މީގެ 10 އަހަރުފަހުން 2034ވަނަ އަހަރު ބާއްވާ ފީފާ ވޯލްޑް ކަޕްގެ ބިޑު ސައޫދީ އަރަބިއްޔާއިން ކާމިޔާބުކުރުމުން އެ ގައުމަށް ރައީސް ޑރ. މުޙައްމަދު މުއިއްޒު މިރޭ މަރުހަބާ ވިދާޅުވެއްޖެއެެވެ.
ސައުދީއަށް ބިޑު ކާމިޔާބުވުމާ ގުޅިގެން އެކްސްގައި ކުރެއްވި ޕޯސްޓެއްގައި ރައީސް ވަނީ ރަސްގެފާނު ސަލްމާން ބިން އަބްދުލްއަޒީޒަށާއި، ވަލީ އަހުދު މުޙައްމަދު ބިން ސަލްމާނަށް މަރުހަބާ ވިދާޅުވެފައެވެ.
އެ މަނިކުފާނު ވިދާޅުވީ މި ބޮޑު ކާމިޔާބަކީ ބައިނަލްއަގްވާމީ ދުނިޔޭގައި ސައުދީ އަރަބިއްޔާގެ މަގުބޫލުކަމާއި ނުފޫޒު އިތުރުވަމުން އަންނަކަމާއި، ސައުދީގެ އިސްނެގުން ހާމަވާ ކަމެއް ކަމަށެވެ.
މިއީ ހަމައެކަނި ސައުދީއަށް ލިބުނު ފަޚުރެއް ނޫން ކަމަށާއި، މުޅި އަރަބި ދުނިޔެއާއި، އިސްލާމީ މުޖުތަމައުއަށް ވެސް ލިބުނު ކާމިޔާބެއްގެ ގޮތުގައި ރައީސް ސިފަކުރެއްވިއެވެ.
އިތުރަށް އެ މަނިކުފާނު ވިދާޅުވީ، ވާދަވެރި މުބާރާތެއް ފެންނަ ވޯލްޑް ކަޕެއްގެ އިތުރަށް އެއްބައިވަންތަކަމާއި، ސަގާފީ ގުޅުމާއި، އައު އީޖާދުތައް ފެންނާނެ ކަމަށް އުންމީދުކުރައްވާ ކަމަށެވެ.
މީގެ 10 އަހަރު ފަހުން އޮންނަ 2034ވަނަ އަހަރުގެ ފީފާ ވޯލްޑް ކަޕް ހޯދުމަކީ ސައުދީގެ ވަލީ އަހުދު މުޙައްމަދު ބިން ސަލްމާން އިސްނަންގަވައިގެން ހިންގަވާ އިގްތިޞާދީ ސްޓްރެޓެޖީ "ވިޝަން 2030"ގެ ދަށުން ކަނޑައަޅައިފައިވާ އެންމެ މުހިންމު އެއް ލަނޑުދަނޑިއެވެ.
ވިޝަން 2030ގައި ހިމެނެނީ މައިގަނޑު ތިން ކަމެކެވެ. އެއީ އެކި ސަގާފަތުގެ މުޖުތަމައުއެއް ބިނާކުރުމާއި، ހިންގުންތެރި އިގްޞީދެއް ބިނާކުރުމާއި ކާމިޔާބަށް މަސައްކަތްކުރާ ގައުމެއް ބިނާކުރުމެވެ.
ސައުދީއަށް ވޯލްޑް ކަޕް ބާއްވަން ފުރުސަތު ލިބުމަކީ މާ ކުރިން ވެސް ޔަގީންވެފައި އޮތް ކަމެކެވެ. އެއީ ފީފާއިން ދިން ކުރު މުއްދަތުގެ ސަބަބުން އޮސްޓްރޭލިއާއިން ބިޑު ހުށަހެޅުމަށް އޮތް ޝައުގުވެރިކަން ދޫކޮށްލުމާއެކު، އިތުރު ގައުމަކުން ކުރިމަތިނުލާތީ އޮކްޓޯބަރު 2023އިން ފެށިގެން ބިޑު ހުށަހެޅި ހަމައެކަނި ކެންޑިޑޭޓެއްގެ ގޮތުގައި އޮތީ ސައުދީ ކަމަށްވާތީއެވެ.