އިންޓަނޭޝަނަލް ކޮންފަރެންސް އޮން އިނޮވޭޝަންސް އިން އިންޖިނިއަރިން، ސައިންސް އެންޑް ޓެކްނޮލޮޖީ ފޯ ސަސްޓެއިނަބަލް ޑެވަލޮޕްމަންޓް (އައިސީއީއެސްޓީ) 2023އަށް ހުށަހެޅި ކަރުދާސްތައް ޝާއިއުކޮށްފިއެވެ.
މި ކޮންފަރެންސަކީ މޯލްޑިވްސް ނެޝަނަލް ޔުނިވަސިޓީ (އެމްއެންޔޫ) އިން އިންތިޒާމްކޮށްގެން މިދިޔަ އަހަރުގެ ނޮވެމްބަރު މަހުގެ 15ވަނަ ދުވަހުން ފެށިގެން 17ވަނަ ދުވަހާ ހަމައަށް ބާއްވާފައިވާ ކޮންފަރެންސެކެވެ.
އެމްއެންޔޫއިން ބުނި ގޮތުގައި މި ކޮންފަރެންސްގެ މައިގަނޑު މަގުސަދަކީ އިންޖިނިއަރިންއާއި ސައިންސްގެ އިތުރުން ޓެކްނޮލޮޖީގެ ދާއިރާގައި ފުންނާބު އުސް މާހިރުން އެއްތަނަކަށް ގެނެސް ޚިޔާލުތައް ހިއްސާކޮށް މަޝްވަރާކުރުމެވެ. އަދި އެ މަޝްވަރާތަކުގައި އިސްކަންދީފައިވާނީ ދެމެހެއްޓެނިވި ތަރައްގީއަށް ކަމަށް އެމްއެންޔޫއިން ބުންޏެވެ.
މި ކޮންފަރެންސަށް 86 ހުށަހެޅުން ލިބިފައިވާއިރު އެ ހުށަހެޅުންތަކުގެ ތެރެއިން 78 ކަރުދާސް ވަނީ ފާސްވެފައެވެ. އަދި ހުށަހަޅާފައިވާ 38 ލިޔުންތަކުގެ ތެރެއިން 35 ލިޔުން ޝާއިއުކުރުމަށް ވަނީ ބަލައިގެންފައެވެ.
ހަމައެއާއެކު 60 ޕްރެޒެންޓޭޝަން ކޮންފަރެންސްގައި ހުށަހަޅާފައިވާއިރު، އޭގެތެރެއިން 34 ޕްރެޒެންޓޭޝަން ހުށަހަޅާފައިވަނީ އެމްއެންޔޫގެ ސްޓާފުންނާއި ދަރިވަރުންނެވެ.
އެމްއެންޔޫއިން ބުނީ ޝާއިއުކުރުމަށް ބަލައިގަތް 35 ކަރުދާހުގެ ތެރެއިން 19 ކަރުދާހަކީ އެމްއެންޔޫގެ މުވައްޒަފުންނާއި ދަރިވަރުން ލިޔެފައިވާ ކަރުދާސްތަކެއްކަމަށެވެ.
އަދި އެ ހުރިހާ ކަރުދާހެއް މިހާރު އޭއައިޕީ ޕަބްލިޝިން ޕްލެޓްފޯމްގައި ޝާއިއުކޮށްފައިވާކަމަށް އެމްއެންޔޫއިން ބުންޏެވެ.