދެކުނުން އޮންނަ ޚާން ޔޫނިސްއަށެވެ. އެގޮތުން އެ ސަރަހައްދަށް ރޭ ދިން ހަމަލާއެއްގައި 11 މީހަކު ޝަހީދުވެފައިވެއެވެ.
ޚާން ޔޫނިސްއާއި ދީރް އަލް ބަލާހުން މީހުން ހުސްކުރަން އިސްރާއީލުން އަމުރު ކުރުމުން އެތައް ބަޔަކު އަންނަނީ އެ ސަރަހައްދު ދޫކޮށް ދަމުންނެވެ.
އިސްރާއީލުން ޣައްޒާއަށް ދެމުންގެންދާ އުދުވާނީ ހަމަލާތަކުގައި މިހާތަނަށް 40،334 މީހުން ޝަހީދުކޮށްލައިފައިވާ ކަމަށް ފަލަސްތީނުގެ ސިއްޚަތާބެހޭ ވުޒާރާއިން ހާމަކުރެއެވެ. އޭގެތެރޭގައި ގިނައީ ކުޑަކުދިންނާއި އަންހެނުންނެވެ.