ސްޕެނިޝް ލަލީގާގެ އެފްސީ ބާސެލޯނާއަށް މި ފަހުން ކުޅުނު ޖަރުމަނުވިލާތުގެ އިލްކާއި ގުންޑޮގާން އިންގްލިޝް ޕްރިމިއާ ލީގުގެ ޗެމްޕިއަން މެންޗެސްޓާ ސިޓީއަށް އެނބުރި އަތުވެއްޖެއެވެ.
ސިޓީއިން ގުންޑޮގާން އެ ޓީމަށް ގެންގޮސްފައިވަނީ އެއް އަހަރު ދުވަހުގެ އެއްބަސްވުމެއްގެ ދަށުންނެވެ.
ގުންޑޮގާންއަކީ ސިޓީގެ އެންމެ ކާމިޔާބު ސީޒަން ކަމަށްވާ 2022-2023 ގައި އެ ޓީމުގެ ކެޕްޓަންއެވެ.
އެ ސީޒަންގައި ސިޓީއިން ވަނީ އިންގްލިޝް ޕްރިމިއާ ލީގާއި އެފް އޭ ކަޕްގެ އިތުރުން ޔުއޭފާ ޗެމްޕިއަންސް ލީގު ކާމިޔާބު ކޮށްފައެވެ. ނަމަވެސް މި ތާރީހީ ސީޒަން ނިމުނުތާ 16 ދުވަސް ތެރޭ ގުންޑޮގާން ވަނީ ބާސާއަށް ބަދަލުވެފައެވެ. ގުންޑޮގާން ބާސާ ހޭދަކުރި ސީޒަންގައި އޭނާވަނީ 51 މެޗު އެ ޓީމަށް ކުޅެދީފައެވެ.
ބާސާއަށް ބަދަލުވުމުގެ ކުރިން ގުންޑޮގާން ވަނީ ސިޓީގައި ކާމިޔާބު ހަތް ސީޒަން ހޭދަކޮށްފައެވެ. މިގޮތުން އެ ހަތް ސީޒަންގައި ސިޓީއަށް ކުޅުނު 304 މެޗުގައި 60 ލަނޑު ޖެހުމުގެ އިތުރުން އޭނާ ވަނީ ޕްރިމިއާ ލީގު ފަސް ފަހަރު، އެފް އޭ ކަޕް ދެ ފަހަރު، ލީގު ކަޕް ހަތަރު ފަހަރު، ކޮމިއުނިޓީ ޝީލްޑް ދެ ފަހަރު އަދި ޗެމްޕިއަންސް ލީގު އެއް ފަހަރު ކާމިޔާބު ކޮށްފައެވެ.
އުމުރުން 33 އަހަރުގެ ގުންޑޮގާން ސިޓީއަށް ބަދަލުވުމަށްފަހު ވާހަކަ ދައްކަމުން ބުނީ އެނބުރި ސިޓީއަށް އާދެވުމަކީ ވަރަށް ބޮޑު އުފަލެއް ކަމަށެވެ.
ގުންޑޮގާން ހާމަކުރިގޮތުގައި އޭނާ ސިޓީގައި ހޭދަކުރި ހަތް ސީޒަނަކީ ވަރަށް ފާހަގަ ކޮށްލެވޭ ދުވަސްތަކެކެވެ. އަދި ސިޓީގެ ކޯޗު ޕެޕް ގާޑިއޯލާއަކީ އެންމެ މޮޅު ކޯޗު ކަމަށާއި ޕެޕްއަށް ގުންޑޮގާން ކުރާ އިހްތިރާމް އެންމެންނަށް ވެސް އޭނގޭނެ ކަމަށެވެ. އަދި އެފަދަ ކޯޗެއްގެ ދަށުން މަސައްކަތް ކުރުމުގެ ފުރުސަތު އަލުން ލިބުމުން ވަރަށް ހިތްހަމަ ޖެހޭކަމަށް ވެސް ގުންޑޮގާން ހާމަކުރިއެވެ. އަދި ސިޓީގެ ޖާޒީގައި އަލުން ކުޅެލުމަށް ކެތް މަދުވެފައިވާކަމަށް އޭނާ ހާމަކުރިއެވެ.
ގުންޑޮގާން ވެފައިވަނީ ސިޓީގެ ކޯޗު ކަމާ ޕެޕް ހަވާލުވުމަށްފަހު އޭނާ އެ ޓީމަށް ގެނައި ފުރަތަމަ ކުޅުންތެރިޔާ އަށެވެ. ސިޓީގެ މެނޭޖުމަނުންޓުން ހާމަކުރާގޮތުގައި ގުންޑޮގާން ފަދަ ތަޖުރިބާކާރު ކުޅުންތެރިއެއް އަނބުރާ ސިޓީއަށް ގެނެވުން މިއީ އެ ޓީމަށް ލިބިގެންދިޔަ އިތުރު ކުރިއެރުމެކެވެ.