ސައުދީ އަރަބިއްޔާއަށް ކުރައްވަމުން އަންނަ ރަސްމީ ދަތުރުފުޅުގެ ތެރެއިން ފޮރިން މިނިސްޓަރު މޫސާ ޒަމީރު، އެ ގައުމުގެ ފޮރިން މިނިސްޓަރު ޕްރިންސް ފައިސަލް ބިން ފަރްހާން އަލް-ސައުދާ މިއަދު ބައްދަލުކުރައްވައިފިއެވެ.
މިކަމާ ގުޅުވައި ފޮރިން މިނިސްޓްރީން ނެރުނު ބަޔާނެއްގައި ބުނީ، މި ބައްދަލުވުމުގައި ޒަމީރު ވަނީ، ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ސައުދީގެ ވަލީއަހުދު އަދި ބޮޑު ވަޒީރު، ޕްރިންސް މުޙައްމަދު ބިން ސަލްމާން ބިން ޢަބްދުލްޢަޒީޒަށް ފޮނުއްވި ސިޓީފުޅެއް ފޮރިން މިނިސްޓަރުގެ އަތްޕުޅަށް އަރުވާފައި ކަމަށެވެ.
އެ ބައްދަލުކުރެއްވުމުގައި، އިސްލާމްދީނުގެ މަތިވެރި އަސާސްތަކުގެ މައްޗަށް ބިނާވެފައިވާ ދެ ގައުމުގެ ގުޅުން އިތުރަށް ބަދަހިކުރުމަށާއި އިގްތިސާދީ ރޮނގުންނާއި ބައިނަލްއަގްވާމީ މަސްރަހުގައި މި ގުޅުން އިތުރަށް ހަރުދަނާކުރުމާ ގުޅޭގޮތުން ދެ މިނިސްޓަރުން ވަނީ މަޝްވަރާ ކުރައްވާފައެވެ.
މިނިސްޓަރު ޒަމީރު ސައުދީގެ ފޮރިން މިނިސްޓަރު ޕްރިންސް ފައިސަލްއާ ބައްދަލު ކުރެއްވުމުގެ ތެރެއިން --- ފޮރިން މިނިސްޓްރީ
މީގެއިތުރުން، މިނިސްޓަރު ޒަމީރު ވަނީ އެ ގައުމުން ރާއްޖެއަށް ދެމުންދާ އެހީތެރިކަމަށް ޝުކުރު އަދާކުރައްވައި، މި ދަތުރުފުޅަށްފަހު ދެގައުމުގެ ގުޅުން އިތުރަށް ބަދަހިވާނޭކަމަށް އުއްމީދުކުރައްވާކަމަށް ވިދާޅުވެފައެވެ.
މި ބައްދަލުވުމުގައި، ޒަމީރުގެ އަރިހުގައި އެމްބެސެޑަރު އެޓް ލާޖް އަޙްމަދު ނަސީރާއި ޖޮއިންޓް ސެކްރެޓަރީ ބަދޫރާ ސަޢީދާއި ޑިރެކްޓާ ޖެނެރަލް ޢާއިޝަތު ފަރީނާ އަދި ސަޢޫދީ ޢަރަބިއްޔާގައި ހުންނަ ދިވެހިރާއްޖޭގެ އެމްބަސީ ހިންގެވުމާ ވަގުތީގޮތުން ހަވާލުވެ ހުންނެވި އަޙުމަދު ފަޒީލް ބައިވެރިވެވަޑައިގެންނެވިއެވެ.
އެ ދަތުރު ނިންމަވާލެއްވުމަށް ފަހު ވަފުދު އެނބުރި ވަޑައިގަންނަވާނީ އަންނަ ބުރާސްފަތި ދުވަހެވެ.
މިއަހަރަކީ ދިވެހިރާއްޖެއާއި ސައުދީ އަރަބިއްޔާއާ ދެމެދު ޑިޕްލޮމެޓިކް ގުޅުން ގާއިމުކުރިތާ 43 އަހަރު ފުރޭ އަހަރެވެ.