ގައިދީއަކަށް މަސްތުވާތަކެތި ފޯރުކޮށްދިނުމަށް މަސައްކަތްކުރިކަމުގެ ތުހުމަތުވާ އަންހެން މީހާގެ މައްޗަށް އެއްވެސް ހެއްކެއް ނެތުމުގެ ސަބަބުން ބަންދުން ދޫކޮށްލުމަށް ކްރިމިނަލް ކޯޓުން އިއްޔެ ހުކުމްކޮށްފިއެވެ.
މި މައްސަލައިގައި ތުހުމަތުކުރެވޭ އަންހެން މީހާއަކީ އުމުރުން 50 އަހަރުގެ ފާތިމަތު ނުޒުހާ، ސަލްޓަންވިލާ، ސ. މަރަދޫއެވެ.
އޭނާގެ މައްޗަށް ކުރަނީ މަސްތުވާތަކެތި ބޭނުންކޮށް، ގެންގުޅެ، އެ ތަކެތީގެ ވިޔަފާރިކުރުމުގެ ތުހުމަތެވެ.
ކްރިމިނަލް ކޯޓުގެ އަމުރުގައި ބުނެފައިވާ ގޮތުގައި އަންހެން މީހާ އެންމެ ފުރަތަމަ ހައްޔަރުކޮށްފައިވަނީ އިޖުރާއަތާއި އެއްގޮތަށް ކަމަށް ކަނޑައަޅާފައެވެ.
ފުލުހުން ތުހުމަތު ކުރަނީ ގައިދީއަކަށް އެ އަންހެން މީހާ މަސްތުވާތަކެތި ފޯރުކޮށްދިނުމަށް މަސައްކަތްކުރިކަމަށް ކަމަށް ކޯޓު އަމުރުގައިވެއެވެ. ނަމަވެސް، އެ ކަމަށް ބާރު ލިބޭ އެއްވެސް ހެއްކެއް ހުށަހެޅިފައިނުވާ ކަމަށް އަމުރުގައި ވަނީ ބުނެފައެވެ.
އެހެންކަމުން އޭނާ ބަންދުން ދޫކޮށްލުމަށް ކޯޓުން ވަނީ އަމުރުކޮށްފައެވެ.
މަސްތުވާތަކެތީގެ މައްސަލަތަކަކީ ރާއްޖޭގައި ވަރަށް ބޮޑުވެފައިވާ މައްސަލައެކެވެ. ޚާއްސަގޮތެއްގައި ޖަލުތަކުގައި ބޮޑެތި ޑްރަގް ނެޓްވޯކްތައް މީގެ ކުރިން ހިންގާފައިވާކަން ފާހަގަކޮށްލެވެއެވެ. އެގޮތުން، ފާއިތުވެ ދިޔަ އަހަރު ތެރޭގައި ވެސް އެފަދަ ޑްރަގް ބޮޑު ނެޓްވޯކެއް މާފުށި ޖަލުން އަތުލައިގެންފައިވެއެވެ.