ބަތަލާ ކަންގަނާ ރަނާވަތު އިންޑިއާގެ ކުރީގެ ބޮޑުވަޒީރު އިންދިރާ ގާނދީގެ ރޯލުން ފެންނަ ފިލްމު "އިމަޖެންސީ"ގެ ޓްރެއިލާ ދައްކާލައިފިއެވެ.
އިންޑިއާގެ އެންމެ ފުރަތަމަ ބޮޑު ވަޒީރު ޖަވާހިރުއްލާލް ނެހްރޫގެ އަވާހަރަވުމަށް ފަހު އެ ޤައުމުގެ ބޮޑު ވަޒީރުގެ މަޤާމަށް އިންދިރާ ގާނދީ އިސްކުރެވުނުގޮތާ އެކު ވެރިކަމުގެ ބާރު ލިބުނުގޮތް މި ފިލްމުން ފެންނާނެއެވެ.
ފިލްމުގެ ބޮޑު ބައެއް ބިނާކޮށްފައިވަނީ 1975ވަނަ އަހަރު އިންޑިއާގައި އިއުލާނުކުރެވުނު ކުއްލި ހާލަތުގެ ހާދިސާގެ މައްޗަށެވެ. ގިނަ ބައެއްގެ ނުރުހުމާއި ފާޑުކިޔުންތައް އިންދިރާ ގާނދީއަށް އަމާޒުވިއިރު ކުއްލި ހާލަތުގެ މުއްދަތު 21 މަސް ދުވަހަށް ދެމިގެންދިޔައެވެ.
މީގެ އިތުރުން، 1971ވަނަ އަހަރު އަވައްޓެރި ޕާކިސްތާނާ ދެކޮޅަށް އިއުލާނުކުރި ހަނގުރާމައިގެ ހާދިސާތަކުގެ އިތުރުން އިންދިރާ ގާނދީގެ ސިޔާސީ ހަޔާތުގެ ބައެއް ސަފުހާތައް ވެސް ދައްކުވައިދޭނެއެވެ.
ބަތަލާ ކަންގަނާ ރަނާވަތު ފިލްމު 'އިމަޖެންސީ'ގެ މަންޒަރެއްގައި--ފޮޓޯ/ދަޓެލެގްރާފްއިންޑިއާ
އާއްމުގޮތެއްގައި އިންޑިއާގައި އުފައްދާ މިފަދަ ބައޮޕިކްތައް ބިނާކޮށްފައިވަނީ ބެލުންތެރިންނަށް އެއިން އަގުހުރި ފިލާވަޅުތައް ލިބޭނެކަހަލަ ގޮތަކަށް ނަމަވެސް ކަންގަނާގެ މި ފިލްމުގައި އިންދިރާ ސިފަކޮށްފައިވަނީ އަމިއްލަ އެދުން އިސްކޮށް ޤައުމިއްޔަތުކަމެއް ނެތް ލީޑަރެއްގެ ގޮތުގައިކަން ގިނަ ބަޔަކު ވަނީ ފާހަގަކޮށްފައެވެ.
ކަންގަނާ އަމިއްލައަށް ޕްރޮޑިއުސްކޮށް ޑައިރެކްޓްކޮށްފައިވާ މި ފިލްމުގެ މުހިއްމު ރޯލްއިން ފެންނާނެ ތަރިންގެ ތެރޭ ބަތަލާ މަހިމާ ޗައުދަރީ، އަނޫޕަމް ހޭރު، ޝްރެޔަސް ތަލްފަޅޭ، މިލިންދު ސޯނަމް އަދި ވިޝާލް ނައިރު ހިމެނެއެވެ. މި ފިލްމު ސިނަމާތަކަށް ގެންނަން ނިންމާފައިވަނީ ކުރިއަށް އޮތް ސެޕްޓެމްބަރު މަހުގެ ހަވަނަ ދުވަހުއެވެ.