މާލޭ އާސަހަރާގެ މަސައްކަތް މިހާރު ވަނީ ނިމުމަކަ ގާތްވެފައި ކަމަށް ސިޓީ ކައުންސިލުން ބުނެފިއެވެ.
މިކަމާ ގުޅިގެން "ސަން" އަށް މައުލޫމާތު ދެއްވަމުން ސިޓީ ކައުންސިލްގެ މީޑިއާ އޮފިޝަލް ވިދާޅުވީ، މިހާރު ކުރިއަށްދަނީ އާސަހަރާގެ އެންމެ ފަހުގެ ފިނިޝިން މަސައްކަތް ކަމަށާއި އެ މަސައްކަތްތައް ވަރަށް ހަލުވި ކަމާއެކު ބާރު ސްޕީޑުގައި ކުރިއަށް ދާކަމަށެވެ.
"އަސްލު ވިއްސާރައާއެކު ކުޑަ ޑިލޭއެއް އައި މަސައްކަތަށް. މިހާރު ފިނިޝިންގެ މަސައްކަތް ވަރަށް ބާރަށް ހަމަ ކުރިއަށްދޭއެބަ." މީޑިއާ އޮފިޝަލް ބުންޏެވެ.
އާސަހަރާ މިސްކިތުގެ މަސައްކަތް ނިމޭއިރު 3,200 އަކަފޫޓު މިސްކިތަށް އިތުރު ކުރެވިގެންދާނެ ކަމަށާއި އަންހެނުންނަށް ޚާއްސަ ފާހާނާއަކާއި ނަމާދު ކުރާ ބައެއްގެ އިތުރުން، ޖަނާޒާތަކަށް އަންނަ މީހުންނަށް މަޑުކޮށްލެވޭނެ ހާއްސަ ސަރަހައްދެއް ތަރައްޤީ ކުރެވޭނެ ކަމަށް ސިޓީ ކައުންސިލުން ވަނީ ބުނެފައެވެ.
އަދި އާސަހަރާގެ މަސައްކަތް މި ހިނގާ އޮގަސްޓުމަހުގެ ނިޔަލަށް ނިންމާލެވޭނެކަމަށް މީގެ ކުރިން މާލެ ސިޓީގެ މޭޔަރު އާދަމް އާޒިމް ވަނީ ބުނެފައެވެ.
އާސަހަރާގެ މަސައްކަތް ކުރިއަށްދާގޮތުގެ އެންމެ ފަހުގެ މައުލޫމާތު ހިއްސާކުރަން އެ ތަނުގައި ބޭއްވި ނޫސްވެރިންގެ ބައްދަލުވުމެއްގައި މޭޔަރު އާޒިމް އޭރު ވިދާޅުވީ، އާސަހަރާގެ މަސައްކަތް ނިންމަން ބޮޑު ހޭދައެއް ކުރަން ޖެހުނު ކަމަށެވެ.
އެގޮތުން، އާސަހަރާގެ މަސައްކަތްކުރަން ފުރަތަމަ ހަވާލުކުރި ކުންފުންޏަށް ތިން މިލިއަނަށް ވުރެ ގިނަ ރުފިޔާ ޚަރަދުކުރިކަމަށާއި ދެވަނައަށް ހަވާލުކުރި ކުންފުންޏަށް ވެސް ހަމަ އެ މަސައްކަތްކުރަން ފަސް މިލިއަން ރުފިޔާ ހޭދަވި ކަމަށް މޭޔަރު ވިދާޅުވިއެވެ. އަދި، ފިނިޝިން މަސައްކަތްކުރަން ހައިމަން ކޮންސްޓްރަކްޝަން ޕްރައިވެޓް ލިމިޓެޑާ ހަވާލުކުރީ 2.7 މިލިއަން ރުފިޔާއަށް ކަމަށް މޭޔަރު ވިދާޅުވިއެވެ.
މޭޔަރު އޭރު ވިދާޅުވީ، އާސަހަރާގެ މަސައްކަތް ނިންމުމުގައި ލަސްތަކެއް ދިމާވަނީ ސަހަރާގެ މުޅި ކުރެހުން އެއްކޮށް ނުނިމެނީސް މަސައްކަތް ފެށުމުން ކަމަށެވެ. އެހެންވެ، ކުރެހުމަށް ބައެއް ބަދަލުތައް ގެނެސްގެން މަސައްކަތްތައް ކުރަން ޖެހުމުން ކޮންޓްރެކްޓަރަށް ވެސް މަސައްކަތްތައް ނިންމުމުގައި ދަތިތައް ދިމާވި ކަމަށް އޭނާ ވަނީ މީގެ ކުރިން ވިދާޅުވެފައެވެ.
އާސަހަރާގެ އިތުރުން މާލެ ސިޓީ ކައުންސިލްގެ ބެލުމުގެ ދަށުގައިވާ މިސްކިތްތަކުގައި ކުރަންޖެހޭ މަރާމާތުގެ މަސައްކަތްކޮށް އެ ތަންތަނުގެ ހާލަތު ސިޓީ ކައުންސިލުން ގެންދަނީ ވާރަށް ގާތުން ބަލަމުންނެވެ.