މަޝްރޫއުތައް ހުއްޓި ދިގުލައިގެންދާ މައްސަލަ ހައްލުކުރުމަށްޓަކައި އަންނަ އަހަރަށް ލަފާކުރާ ބަޖެޓު ފާސްކުރާއިރު، ކޮންމެ ޕްރޮޖެކްޓެއްގެ ހަމަ އަގުގެ 50 އިންސައްތަ ހިމަނައިދިނުމަށް ސްޕޯޓްސް މިނިސްޓަރު އަބްދުﷲ ރާފިއު، ރައްޔިތުންގެ މަޖިލީހުގެ މެންބަރުންގެ އަރިހުން މިއަދު އެދިވަޑައިގެންފިއެވެ.
މަޖިލީހުގެ މިއަދުގެ ޖަލްސާއަށް މިނިސްޓަރު ހާޒިރުކޮށް، ސުވާލުކުރުމުގެ ވަގުތުގައި މާފަންނު ދެކުނު ދާއިރާގެ މެންބަރު އަބްދުﷲ ރިފާއު ވަނީ މަޝްރޫއުތައް ހުއްޓި ދިގުލައިގެންދާ މައްސަލަ ހައްލުކުރެވޭނީ ކިހިނެއްތޯ ސުވާލުކުރައްވާފައެވެ.
އެ ސުވާލަށް ޖަވާބުދެއްވާ ރާފިއު ވިދާޅުވީ، އެއްކަމަކީ މިހާރު ފަށާފައި ހުރި ޕްރޮޖެކްޓުތައް އަހަރުތަކަށް ބަހާލައިގެން ކުރިއަށް ގެންދިއުން ކަމަށެވެ.
އަނެއް ކަމަކީ ޕްރޮޖެކްޓުތައް ބަޖެޓުކުރާއިރު، އެންމެ މަދުވެގެން ވެސް ޕްރޮޖެކްޓުގެ ހަމަ އަގުގެ 50 އިންސައްތަ ބަޖެޓުގައި ހިމެނުން ކަމަށެވެ. އޭރުން އެންމެ ގިނަވެގެން ވެސް ދެ އަހަރު ތެރޭ ޕްރޮޖެކްޓް ނިންމޭނެ ކަމަށް މިނިސްޓަރު ވިދާޅުވިއެވެ.
އަޅުގަނޑުގެ އެދުމަކީ އިއްޒަތްތެރި މެންބަރުން ވެސް ބަޖެޓު ފާސްކުރައްވާއިރު ޕްރޮޖެކްޓުތައް ގިނަކުރުމުގެ ބަދަލުގައި ޕްރޮޖެކްޓުތައް ނިމޭ ވަރަށް އެ ފައިސާ މަދުވެގެން ވެސް 50 ޕަސެންޓު ހިމެނުން. ހިމެނިއްޖިއްޔާ އަޅުގަނޑުމެންނަށް އެކަން އެގްޒިކިއުޓްކުރަން ފަސޭހަވާނެ، ސްޕޯޓްސް މިނިސްޓަރު އަބްދުﷲ ރާފިއު
ރާފިއު ވިދާޅުވީ، ރައްޔިތުން ބޭނުންވާގޮތަށް ކައުންސިލްތައް މެދުވެރިކޮށް އަދި މެންބަރުން މެދުވެރިކޮށް ރަށްރަށުގައި ކުރިއަށް ގެންދާ ޕްރޮޖެކްޓުތަކުގެ ތެރެއިން މުހިންމު ޕްރޮޖެކްޓުތަކަށް އިސްކަންދީގެން އަހަރުތަކަށް ބަހާލުމަކީ މުހިންމު ކަމެއް ކަމަށެވެ.
އެގޮތުން، 2025، 2026 ގައި ކުރާނީ ކޮންކަމެއްތޯ ބަލައި، ދެން އެ ކަމަކަށް ބޭނުންވާ ކަމެއް ހިމަނައި، އެކަމަށް ބޭނުންވާ ރަނގަޅު އަދަދެއް ބަޖެޓުގައި ހިމެނުމަކީ މުހިންމު ކަމެއް ކަމަށް އޭނާ ފާހަގަކުރެއްވިއެވެ. އަދި، އޭނާ ދެކެވަޑައިގަންނަވާ ގޮތުގައި ހައްލަކަށް ވާނީ އެކަން އެގޮތަށް ކުރެވިގެން ކަމަށް ރާފިއު ވިދާޅުވިއެވެ.
މިދިޔަ މެއި މަހުގެ ހަވަނަ ދުވަހު މަޖިލީހަށް ހާޒިރުވެ، އެތައް މިލިއަން ރުފިޔާއެއް ޚަރަދުކުރަން ޖެހޭ މަޝްރޫއުތަކަށް ރައްޔިތުންގެ މަޖިލީހުން ފާސްކުރި މި އަހަރުގެ ބަޖެޓުގައި ޖަހާފައިހުރީ ލައްކައިން ކަމަށާއި މަޝްރޫއުތައް ދިގުލަނީ އެހެންވެ ކަމަށް މިނިސްޓަރު ރާފިއު ވިދާޅުވިއެވެ.
އޭރު އޭނާ ވިދާޅުވީ، މަޝްރޫއުތަކުގެ މަސައްކަތް ހަވާލުކުރާއިރު، ބަޖެޓްގައި އެ މަސައްކަތާ އެކަށީގެންވާ ވަރަށްވުރެ ކުޑަ އަދަދެއް ހިމަނާފައި އޮތުމުގެ ސަބަބުން އެ މަސައްކަތެއް ހަވާލުކުރުމަށް ފަހު، ދެވަނަ ޕޭމަންޓެއް ދެއްކުމަށް ގޮންޖެހުންތަކެއް ކުރިމަތިވާ ކަމަށެވެ.
މަޝްރޫއުތައް ދަންމާލަން ޖެހެނީ އެހެންވެ ކަމަށް މިނިސްޓަރު ވިދާޅުވިއެވެ.
މިދިޔަ ސަރުކާރުގައި ފަށާފައިހުރި ބައެއް މަޝްރޫއުތައް ހުއްޓިފައި ހުރި ކަމަށް ބުނެ އިދިކޮޅު އެމްޑީޕީން ވަރަށް ބޮޑަށް ނުރުހުން ފާޅުކުރެއެވެ. އެކަމަކު، ސަރުކާރުން ވަނީ އެއްވެސް މަޝްރޫއެއް ހުއްޓައިނުލާ ކުރިއަށް ގެންދާނެކަމުގެ ޔަގީންކަން އަރުވައިފައެވެ.