ގައުމީ ޔުނިވާސިޓީ (އެމްއެންޔޫ)އިން އަންނަ އަހަރު ބާއްވާ ތެވެލި ބައިނަލްއަގުވާމީ ކޮންފަރެންސަށް އެބްސްޓްރެކްޓް ހުށަހެޅުމުގެ ފުރުސަތު ހުޅުވާލައިފިއެވެ.
އެމްއެންޔޫއިން ކޮންމެ އަހަރަކު ވެސް ތެވެލި ކޮންފަރެންސް ބާއްވަމުން އަންނައިރު، އަންނަ އަހަރުގެ ތީމަކީ 'އިވޯލްވިން ޕެރެޑައިމްސް: މާޖިން ރިސާޗް، އެވިޑެންސް، އެންޑް ޕްރެކްޓިސް' އެވެ. އެ ކޮންފަރެންސް ބާއްވާނީ އަންނަ އޮގަސްޓު މަހުގެ 18އިން 20އަށެވެ.
އެމްއެންޔޫއިން ބުނެފައިވާ ގޮތުގައި، ތެވެލި ކޮންފަރެންސްގެ ބޭނުމަކީ އައު އިލްމީ ހޯދުންތަކުގެ 'އަލިކަން' ނުވަތަ 'ތެވެލި' ރާއްޖޭގެ އިތުރުން މި ސަރަހައްދުގެ ގައުމުތަކަށާއި މުޅި ދުނިޔެއަށް ފެތުރުމެވެ. އެހެންވެ، އެ ކޮންފަރެންސްގެ މައިގަނޑު މަގުސަދުތަކުގެ ތެރޭގައި:
- ދިރާސާ ކުރާ ފަރާތްތަކަށާއި ދިރާސާގެ އަލީގައި ހޯދާ ހޯދުންތައް ހުށަހެޅުމަށް ފުރުސަތު ދިނުން
- އެފަދަ ސަގާފަތެއް ދަރިވަރުންގެ މެދުގައި އަށަގެންނެވުން
- ދިރާސާ ކުރާ ފަރާތްތަކާއި ބޭރުގެ ފުންނާބު އުސް ދިރާސާ ވެރިންނާ އެއް ޕްލެޓްފޯމަކަށް ގެނެސް ގުޅުވައިދީ ދިރާސާ ކުރުމުގެ އާ ގޮތްތަކާއި އާ ޚިޔާލުތަކަށް ފުރުސަތު ހުޅުވުމަށް މަގުފަހިކުރުން
އެމްއެންއެޔޫއިން ތެވެލި ކޮންފަރެންސް ބާއްވަން ފެށީ 2017ގައެވެ. އެ ކޮންފަރެންސްގައި ރާއްޖެއިންނާއި އެހެން ގައުމުތަކުން ބައިވެރިވާ މީހުންގެ އަަދަދު އަހަރުން އަހަރަށް އިތުރުވަމުންދާ ކަމާއި އެއީ މި ކޮންފަރެންސްގެ ކާމިޔާބީ ދައްކުވައިދޭ ކަމެއް ކަމަށް އެމްއެންޔޫއިން ބުނެއެވެ.
އެ ޔުނިވާސިޓީން ބުނީ، އެހެން އަހަރުތަކާ ޚިލާފަށް، އަންނަ އަހަރު އެމްއެންޔޫގައި ބެޗެލާސް ޑިގްރީ ކިޔަވާ ހުރިހާ ދަރިވަރުންނަށް ޚާއްސަކޮށްގެން ދަރިވަރުންގެ މެދުގައި ދިރާސާކޮށް، ސައިންޓިފިކް ޕޭޕަރު ލިޔުމާއި ސައިންޓިފިކް ޕްލްޓްފޯމްތަކުގައި ދިރާސާގެ އަލީގައި ހޯދާ ހޯދުންތައް ހުށަހެޅުމުގެ ގާބިލްކަން އިތުރު ކުރުމަށް ޓަކައި "ސްޓޫޑަންޓް ރިސާޗް ސިމްޕޯޒިއަމް"އެއްވެސް ބޭއްވުމަށް ހަމަޖެހިފައިވާ ކަމަށެވެ.
