ޖިންސީ ގުނަވަނުގައި މަސްތުވާތަކެތި ހަރުކޮށްގެން، ވެލާނާ އިންޓަނޭޝަނަލް އެއާޕޯޓު (ވީއައިއޭ)އިން ފުރަން އުޅުނު މީހަކު އުމުރަށް ޖަލަށްލާން ކްރިމިނަލް ކޯޓުން މިދިޔަ ޑިސެންބަރު މަހުގެ 31ވަނަ ދުވަހު ހުކުމް ކޮށްފިއެވެ.
މި މައްސަލައިގައި އުމުރަށް ޖަލަށްލީ، މާލޭ ވ. ސެޓަލައިޓް، މުހައްމަދު ނައީމެވެ.
މަސްތުވާތަކެއްޗާއެކު ނައީމް އެއާޕޯޓަށްދާ ކަމަށް ފުލުހުންގެ އިންޓެލްއަށް މައުލުމާތު ލިބުނީ 2021ވަނަ އަހަރުގެ ނޮވެމްބަރު ހަތަރެއްގެ 05:30 ހާއިރު ކަމަށް ދައުލަތުން ނައީމްގެ މައްޗަށް ހުށަހެޅި ދައުވާގައި ވެއެވެ. އެގޮތުން، ފުލުހުން އެއާޕޯޓު ތެރޭގައި ހަރަކާތްތެރިވަނިކޮށް، ކޫއްޑޫ ޗެކިން ކިއުއަށް ނައީމް އެރުމުން ފުލުހުން ވަނީ އޭނާގެ އަތުގައި މަސްތުވާ ތަކެތި ހުރިތޯ ސުވާލުކޮށްފައެވެ.
ދައުވާގައި ވާގޮތުން ނައީމް ވަނީ އޭނާގެ ޖިންސީގެ ގުނަވަނުގައި ޓޭޕްއޮޅައި މަސްތުވާތަކެތި ހަރުކޮށްފައި ވާނެކަމަށް ކަމަށް ފުލުހުން ގާތު ބުނެފައެވެ. ފުލުހުން ޗެކުކުރިއިރު، އޭނާގެ އަތުން 44.3 ގްރާމުގެ ޑައިމޯފިން ވަނީ ފެނިފައެވެ.
މި މައްސަލައިގައި ނައީމްގެ މައްޗަށް ކޮށްފައިވަނީ ޑައިމޯފިން ޓްރެފިކު ކުރުމުގެ ދައުވާއެވެ.
ކްރިމިނަލް ކޯޓުގައި ނައީމް ބުނެފައި ވަނީ މަސްތުވާތަކެއްޗާއެކު އެއާޕޯޓަށް ދިޔައީ އޭނާގެ މަންމަގެ ރަށް، ގއ. މާމެންދުއަށް ދިއުމަށް ކަމަށެވެ.
އޭނާއަކީ މަސްތުވާތަކެތި ބޭނުންކުރާ މީހެއް ކަމަށާއި، ނަމަވެސް އޭނާގެ އަތުން އަތުލައިގަތް މަސްތުވާތަކެތީގައި ފުލުހުން ތުހުމަތުކުރި މިންވަރަށް ބަރުދަން ނުހުންނާނެ ކަމަށް ނައީމް ކޯޓުގައި ބުންޏެވެ. އޭނާ ބުނީ ދައުވާކޮށްފައި އޮތީ، އޭނާގެ އަތުން ފެނުނު މަސްތުވަތަކެއްޗަށް ނޫން ކަމަށެވެ. އެހެން ނަމަވެސް އެކަން ނައީމަށް ސާބިތުކޮށްދެވިފައެއް ނުވެއެވެ.
މި މައްސަލައިގައި ފުލުހުންގެ ފަރާތުން ހުށަހަޅާފައިވާ ހެކިތަކާއެކު ކޯޓުން ނިންމީ، ޑައިމޯފިން ޓްރެފިކު ކުރުމުގެ ދައުވާ ނައީމްގެ މައްޗަށް ޝައްކެއް ނެތް މިންވަރަށް ސާބިތުވާ ކަމަށެވެ.
ޑައިމޯފިން ނުވަތަ ކެނެބިސް ޓްރެފިކް ކުރަން އުޅުމަކީ، އަދި އެ ފަދަ ކަމެއްގައި އެއްވެސް ގޮތަކަށް ބައިވެރިވުމަކީ ވެސް ކުށެކެވެ.
ޑައިމޯފިން ޓްރެފިކުކޮށްފި ނަމަ، އުމުރު ދުވަހަށް (25 އަހަރަށް) ޖަލަށްލުމާއެކު، 100،000އިން ފެށިގެން 10،000،000 ރުފިޔާއާ ދެމެދު ޖޫރިމަނާ ކުރެވޭނެއެވެ.
އެހެންކަމުން އޭނާގެ މައްޗަށް ކޯޓުން އިއްވީ 25 އަހަރުގެ ޖަލުހުކުމަކާއެކު، 100،000 ރުފިޔާގެ ޖޫރިމަނާއެކެވެ.
ނަމަވެސް، ޖިނާއީ އިޖުރާއަތުގެ ގާނޫނަށް ރިއާޔަތްކޮށް، އޭނާ ބަންދުގައި ހުރި މުއްދަތު ޖަލު އަބަދުން އުނި ކުރުމުން އޭނާ ތަންފީޒުކުރަން ޖެހޭނީ 24 އަހަރާއި ނުވަ މަހާއި 12 ދުވަހުގެ ޖަލު ހުކުމެކެވެ.