ބަތަލާ ކަރީނާ ކަޕޫރު ޑިޓެކްޓިވްއެއްގެ ރޯލް ކުޅެފައިވާ ތުރިލާ ފިލްމު "ދަ ބަކިންގްހަމް މާޑާސް"ގެ ޓްރެއިލާ ދައްކާލައިފިއެވެ.
ބްރިޓިޝް ފިލްމު އިންސްޓިޓިއުޓް (ބީއެފްއައި) ލަންޑަން ފިލްމު ފެސްޓިވަލުގައި މިދިޔަ އަހަރު ޕްރިމިއާކޮށްފައިވާ "ދަ ބަކިންގްހަމް މާޑާސް"އަކީ ރިލީޒްކުރާނެ ތާރީޚަކަށް ވަރަށް ގިނަ ބަޔަކު އިންތިޒާރު ކުރަމުން އަންނަ ފިލްމެކެވެ.
ޚާއްސަކޮށް މިދިޔަ އަހަރު ރިލީޒްކުރި ކަރީނާގެ ފުރަތަމަ އޯޓީޓީ ފިލްމު "ޖާނެ ޖާން"އަށް ފަހު ބަތަލާގެ އިތުރު ތުރިލާ/މިސްޓްރީ ފިލްމަކަށް ވަރަށް ގިނަ ބެލުންތެރިން އައީ އިންތިޒާރު ކުރަމުންނެވެ. މި ފިލްމުގައި ކަރީނާ ފެންނާނީ އިނގިރޭސިވިލާތުގެ ބަކިންގްހަމްޝަޔަގައި ގެއްލިގެން ހޯދާ ޢުމުރުން 10 އަހަރުގެ ކުއްޖަކު ހޯދުމަށް މަސައްކަތްކުރާ ޑިޓެކްޓިވްއެއްގެ ރޯލުންނެވެ.
ކަރީނާ ކަޕޫރު ފިލްމު "ދަ ބަކިންގްހަމް މާޑާސް"ގެ ކާސްޓުންނާއެކު--ފޮޓޯ/ބޮލީވުޑްހަންގާމާ
ކަރީނާއަށް އެ މައްސަލައިގެ ތަހުގީގު ހިންގުމަށް ހަވާލުކުރެވެނީ އަމިއްލަ ދަރިފުޅު ގެއްލި އެކަމުގެ ހިތާމައިގެ އުޅުނު ދަނޑިވަޅުގައިކަމުން ނަފުސާނީގޮތުން ބަތަލާއަށް ދިމާވާ ގޮންޖެހުންތައް ފިލްމުގައި ދައްކުވައިދޭނެއެވެ.
ކަރީނާ ކަޕޫރު ޕްރޮޑިއުސަރެއްގެ ގޮތުގައި އަލަށް މަސައްކަތްކުރި މި ފިލްމަކީ، އެކްތާ ކަޕޫރުގެ ބާލާޖީ ޓެލެފިލްމްސްއާ އިތުރު ދެ ފިލްމު ކުންފުންޏަކާ ގުޅިގެން ގެނެސްދޭ ފިލްމެކެވެ. ހަންސަލް މެހެތާ ޑައިރެކްޓްކޮށްފައިވާ މި ފިލްމު ސިނަމާތަކުގައި ދައްކަން ފަށާނީ ކުރިއަށް އޮތް ސެޕްޓެމްބަރު މަހުގެ 13 ވަނަ ދުވަހުއެވެ. ކަރީނާގެ އިތުރުން ފިލްމުގެ ކާސްޓުގައި ސެލެބްރިޓީ ޝެފް ރަންވީރު ބްރާ، އޭޝް ޓަންޑަން އަދި އައްސަދު ރާޖާ ހިމެނެއެވެ.