ރާއްޖޭގެ ލާމަރުކަޒީ ނިޒާމަށް ގެންނަންޖެހޭ ބަދަލުތައް ދެނެގަތުމަށް ސިޓީތަކާއި އިދާރީ ހިންގުންތަކާ ބެހޭ ވަޒީރު އާދަމް ޝަރީފް އުމަރު މއ. ބޯގަންވިލާ އިބްރާހީމް އިސްމާއީލް (އިބުރާ)އާ މިއަދު ބައްދަލުކުރައްވައިފިއެވެ.
މިކަމަ ގުޅިގެން އެ ވުޒާރާއިން އެކްސްގައި ކޮށްފައިވާ ޕޯސްޓެއްގައި ވަނީ ވަޒީރު އާދަމް ޝަރީފް އިބުރާ ބައްދަލު ކުރައްވާފައި ވާކަމަށެވެ.
https://x.com/MoCLPmv/status/1825950261183132053
މިއަދު ހަވީރު އިބުރާގެ ގޭގައި އޮތް މި ބައްދަލުވުމުގައި އެ ވުޒާރާގެ ސްޓޭޓް މިނިސްޓަރު މޫސާ ފަތުހީ އާދަމާއި، މުހައްމަދު ހާޝިމާއި، މުހައްމަދު މާހިރު ބައިވެރިވެ ވަޑައިގެންފައި ވާކަމަށް ވަނީ ވިދާޅުވެފައެވެ.
ވަޒީރު އާދަމް ޝަރީފް އިބުރާ ބައްދަލު ކުރެއްވުން--- ފޮޓޯ/ ލޯކަލް ގަވަމެންޓް މިނިސްޓްރީ
އިބުރާ އަކީ ލާމަރުކަޒީ ނިޒާމު އެންމެ ފުރަތަމަ އެކުލަވައިލުމުގައި އެންމެ އިސްކޮށް މަސައްކަތްކުރެއްވި ބޭފުޅުންގެ ތެރޭގައި ހިމެނި ވަޑައިގަންނަވައި ބޭފުޅެކެވެ.
އެމްޑީޕީ އުފެއްދުމުގެ މަސައްކަތްތަކުގައި އިބްރާ އިސް ދައުރެއް އަދާ ކުރެއްވިއެވެ. އަދި އޭނާއަކީ އެ ޕާޓީގެ ފުރަތަމަ ރައީސް ވެސް މެއެވެ.
ނަމަވެސް ރައީސް މުޙައްމަދު ނަޝީދާ ދެމެދު އުފެދުނު ޚިޔާލު ތަފާތު ވުމެއްގެ ތެރެއިން އެ ޕާޓީން ވަކިވެ، ސޯޝަލް ލިބަރަލް ޕާޓީ (އެސްއެލްޕީ)ގެ ނަމުގައި އޭނާ ޕާޓީއެއް އުފެއްދެވިއެވެ. އިބްރާ ވަނީ 2008ވަނަ އަހަރު އެ ޕާޓީގެ ޓިކެޓުގައި އެ އަހަރުގެ ރިޔާސީ ރޭހުގައި ވެސް ވާދަ ކުރައްވާފައެވެ.
ދެވަނަ ބުރުގައި ރައީސް ނަޝީދަށް ތާއީދު ކުރައްވާ، އެ އަހަރު އިންތިޚާބު ކާމިޔާބު ކުރި ކޯލިޝަނުގެތެރޭގައި އިބްރާގެ ޕާޓީ ހިމެނުނެއެވެ. ނަމަވެސް އެ ޕާޓީ އުވާލާ އެމްޑީޕީއާ ގުޅިވަޑައިގަތުމަށްފަހު އަނެއްކާ ވެސް އެމްޑީޕީން ވަކިވެވަޑައިގަތީ މިދިޔަ އަހަރުގެ އޮގްސްޓް މަހުއެވެ.