ފަލަސްތީނުގެ ޣައްޒާގައި ރަހީނުކޮށްފައިވާ މީހުން އަންނަ މަހު 20 ގައި ރައީސްކަމާ ހަވާލުވެވަޑައިގަތުމުގެ ކުރިން މިނިވަންނުކޮށްފިނަމަ މެދުއިރުމަތީގެ މައްސަލަ ވަރަށް ގޯސްވާނެ ކަމަށް އެމެރިކާގެ އިންތިޚާބީ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ޓްރަމްޕް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ, އެ މަނިކުފާނު ވެރިކަމާ ހަވާލުވެވަޑައިގަތުމުގެ ކުރިން ރަހީނުން މިނިވަންނުކޮށްފި ނަމަ، އެމެރިކާގެ ތާރީޚުގައި މިހާތަނަށް ނުފެންނަވަރުގެ ބޮޑު އަނިޔާވެރިކަމެއް ލިބޭނެ ކަމަށެވެ.
"ޖެނުއަރީ 20 ވަނަ ދުވަހު ރަހީނުކޮށްފައިވާ ހުރިހާ އެންމެން މިނިވަން ނުވެއްޖެނަމަ، އެކަމުގެ ޒިންމާ ނަގަންޖެހޭ ފަރާތްތަކަށް އެމެރިކާގެ ތާރީޚުގައި ވެސް މިހާތަނަށް ނުފެންނަށްވަރުގެ ބޮޑު އަނިޔާވެރިކަމެއް ލިބިގެންދާނެ،" ސޯޝަލް މީޑިއާގައި ޓްރަމްޕް ވިދާޅުވެފައިވެއެވެ.
ނަމަވެސް، އެކަމުގެ އިތުރު ތަފުސީލެއް ދެއްވާފައެއްނުވެއެވެ.
ޣައްޒާގައި ރަހީނުކޮށްފައިވާ މީހުން ދޫކޮށްލުމަކީ މިދިޔަ ހަފުތާ ބަންދުގައި އިސްރާއީލާއި ފަލަސްތީނުގެ ހަތިޔާރުއެޅި ޖަމާއަތް، ހަމާސްއާ ދެމެދު އަލުން ފެށި ހަނގުރާމަ ހުއްޓާލުމުގެ މަޝްވަރާގެ މުހިއްމު ޝަރުތެކެވެ. ލުބުނާނުގެ ހަތިޔާރު އެޅި ޖަމާއަތް ހިޒްބުﷲއާއި، ހަމާސްއަކީ ވެސް އީރާނުގެ ތާއީދު އޮންނަ ޖަމާއަތްތަކެކެވެ. އިސްރާއީލާއި ހިޒްބުﷲއާއި ދެމެދު ހިނގި ހަނގުރާމަ މިދިޔަ ހަފުތާގައި ހުއްޓާލާފައިވާއިރު، އެކަމުގެ ސަބަބުން ޣައްޒާގައި ހަނގުރާމަ ހުއްޓާލުމުގެ ފުރުސަތު އޮތް ކަމަށް އެމެރިކާއިން އައީ ބުނަމުންނެވެ.
ނަމަވެސް، ލުބުނާނުގައި ހަނގުރާމަ ހުއްޓާލުމަށް ފަހު، ޣައްޒާއަށް ދެމުންގެންދާ ހަމަލާތައް އިތުރަށް ވަރުގަދަ ކުރާނެ ކަމަށް އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ވަނީ ވިދާޅުވެފައެވެ.
ހަމާސްގެ ކިބައިން ބަދަލުހިފިދާނެ ކަމަށް ވިދާޅުވެ، ސޯޝަލް މީޑިއާގައި ޓްރަމްޕް ދެއްވި އެ މެސެޖަކީ، މިދިޔަ އަހަރުގެ އޮކްޓޯބަރު ހަތްވަނަ ދުވަހު ހަމާސްގެ ހަނގުރާމަވެރިން އިސްރާއީލަށް ދިން ކުއްލި ހަމަލާގައި އެމެރިކާ-އިސްރާއީލުގެ ރައްޔިތެއް ކަމަށްވާ އޮމަރު ނިއުޓްރާ މަރުވެފައިވާ ކަމަށް އިސްރާއީލުގެ ދިފާއީ ބާރުން ހޯމަ ދުވަހު އިއުލާންކުރުމާ ގުޅިގެން ދެއްވި މެސެޖެއް ކަމަށް މީޑިއާތަކުން ރިޕޯޓުކޮށްފައިވެއެވެ.
ޢުމަރަކީ އިސްރާއީލުގެ އާމްޑް ކޯޕްސްގެ ޕްލެޓޫން ކޮމާންޑަރެއްގެ ގޮތުގައި މަސައްކަތްކުރި އުމުރުން 21 އަހަރުގެ ޒުވާނެކެވެ. އޭނާއަކީ މިދިޔަ އަހަރު ދިން ހަމަލާގައި މަރުވި އެމެރިކާގެ 48 މީހުންގެ ތެރޭގައި ހިމެނޭ މީހެކެވެ.
ޣައްޒާގައި ރަހީނުކޮށްފައިވާ 33 މީހަކު ހަނގުރާމައިގެ ތެރޭގައި މަރުވެފައިވާ ކަމަށް ވެސް ހަމާސްއިން އިއްޔެ ވަނީ ބުނެފައެވެ.
މިދިޔަ އަހަރުގެ އޮކްޓޫބަރު ހަތްވަނަ ދުވަހުން ފެށިގެން ޣައްޒާގައި އިސްރާއީލުން ހިންގަމުންދާ އަނިޔާވެރި ޖަރީމާތަކުގައި މިހާތަނަށް 44،400 އަށްވުރެ ގިނަ މީހުން ވަނީ ޝަހީދުކޮށްލާފައެވެ. ހަމަލާތަކުގެ ސަބަބުން ގާތްގަޑަކަށް މުޅި ޣައްޒާގެ އާބާދީގެ ގެދޮރު ވަނީ ގެއްލިފައެވެ.