ލުނބޯ ކިލޯއެއް ވިއްކާ އަގު މާރުކޭޓުގައި 140 ރުފިޔާއަށް އުފުލިއްޖެއެވެ.
އަގުތައް ހުރި ގޮތާ ގުޅޭގޮތުން މާރުކޭޓު ގޮޅިއެއްގައި މަސައްކަތް ކުރާ ވިޔަފާރިވެރިއަކު "ސަން"އަށް ބުނީ، ލުނބޯ ކިލޯއެއްގެ އަގުތައް އުފުލެން ފެށީ މިދިޔަ ހަފްތާ ނިމެނިކޮށް ކަމަށެވެ.
އެގޮތުން، މިދިޔަ ހަފްތާގައި 70 ރުފިޔާ އިން 80 ރުފިޔާއަށް އަގު އަރައި މި ހަފްތާ ތެރޭގައި ލުނބޯ ކިލޯއެއްގެ އަގު 120 އަށް އުފުލުނު ކަމަށް ވިޔާވެރިޔާ ބުންޏެވެ. އަދި، މިހާރު ލުނބޯ ކިލޯއެއްގެ އަގު އުޅެނީ 140 ރުފިޔާއަށެވެ.
އޭނާ ބުނި ގޮތުގައި، ލުނބޯގެ އަގު މިހާ ބޮޑަށް އުފުލިފައި މިވަނީ މޫސުން ގޯސްވެ، އޮޑިދޯނި ފަހާރާއި ބޭރުން އަންނަ ޝިޕްމަންޓުތައް ލަސްވާތީއެވެ.
ބާޒާރުގައި އާންމުކޮށް ލުނބޯ ކިލޯއެއްގެ އަގު ހުންނަނީ 50 އާއި 60 ރުފިޔާއާ ދެމެދުގެ އަގުތަކެއްގައެވެ.
މޫސުން ރަނގަޅުވެ، ބޭރުން އަންނަ ޝިޕްމަންޓުތައް ލިބެން ފެށުމުން ލުނބޯގެ އަގު ތިރިވާނެ ކަމަށް ލަފާކުރެވޭ ކަމަށް ވިޔަފާރިވެރިޔާ ބުންޏެވެ.
މިހާރު ކުރަމުން އަންނަ ވިއްސާރައާ ގުޅިގެން ފެން ބޮޑުވުން ފަދަ ކަންކަން ދިމާވާތީ ދިވެހި ދަނޑުވެރިންނަށް ވެސް އެ ކަމުގެ ދަތިތަކާ އަންނަނީ ކުރިމަތިވަމުންނެވެ.