މިދިޔަ އަހަރު އޮކްޓޫބަރު ހަތްވަނަ ދުވަހު އިސްރާއީލުގެ ފައުޖުތަކުން ފަލަސްތީނުގެ ޣައްޒާގައި ހަނގުރާމަ ފެށި ފަހުން، އެމެރިކާގެ ޚާރިޖީ ވަޒީރު އެންތަނީ ބްލިންކެން މެދުއިރުމައްޗަށް ކުރައްވާ ނުވަވަނަ ދަތުރުފުޅު ފައްޓަވައިފިއެވެ.
އިއްޔެ ފެއްޓެވި ދަތުރުފުޅުގައި ބްލިންކެން ފުރަތަމަ ވަޑައިގަތީ އިސްރާއީލަށެވެ.
އޭގެ ފަހުން މި ހަފުތާ ފަހުކޮޅު މިސްރުގެ ވެރިރަށް ގާހިރާގައި ބާއްވަން ހަމަޖެހިފައިގާ ހަނގުރާމަ ހުއްޓައިލުމުގެ މަޝްވަރާތަކުގައި ބްލިންކެން ބައިވެރިވެޑައިގަންނަވާނެ ކަމަށް މީޑިއާތަކުން ރިޕޯޓުކުރެއެވެ. މިސްރަށް ވަޑައިގަތުގެ ކުރިން ހޯމަ ދުވަހު އިސްރާއީލުގެ އިސް އޮފިޝަލުންނާ ބައްދަލުކުރެއްވުމަށް ވަނީ ހަމަޖެހިފައެވެ.
އެގޮތުން، އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫއާއި، ރައީސް އިއްސާގު ހެރޮޒޮގް އަދި ދިފާއީ ވަޒީރު ޔޯވް ގަލަންޓާއާ ބައްދަލުކުރެއްވުމަށް ވަނީ ހަމަޖެހިފައެވެ.
ގަތަރާއި، މިސްރު އަދި އެމެރިކާ މެދުވެރިގެން ކުރަމުންދާ ހަނގުރާމަ ހުއްޓައިލުމުގެ މަޝްވަރާތައް މިދިޔަ ހަފުތާ ފަހުކޮޅު ވެސް ވަނީ ކޮށްފައެވެ. އިސްރާއީލުން ޣައްޒާގައި ކުރަމުންދާ ހަނގުރާމަ މެދުކަނޑާލައި އިސްރާއީލާއި ޣައްޒާގެ ވެރިކަންކުރާ ހަމާސް ޖަމާއަތުން ރަހީނުކޮށްފައިވާ ރަހީނުން މިނިވަންކުރުމަށް ކުރި އެ މަޝްވަރާތަކަށް ކުރިއެރުން ލިބިފައިވާ ކަމަށް މަޝްވަރާތަކުގެ މެދުވެރި ގައުމުތަކުން ރިޕޯޓުކޮށްފައިވެއެވެ.
ނަމަވެސް، ދެ ފަރާތުގެ ދެމެދުގެ މި ވަގުތު ދެބަސްވުން އުފެދިފައިވާ އެންމެ ބޮޑު އެއް މައްސަލައަކީ ހަމާސް ނައްތައިލުމަށް ފަހު މެނުވީ ހަނގުރާމަ ހުއްޓުމަކަށް ގެންނަން އިސްރާއީލުން ދެކޮޅު ހަދަމުން ދިޔުމެވެ. އަދި، ހަނގުރާމަ ވަގުތީ ގޮތުން މެދުކަނޑައިލުމުގެ ބަދަލުގައި ދާއިމަށް ހުއްޓުވަން ހަމާސުން ދަނީ ބާރު އަޅަމުންނެވެ.
ހަނގުރާމަ ހުއްޓާލުމުގެ އެއްބަސްވުން ނިންމުމަށް ގެނައުމަށް ބާރުއަޅަމުން އަންނައިރު، ހަނގުރާމަ ފެށުނު ފަހުން ޣައްޒާގައި މަރުވި ފަލަސްތީނުގެ މީހުންގެ އަދަދު ވަނީ 40،000 ފަހަނައަޅައިފައެވެ.
ހަނގުރާމަ ފެށުނީއްސުރެ މުޅި މެދުއިރުމަތީ ބޮޑު ހަނގުރާމައަކަށް ހިނގައިދާނެކަމުގެ ބިރު ވަނީ ހީވެފައެވެ.
އެ ބިރުވެރިކަން އިތުރަށް ބޮޑުވީ ހަމާސް ސިޔާސީ ގޮފީގެ އިސް ވެރިޔާ އިސްމާއީލު ހަނިއްޔާ ތެހެރާންގައި ހުންނަވަނިކޮށް ޝަހީދުކޮށްލުމާއި، އީރާނުގެ ތާއީދު އޮންނަ ލުބުނާނުގެ ހަތިޔާރު އެޅި ޖަމާއަތް، ހިޒްބުﷲ ގެ އިސް ކޮމާންޑަރު ފުއާދު ޝުކްރު ޝަހީދުކޮށްލުމާ ގުޅިގެން އެކަމުގެ ބަދަލު އިސްރާއީލުގެ ކިބައިން ހިފާނެ ކަމަށް އީރާނައި ހިޒްބުﷲ އިން ވެސް ބުނުމުންނެވެ.