މާލޭ މަގުމަތިން މީހަކަށް ވަޅިން ބިރުދައްކައި، ފޯނެެއް ފޭރުނު އަންހެން މީހާ، 10 ދުވަހަށް ބަންދުކުރުމަށް ކްރިމިނަލް ކޯޓުން އިއްޔެ އަމުުރުކޮށްފިއެވެ.
މި މައްސަލާގައި ގދ. ވާދޫ، ބުރުނިއާގެ ޝާނާ މުޙައްމަދު ޖުނައިދު (26އ) ހައްޔަރުކޮށްފައި ވަނީ މިދިޔަ ބުރާސްފަތި ދުވަހެވެ.
ކްރިމިނަލް ކޯޓުން އޭނާގެ މައްޗަށް ބަންދުގެ އަމުރުކޮށްފައި ވަނީ ތޫނު ހަތިޔާރު ބޭނުންކޮށްގެން ފޭރުނު މައްސަލައިގައެވެ.
އެގޮތުން ކުށްކުރި ކަމަށް ތުހުމަތުކުރެވޭ މިންވަރަށް ހެއްކާއި ގަރީނާ ހުށަހަޅާފައިވާކަމަށް ހުކުމުގައި ބުނެފައިވެއެވެ. އެގޮތުން ހާދިސާ ހިނގި ތަނަށް ދިޔަ ފުލުހުންގެ ހާދިސާ ރިޕޯޓު ހުށަހަޅާފައިވާ ކަމަށް ބުނެފައިވެއެވެ.
އަމުރުގައި ބުނެފައިވާ ގޮތުން ނަމަ އޭނާ ބަންދުގައި ބަހައްޓަންޖެހެނީ ޖިނާއީ އިޖުރާއަތުގެ ގާނޫނުގެ ދަށުން މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ޓަކައެވެ.
ކޯޓުން އޭނާގެ މައްޗަށް އިއްވާފައިވާ އަމުރުގައި ބުނެފައި ވަނީ، އެ ކުށަށް އޭނާ އިންކާރުކޮށްފައިވާ ކަމަށެވެ.
އަދި އެއްވެސް ފަރާތަކަށް މި މައްސަލައާ ގުޅިގެން އަނިޔާއެއް ލިބިފައިވާކަމުގެ މައުލޫމާތެއް ލިބިފައިނުވާ ކަމަށާއި، ފޭރުނުކަމަށް ބުނާ ފޯނު އެހެން މީހަކު އައިސް ފޯނުގެ ވެރިފަރާތަށް ހަވާލުކޮށްފައިވާކަމަށް އިންވެސްޓިގޭޓިވް އޮފިސަރު ބުނެފައިވާ ކަމަށް އެ އަމުރުގައި ވަނީ ބަޔާންކޮށްފައެވެ.
ފާހަގަކޮށްލެވޭ ގޮތުގައި، ވައްކަމާއި ފޭރުމުގެ އިތުރުން މާރާމާރީގެ މައްސަލަތައް ވެސް މާލެ ސަރަހައްދުގައި ވަނީ އިތުރުވެފައެވެ.
ފުލުހުންގެ ތަފާސްހިސާބުން ދައްކާ ގޮތުގައި މިއަހަރުގެ މިހާތަނަށް ވައްކަމާއި ފޭރުމުގެ 2620 މައްސަލަ ހުށަހަޅައިފައިވެއެވެ. އަދި މާރާމާރީގެ 425 މައްސަލަ ވެސް ހުށަހަޅައިފައިވެއެވެ.