ޣައްޒާގެ ވެރިކަންކުރާ ހަމާސް ޖަމާއަތުގެ ސިޔާސީ ގޮފީގެ ވެރިޔާ އިސްމާއީލު ހަނިއްޔާ އީރާނުގައި ހުންނަވަނިކޮށް ޝަހީދުކޮށްލުމުގެ ރައްދު އިސްރާއީލަށް ދިނުމަށް ލަސްވާނެ ހަމައެކަނި ގޮތަކީ އިސްރާއީލުން ޣައްޒާގައި ކުރަމުންގެންދާ ހަނގުރާމަ ހުއްޓައިލުން އެއްބަސްވުން ކަމުގައި އީރާނުގެ ތިން އޮފިޝަލަކު ވިދާޅުވެއްޖެއެވެ.
އޭގެ ތެރެއިން އެއް އޮފިޝަލަކު ވިދާޅުވީ, ޣައްޒާގެ މަޝްވަރާތައް ނާކާމިޔާބުވެއްޖެނަމަ ނުވަތަ އިސްރާއީލުން މަޝްވަރާތައް ކުރުމުގައި ލަސްކުރާނަމަ، އީރާނުގެ ތާއީދު އޮންނަ ލުބުނާނުގެ ހަތިޔާރުއެޅި ޖަމާއަތް، ހިޒްބުالله ފަދަ އެކުވެރިންނާ އެކު އިސްރާއީލަށް ސީދާ ހަމަލާއެއް ދޭނެ ކަމަށެވެ. ނަމަވެސް, މަޝްވަރާތައް ކުރިއަށް ގެންދިއުމަށް އިސްރާއީލަށް ދޭނީ ކިހާ މުހުލަތެއް ކަމެއް އޮފިޝަލު ހާމަކޮށްފައެއްނުވެއެވެ.
ހަނިއްޔާގެ އިތުރުން ހިޒްބުاللهގެ އިސް ކޮމާންޑަރު ފުއާދު ޝުކްރު ވެސް ޝަހީދުކޮށްލާފައިވާއިރު، މެދުއިރުމަތީގެ ބޮޑު ހަނގުރާމައެއް ފެށިދާނެކަމުގެ ބިރު ވަނީ ހީވެފައެވެ.
އެމެރިކާގެ އިތުރުން ހުޅަނގުގެ އެހެން ގައުމުތަކުން ވަނީ ބަދަލު ހިފުން ކޮންޓްރޯލުކުރުމާ ގުޅޭ މަޝްވަރާތަކެއް ފުޅާދާއިރާއެއްގައި އީރާނާ އެކު ކޮށްފައެވެ. އެގޮތުން، އިސްރާއީލާ ދެކޮޅަށް ހަމަލާ ދިނުމާ ދެކޮޅަށް އީރާނަށް އެންމެ ބޮޑަށް ބާރު އަޅާފައިވަނީ އިނގިރޭސިވިލާތާއި ފަރަންސޭސިވިލާތުގެ އިތުރުން ޖަރުމަނުވިލާތުންނެވެ.
މަޝްރަހު އިތުރަށް ގޯސްނުކުރުމަށް އީރާނަށް ބާރުއަޅައިދިނުމަށް އެދި މެދުއިރުމަތީގެ ގައުމުތަކަށް އެމެރިކާއިން އެދިފައިވާ ކަމަށްވެސް ތުރުކީވިލާތުގައި ހުންނަވާ އެމެރިކާގެ ސަފީރު ވަނީ ވިދާޅުވެފައެވެ. އަދި، ބުރާސްފަތި ފަށަން ހަމަޖެހިފައިވާ ހަނގުރާމަ ހުއްޓައިލުމުގެ މަޝްވަރާތައް ފެށުމުގެ ކުރިން މަޝްރަހު ގޯސްނުކުރުމަށް ވެސް އެމެރިކާއިން އީރާނަށް އެދިފައިވާ ކަމަށް ބޭރުގެ މީޑިއާ ރިޕޯޓުތައް ބުނެއެވެ.
މި ހަފުތާގެ ތެރޭގައި އީރާނުން ކޮންމެ ވެސް ކަމެއް ކުރާނެ ކަމަށް އެމެރިކާއިން ލަފާ ކުރާ ކަމަށް ވެސް ވައިޓް ހައުސްގެ ތަރުޖަމާނު ޖޯން ކާބީ ހޯމަ ދުވަހު ނޫސްވެރިންނާ ވާހަކަދައްކަވަމުން ވިދާޅުވިއެވެ. އަދި، އެހެންވެއްޖެނަމަ، ބުރާސްފަތި ދުވަހު ފަށަން ހަމަޖެހިފައިވާ މަޝްވަރާތަކަށް އެކަމުގެ އަސަރުކުރާނެ ކަމަށް ވެސް އޭނާ ވިދާޅުވިއެވެ. ހަމަލާއަކަށް އެމެރިކާ ތައްޔާރަށް އޮންނަންޖެހޭ ކަމަށް ވެސް ކާބީ ވިދާޅުވިއެވެ.
އިސްރާއީލުގެ ހިމާޔަތާއި ރައްކާތެރިކަން ކަށަވަރުކޮށްދިނުމަށް އެމެރިކާއިން ވަނީ އަސްކަރީ މަނަވަރުތަކާއި ގައިޑެޑް-މިސައިލް އުފުލާ ސަބްމެރިންތައް މެދުއިރުމައްޗަށް ފޮނުވާފައެވެ. އެމެރިކާގެ ދިފާއީ ވަޒީރު ލޮއިޑް އޮސްޓިން ވަނީ ޗައިނާ ކަނޑުގައި އޮތް އަސްކަރީ މަތިންދާބޯޓު އުފުލާ މަނަވަރު، ޔޫއެސްއެސް އެބްރަހަމް ލިންކަނާއި، އެ އުޅަނދާ އެކު ދަތުރު ކުރާ ސްޓްރައިކް ގުރޫޕުގެ މަނަވަރުތަކާއި ސަބްމެރިންތައް މެދުއިރުމައްޗަށް ފޮނުވަން އަމުރު ކުރައްވާފައެވެ. އަދި، މެދުއިރުމަތީގެ އައުމުތަކުގައި ގާއިމުކޮށްފައިވާ އެމެރިކާ ސިފައިންގެ އަސްކަރީ މަރުކަޒުތަކަށް އިތުރު އަސްކަރީ މަތިންދާބޯޓުތައް ވެސް ވަނީ ފޮނުވާފައެވެ.
މިދިޔަ އޮކްޓޫބަރު ހަތްވަނަ ދުވަހުން ފެށިގެން ޣައްޒާގެ މުސްލިމުންނާ ދެކޮޅަށް އިސްރާއީލުން ކުރަމުންދާ ހަނގުރާމައިގައި މިހާތަނަށް ވަނީ 39,897 މީހުން ޝަހީދުކޮށްލައިފައެވެ. އޭގެ ތެރޭގައި 16،500 އަށްވުރެ ގިނަ ކުޑަކުދިން ހިމެނޭ ކަމަށް އދ.އިން ވަނީ ހާމަކޮށްފައެވެ. ހަމަލާތަކުގައި ޒަޚަމުކޮށްލާފައިވާ މީހުންގެ އަދަދު ވަނީ 92,152 އަށް އުފުލިފައެވެ.