ޕްރޮސެކިއުޓާ ޖެނެރަލް (ޕީޖީ) ޙުސައިން ޝަމީމް މަގާމުން ވަކި ކުރުމަށް ސަރުކާރުން ނިންމުމުން އިދިކޮޅު އެމްޑީޕީން އެ ކަން ކުށްވެރިކޮށްފިއެވެ.
ޝަމީމް އިސްތިއުފާ ދެއްވީ، ރައްޔިތުންގެ މަޖިލީހުގެ ޖުޑިޝަރީ ކޮމިޓީން އޭނާ ވަކިކުރުމަށް ނިންމުމާ ގުޅިގެން، އެ ކަން ތަޅުމުން ފާސްކުރަން މިރޭ ޖަލްސާ ފެށުމާއެކުގައެވެ. ނަމަވެސް އިސްތިއުފާ ސިޓީ ރައީސް އޮފީހަށް ނުލިބޭކަން މަޖިލީހަށް ކަށަވަރުވުމުން ވޯޓަށް އަހައި ޝަމީމް ވަކިކުރީއެވެ.
ޝަމީމް މަގާމުން ވަކި ކުރުމަށް ސަރުކާރުން ނިންމި ނިންމުން ކުށްވެރިކޮށް އެމްޑީޕީން ނެރުނު ބަޔާނުގައި ވަނީ މަޖިލީހުގެ ޖުޑިޝަރީ ކޮމިޓީގައި ކުރިއަށް ދިޔަ ބައްދަލުވުމަކީ މަޖިލީހުގެ ގަވާއިދާ ޚިލާފަށް ކުރިއަށް ގެންދިޔަ ބައްދަލުވުމެއް ކަމަށެވެ.
މަޖިލިސް ގަވާއިދު ބަޔާންކުރާ ގޮތުން، މަޖިލީހުގެ ކޮމިޓީއަކުން އެ ކޮމިޓީއެއްގެ ބައްދަލުވުމެއް ސިއްރު ބައްދަލުވުމެއްގެ ގޮތުގައި ނިންމޭނީ އެ ގަވާއިދުގައި ބަޔާންކުރާ ސަބަބުތަކުންކުރެ ސަބަބަކަށް އެ ބައްދުލުވުމެއް ފެތޭ ނަމަކަން، ބަޔާނުގައި ފާހަގަކޮށްފައިވެއެވެ.
އެހެން ނަމަވެސް، އެ ކޮމިޓީގެ ބައްދަލުވުން ސިއްރު ކުރުމަށް ކޮމިޓީގެ މުގައްރިރު ނިންމެވީ މަޖިލީހުގެ ގަވާއިދުގެ 46 ވަނަ މާއްދާގައި ކޮމިޓީއެއް ސިއްރުކުރެވޭނެ ކަމަށް ބަޔާންކޮށްފައިވާ އެއްވެސް ސަބަބެއް މެދުވެރިވެފައި ނުވަނީސް ކަމަށާއި، ޕީޖީ ވަކިކުރަށް ޖުޑިޝަރީ ކޮމިޓީން ނިންމި ރިޕޯޓުން ވެސް އެ ކޮމިޓީގެ ބައްދަލުވުން ސިއްރުކުރަން ނިންމި ސަބަބެއް އެނގެން ނެތްކަން އެ ބަޔާނުގައިވަނީ ފާހަގަ ކޮށްފައެވެ.
ޝަމީމުގެ މައްޗަށް ޕީޕީއެމް ޕީއެންސީގެ މަޖިލިސް މެމްބަރުން އާންމުކޮށް ކުރައްވަމުންގެންދެވި ތުހުމަތުތަކަށް ޖަވާބުދާރީވުމަށް އާއްމުންނަށް ހުޅުވާލައިގެން ކޮމިޓީ ބާއްވައިދިނުމަށް އޭނާ ތަކުރާރުކޮށް އެދިވަޑައިގަތެވެ.
އެހެން ނަމަވެސް ކުއްލި ގޮތަކަށް ޖުޑިޝަރީ ކޮމިޓީގެ އެ ބައްދަލުވުން ސިއްރުކުރުމަށް މަޖިލީހުގެ ގަވާއިދާ ޚިލާފަށް އެ ކޮމިޓީން ނިންމި ނިންމުމަކީ ޑިމޮކްރެޓިކް ހަމަތަކާ ޚިލާފަށް، އަދި ޑިއު ޕްރޮސަސްއަށް ޖާގަނުދީ، ބަންދު ކޮޓަރިއެއްގައި އަވަސް އަރުވާލައިގެން ނިންމާފާއިވާ ނިންމުމެއް ކަމަށް އެމްޑީޕީންވަނީ ތުހުމަތުކޮށްފައެވެ.
ރައްޔިތުންގެ މަޖިލީހުގެ ކޮމިޓީތަކުން، މިފަދައިން، އިޖުރާއީ އަދުލުވެރިކަމަށް ޖާގަނުދީ، މިނިވަން މުއައްސާތަކުގައި ތިއްބެވި ބޭފުޅުން ވަކިކުރަމުން ގެންދާ ކަމަށްބުނެ، އެމްޑީޕީން ވަނީ ކަންބޮޑުވުން ފާޅުކޮށްފައެވެ.
އެމްޑީޕީގެ ބަޔާނުގައިވަނީ ޕީޕީއެމް ޕީއެންސީގެ ސުޕަ މެޖޯރިޓީ އޮންނަ މަޖިލީހުން ޕްރޮސެކިއުޓާ ޖެނަރަލްގެ ޝަމީމު ކުއްލިގޮތަކަށް ވަކިކުރުމަކީ ގާނޫނު އަސާސީއާއި ދިމާ އިދިކޮޅަށް ކޮށްފައިވާ ކަމެއް ކަމަށެވެ. އަދި މަޖިލީހުގެ ގަވާއިދާ ވެސް ޚިލާފަށް ކޮށްފައިވާ މަސައްކަތެއް ކަމަށެވެ.