އެ ސިމްޕޯޒިއަމް އޮންނާނީ ކޮންފަރެންސްގެ ފުރަތަމަ ދުވަސް ކަމަށްވާ، އޮގަސްޓު މަހުގެ 18ގައެވެ. އަދި ކޮންފަރެންސްގެ ކީނޯޓް ސްޕީކާސް ވާހަކަދައްކަވާނީ އެ މަހުގެ 21ގައެވެ.
އެ ކޮންފަރެންސްގައި އެކި ދާއިރާތަކުން އިނގިރޭސި، ދިވެހި އަދި އަރަބި ބަހުން ޕޭޕަރު ހުށަހެޅޭނެއެވެ. އޭގެ ތެރެއިން 'އައުޓް ސްޓޭޑިން ޕޭޕާ' އާއި "އާލީ ކެރިއާ ރިސާޗާ" އެވޯޑު ހޮވާނެއެވެ.
މީގެ އިތުރުން ސްޓޫޑެންޓް ރިސާޗް ސިމްޕޯޒިއަމްއިން 'އަންޑަގްރެޖުއޭޓް ރިސާޗް އެކްސެލެންސް' އާއި 'ބެސްޓް ފެކަލްޓީ އޮވޯޑް' ވެސް ހޮވާނެއެވެ. އެ އެވޯޑުތައް ހޮވުމުގައި ބަލާނެ މިންގަނޑުތަކާއި އެއާ ގުޅޭ އިތުރު މައުލޫމާތު އެމްއެންޔޫގެ ''ތެވެލި އިންޓަނޭޝަނަލް ކޮންފަރެންސް 2025" ވެބްސައިޓުން ލިބޭނެއެެވެ.
ސްޓޫޑެންޓް ރިސާޗް ސިމްޕޯޒިއަމްގެ އެބްސްޓްރެކްޓް ބުކް އަދި ތެވެލި 2025ގެ އެބްސްޓްރެކްޓް ބުކް ތެވެލި އިންޓަނޭޝަނަލް ކޮންފަރެންސް 2025 ވެބްސައިޓުގައި ޝާއިއު ކުރާނެއެވެ.
މީގެ އިތުރުން މޯލްޑިވްސް ނެޝަނަލް ޖާނަލް އޮފް ރިސާޗްގެ ތެވެލި ސްޕެޝަލް އިޝޫގައި އެވޯޑްތަކަށް ހޮވޭ ކަރުދާސްތައް ޕަބްލިޝް ކުރާނެއެވެ. ކޮންފަރެންސަށް ހުށަހަޅާ ކަރުދާސްތައް އެ ޖާނަލްގެ އެހެން އިޝޫތަކުގައި ޕަބްލިޝް ކުރުމުގެ ފުރުސަތު އޮންނާނެއެވެ.
ކޮންފަރެންސްގެ ސުންގަޑިތައް:
• އެބްސްޓްރެކްޓް ހުށަހެޅުމުގެ އެންމެ ފަހު ތާރީޚު: 31 މޭ 2025
• ފުލް ޕޭޕަ ހުށަހެޅުމުގެ އެންމެ ފަހު ތާރީޚު: 30 ޖޫން 2025
• ޕްރެޒެންޓޭޝަންތައް ފޮނުވުމުގެ އެންމެ ފަހު ތާރީޚު: 31 ޖުލައި 2025
• ގައިޑްލައިންއާ އެއްގޮތަށް ތައްޔާރުކޮށް ޕްރިންޓްކޮށްފައިވާ ޕޯސްޓަރުތައް މައުންޓް ކުރުމަށްޓަކައި ރިސާޗް ޑިވްލޮޕްމަންޓް އޮފީހާ ހަވާލުކުރާ އެންމެ ފަހު ތާރީޚު: 13 އޮގަސްޓް 2025
• ޕޯސްޓް ކޮންފަރެންސް ސެޝަންތަކުގައި ބައިވެރިވުމަށް ރެޖިސްޓާ ވުމަށް ހުޅުވާލުން: 5 ޖުލައި 2025
• ޕޯސްޓް ކޮންފަރެންސްގައި ބައިވެރިވުމަށް ރެޖިސްޓާ ވުމުގެ އެންމެ ފަހު ތާރީޚު: 5 އޮގަސްޓް 2025
ކޮންފަރެންސާ ގުޅޭ އިތުރު މައުލޫމާތު ވެބްސައިޓުގެ އިތުރުން، 3345424އަށް ގުޅުމުންނާއި، [email protected] އަށް މެއިލް ކުރުމުން ލިބޭނެއެވެ.