އޮންލައިން ޑިގްރީ ކޯސްތަކެއް ހިންގާކަމަށް ބުނެ ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ)ގެ ނަމުގައި ސްކޭމެއް ކުރިއަށް ގެންދާތީ އެކަމަށް ސަމާލުވުމަށް އެ ޔުނިވާސިޓީއިން އެދިއްޖެއެވެ.
މި ސްކޭމް ހިންގަމުން އަންނަނީ 18 އަހަރުން މަތީގެ ކޮންމެ ދިވެއްސަކަށް ބައިވެރިވެވޭ ގޮތަށް، އޯގަސްޓް މަހުގެ އެއް ވަނަ ދުވަހުން ފެށިގެން އޮންލައިންކޮށް ޑިގްރީ ޕްރޮގްރާމެއް ފެށުމަށް ނިންމާފައިވާ ކަމަށް ބުނެއެވެ.
މި ކޯހަކީ ސަރުކާރާއި އެމްއެންޔޫ ގުޅިގެން ހިލޭ ކުރިއަށް ގެންދާ ކޯހެއް ކަމަށް ވެސް ސްކޭމްގައި ބުނެފައިވެއެވެ.
އެމްއެންޔޫއިން ބުނީ އޮންލައިން ޑިގްރީ ޕްރޮގްރާމެއް ހިންގާ ކަމަށް ބުނެ ދައުރު ކުރާ ޕޮސްޓްތަކަކީ ސްކޭމެއް ކަމަށެވެ. އަދި އެ ޔުނިވާސިޓީގެ ރަސްމީ ވެބްސައިޓް މެދުވެރިކޮށް ހިއްސާކުރާ ކޯސްތަކަށް އެކަނި އިތުބާރުކުރުމަށް އެމްއެންޔޫއިން އެދެއެވެ.
އާއްމުކޮށް މިފަދަ ސްކޭމްތައް ހިންގަނީ މީހުންގެ ފައިސާ ފޭރުމަށްޓަކައި ޒާތީ މައުލޫމާތުތައް ހޯދުމުގެ ބޭނުމުގައެވެ.
ސްކޭމްތައް ރާއްޖޭގައި ހިންގުން ވަނީ ވަރަށް ބޮޑަށް އިތުރުވެފައެވެ. އެފަދަ ސްކޭމްތަކުގައި އޮޅުވާލައިގެން އެތައް ބައެއްގެ އަތުން ފޭރިފައި ވެސް އެބަހުއްޓެވެ.
ތަފާތު ލިންކްތައް ފޮނުވައިގެން މީހުންގެ އެކައުންޓްތައް ހެކް ކުރުމަކީ ވެސް ވަރަށް އާއްމު ކަމެކެވެ.