ޖަޕާނުގެ ބޮޑު ވަޒީރު ފުމިއޯ ކިޝިދާ އަންނަ ސެޕްޓެމްބަރު މަހު މަގާމުން ވަކިވާނެ ކަމަށް އިއުލާނުކުރައްވައިފިއެވެ.
ސެޕްޓެމްބަރު މަހު ބާއްވާ އިންތިޚާބުގައި ސަރުކާރު ހިންގާ, ލިބަރަލް ޑިމޮކްރެޓިކް ޕާޓީ (އެލްޑީޕީ)ގެ ލީޑަރުގެ މަގާމަށް އަލުން ވާދަނުކުރައްވާނެ ކަމަށް ކިޝިދާ އިއުލާނުކުރެއްވީ މިއަދު ބޭއްވި ނޫސްވެރިންގެ ބައްދަލުވުމެއްގައެވެ.
އަދި މިއީ ޕާޓީގެ ލީޑާޝިޕަށް އާ މޫނެއް ފެންނަންވީ ވަގުތު ކަމަށާއި އާ ލީޑަޝިޕަށް އޭނާގެ ފުރިހަމަ ސަޕޯޓު ލިބޭނެ ކަމަށް ވެސް ކިޝިދާ ވިދާޅުވިއެވެ.
ތިން އަހަރުގެ ދައުރަކަށް 2021 ވަނަ އަހަރުގެ ސެޕްޓެމްބަރު މަހު ޕާޓީގެ ރައީސް ކަމަށް ކިޝިދާ އިންތިޚާބުވިއެވެ. އޭގެ ދުވަސްކޮޅެއް ފަހުން ބޭއްވި އާންމު އިންތިޚާބުވެސް އޭނާ ކާމިޔާބު ކުރެއްވިއެވެ. ނަމަވެސް ޕާޓީގެ ތެރޭގައި ބޮޑު ކޮރަޕްޝަންގެ މައްސަލަތަކެއް ހިނގަމުންދާ ދަނޑިވަޅެއްގައި އޭނާގެ މަގުބޫލުކަން ވަނީ ވަރަށް ބޮޑަށް ދަށްވެފައެވެ.
އަވަހާރަކޮށްލި ކުރީގެ ބޮޑުވަޒީރު ޝިންޒޯ އަބޭ އިސްކޮށް ހުންނަވައިގެން އުފެއްދި ޕާޓީ ފެކްޝަނަށް ނިސްބަތްވާ އެލްޑީޕީގެ 80 އަށް ވުރެ ގިނަ މަޖިލިސް މެމްބަރުންނަށް އެ މައްސަލައިގެ ތުހުމަތު ވަނީ ކޮށްފައެވެ. ޖެނުއަރީ މަހު އޭގެ ތެރެއިން 10 މީހެއްގެ މައްޗަށް ދައުވާވެސް އުފުލާފައިވެއެވެ.
ކުރީގެ ޚާރިޖީ ވަޒީރުކަން ކުރައްވައިފައިވާ ކިޝިދާ ޖަޕާނުގެ ބޮޑު ވަޒީރުގެ މަގާމާ ހަވާލުވެވަޑައިގަތީ، ކޯވިޑް-19ގެ ބަލިމަޑުކަމާ ގުޅިގެން ފާޑުކިޔުން އަމާޒުވި އޭރުގެ ބޮޑު ވަޒީރު ޔޮޝިހިދޭ ސުގާ އިސްތިއުފާ ދެއްވުމުންނެވެ.