އިންގްލިޝް ޕްރިމިއާ ލީގުގައި ބްރައިޓަން އެންޑް ހޯވް އެލްބިއަން އާއި މެންޗެސްޓާ ޔުނައިޓެޑް ބައްދަލުކުރި މެޗު ބްރައިޓަންއިން ކާމިޔާބު ކޮށްފިއެވެ.
ބްރައިޓަންގެ ދަނޑުގައި ކުޅުނު މިމެޗު އެޓީމުން ކާމިޔާބު ކޮށްފައިވަނީ ދެ ލަނޑު އެއް ލަނޑުންނެވެ. ދެޓީމުގެ ފަރާތުން ވާދަވެރި ކުޅުމެއް ފެނުނު މިމެޗުގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ޔުނައިޓެޑުންނެވެ.
މިމެޗުގެ ފުރަތަމަ ހާފުގެ ކުރީކޮޅު ދެޓީމުން ވެސް ފެނުނީ މާބޮޑަށް ކުޅުމުގެ ތެރެއަށް ނުވަދެވިގެން އުޅުނު ތަނެވެ. އަދި ވަކިހިސާބަކުން ދެން ފެނުނީ ޔުނައިޓެޑުން ރަނގަޅަށް ކުޅެ ބްރައިޓަންގެ ގޯލަށް ނުރައްކާ ކުރަމުންދިޔަ ތަނެވެ. ނަމަވެސް މިއާއެކުވެސް މިމެޗުގެ ފުރަތަމަ ލަނޑު ޖަހައި ލީޑު ނަގާފައިވަނީ ބްރައިޓަން އިންނެވެ.
މިލަނޑު އެޓީމަށް ޖަހައިދިނީ ތަޖުރިބާކާރު ފޯވަޑް ޑެނީ ވެލްބެކްއެވެ. ޕްރިމިއާ ލީގުގައި ކާމިޔާބު ކުރި ފުރަތަމަ ލަނޑު ޔުނައިޓެޑަށް ޖަހައިދިން ވެލްބެކް މިމެޗުގައި ޔުނައިޓެޑާ ދެކޮޅަށް ކާމިޔާބު ކުރި ލަނޑު ވެފައިވަނީ އޭނާ ޕްރިމިއާ ލީގުގައި ކާމިޔާބު ކުރި 100 ވަނަ ލަނޑެވެ. މިލަނޑު ޖެހިތާ މާގިނަ އިރުތަކެއް ނުވެ ޔުނައިޓެޑުން އުފެއްދި ހަމަލާއެއްގައި މާކަސް ރަޝްފަޑް ލަނޑެއް ކާމިޔާބު ކުރި ނަމަވެސް އެލަނޑު ވަނީ އޮފް ސައިޑް ވުމުގެ ސަބަބުން ބަލައި ނުގެންފައެވެ.
މިމެޗުގެ ދެވަނަ ހާފު ޔުނައިޓެޑުން ފެށީ ފުރަތަމަ ހާފަށް ވުރެ ކުޅުން ރަނގަޅުކޮށް މެޗުން ނަތީޖާއެއް ނެރުމުގެ އުންމީދާއެކުއެވެ. މިގޮތުން މެޗުގެ 60 ވަނަ މިނެޓުގައި އުފެއްދި ހަމަލާއެއްގައި ބްރައިޓަންގެ ގޯލަށް ވައްދާލާ ޔުނައިޓެޑަށް މެޗުގެ ނަތީޖާ ހަމަހަމަ ކޮށްދިނީ އަމަދު ޑިއާލޯއެވެ.
މިމެޗުން މޮޅުވުމަށް ދެޓީމުން މަސައްކަތް ކުރަމުންދިޔަ ނަމަވެސް ލަނޑެއް ކާމިޔާބު ނުކުރެވި 90 މިނެޓުގެ ކުޅުން ހަމަވުމާއެކު މިމެޗު އެއްވަރު ވެގެން ނިމިދާނެކަމަށް ހީވި ނަމަވެސް ބްރައިޓަންގެ ފަރާތުން ފެނިގެންދިޔައީ މެޗުން މޮޅު ވުމަށް ކުރަމުންދިޔަ މަސައްކަތް އިތުރު ކުރި ތަނެވެ. އަދި ނަތީޖާ އަކަށްވީ އިތުރު ވަގުތުގެ ފަސް ވަނަ މިނެޓުގައި ބްރައިޓަން އިން ލަނޑެއް ޖަހާ މެޗުގެ ލީޑު ނެގުމެވެ.
މިލަނޑު އެޓީމަށް ކާމިޔާބު ކޮށްދިނީ ޖާއޮ ޕެޑްރޯއެވެ. މިލަނޑު ޕެޑްރޯ ކާމިޔާބު ކުރީ ޔުނައިޓެޑްގެ ޕެނަލްޓީ އޭރިއާ ތެރޭ ވަރަށް ހުސްކޮށް އޮވެއެވެ. މިކާމިޔާބީއާއެކު ބްރައިޓަންއިން މިވަނީ މިސީޒަންގައި މިހާތަނަށް ކުޅުނު ދެމެޗު ކާމިޔާބު ކޮށްފައެވެ.