މިދިޔަ އެމްޑީޕީ ސަރުކާރުން ހިންގި ބިންވެރިޔާ ސްކީމްގެ ދަށުން ގުޅީފަޅުން ދޫކޮށްފައިވާ ގޯތިތައް ދޫކުރެވޭނެ ވަކި ތާރީޚެއް ދަންނަވަން ދަތިކަމަށް ހައުސިން މިނިސްޓަރު ޑރ. އަލީ ހައިދަރު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ވަނީ ބިންވެރިޔާ ސްކީމްގެ ދަށުން ގުޅީފަޅުން ދޫކޮށްފައިވާ ގޯތިތައް ހަވާލުކުރެވޭނީ ކޮންއިރަކުންތޯ މިނިސްޓަރު އަރިހުން އައްސަވައިފައެވެ.
އެ ސުވާލަށް ޖަވާބުދެއްވަމުން މިނިސްޓަރު ހައިދަރު ވިދާޅުވީ، ގުޅީފަޅުން ބިން ލިބުނު ފަރާތްތަކަށް އިން ވަކިކުރުމަށް ފަހު، ބިން ހަވާލު ކުރަން ފެށޭނެ ވަކި ތާރީޚެއް ކަނޑައަޅަން އަދި ދަތި ކަމަށެވެ. އަދި، އެކަން ކުރަން ދަތިވާ ސަބަބުތަކެއް އެބަހުރި ކަމަށް މިނިސްޓަރު ވިދާޅުވިއެވެ.
ހައުސިން މިނިސްޓަރު ޑރ. އަލީ ހައިދަރު މިއަދުގެ ޖަލްސާގައި ވާހަކަދައްކަވަނީ -- ފޮޓޯ/ މަޖިލިސް
ފުރަތަމަ ސަބަބަކަށް މިނިސްޓަރު ވިދާޅުވީ ތިލަމާލެ ބުރިޖުގެ މަސައްކަތަށް ގުޅީފަޅު، މަސައްކަތު ސައިޓެއްގެ ގޮތުގައި ބޭނުންކުރަމުން ދިއުމެވެ. ބުރިޖުގެ މަސައްކަތަށް ގުޅީފަޅު ބޭނުންކުރުމުގެ ސަބަބުން ކުރިން އެ ތަނުން ދޫކޮށްފައި ހުރި ގޯތިތަކުގެ ކަންމުޑިތައް ވެސް ހަލާކުވެފައިވާކަން މިނިސްޓަރު ފާހަގަކުރެއްވިއެވެ.
މި ވަގުތު ގުޅީފަޅުގެ ބިން އަޅުގަނޑުމެންނަށް އެއްކޮށް ހިއްކާ ނުވެސް ނިންމޭ. ދެން އަނެއް ތަންކޮޅަކީ ގުޅީފަޅަކީ މި ވަގުތު ބުރިޖު މަސައްކަތަށް ވަރަށް ބޮޑަށް ބޭނުންކުރަމުންދާ ސައިޓަކަށް ވާތީ އެ ސައިޓު އެ ތަނުން ހުސްކުރެވޭނެ ކަމަށް އަޅުގަނޑަށް މައުލޫމާތު ލިބިފައިވަނީ އަންނަ އަހަރު ސެޕްޓެމްބަރު މަހަށް، ހައުސިން މިނިސްޓަރު ޑރ. އަލީ ހައިދަރު
ދެވަނަ ސަބަބެއްގެ ގޮތުގައި މިނިސްޓަރު ހައިދަރު ފާޙަގަކުރެއްވީ، މީހުން ދިރިއުޅެން އެކަށީގެން ނުވާ ގޮތަކަށް ކުރީގެ ސަރުކާރުން ބިން ދޫކޮށްފައި ހުރުމެވެ.
ކަނޑުންނާއި ފަޅުން ދޫކޮށްފައި ހުރި ބިންތަކެއް ގޯއްޗަށް ނުވާނެ ކަމަށް ވިދާޅުވެ، މިނިސްޓަރު ވަނީ ތަކުރާރުކޮށް މިދިޔަ ސަރުކާރަށް ފާޑު ވިދާޅުވެފައެވެ. އަދި، އެއީ ރައްޔިތުންނަށް ގޯތި ދޫކުރާ ގޮތް ނޫން ކަމަށާއި މި ސަރުކާރުން ބިންތައް ރައްޔިތުންނަށް ހަވާލުކުރާނީ ހިއްކާ ނިންމާފައި ކަމަށް އޭނާ ވިދާޅުވިއެވެ.
އެހެންކަމުން ގުޅީފަޅުން ގޯތި ލިބުނު ފަރާތްތަކާ ބައްދަލުކޮށް މަޝްވަރާކުރުމަށް ފަހު އެ ތަނުގެ ލޭންޑް ޔޫސް ޕްލޭނަށް ބަދަލުތަކެއް ގެނެސްފައިވާ ކަމަށް މިނިސްޓަރު ވިދާޅުވިއެވެ. އަދި، މިހާރު ކުރިއަށް ދަނީ އެ ތަނުގެ ލޭންޑް ޔޫސް ޕްލޭން ފާސްކުރުމުގެ އެންމެ ފަހު މަރުހަލާ ކަމަށް ވެސް މިނިސްޓަރު ވިދާޅުވިއެވެ.
ހަމައެއާ އެކު ގިރާވަރުފަޅުން ގޯތި ލިބުނު ބައެއް ފަރާތްތައް ގުޅީފަޅަށް ބަދަލުކުރަން ވެސް ޖެހިފައިވާކަން މިނިސްޓަރު ފާހަގަކުރެއްވިއެވެ. ހައުސިން މިނިސްޓްރީން ވަނީ އެ ކަމަށްޓަކައި މިދިޔަ ޖޫން މަހު ގުރުއަތުލުމެއް ވެސް ބާއްވާފައެވެ.
ނިމިދިޔަ ސަރުކާރުން ކުރިއަށްގެންދިޔަ ބޯހިޔާވަހިކަމުގެ މަޝްރޫއެއް ކަމަށްވާ ބިންވެރިޔާ ސްކީމްގެ ފުރަތަމަ ފިޔަވަހީގެ ދަށުން، 18،955 މީހުން ގޯއްޗަށް ޝަރުތު ހަމަވާއިރު، ޖުމުލަ 9،003 ގޯތި ދޫކުރަން ވަނީ ނިންމައިފައެވެ. އެ ސްކީމްގެ ދަށުން ގޯތި ދޫކުރަނީ ގިރާވަރުފަޅާއި ގުޅިފަޅުގެ އިތުރުން ހުޅުމާލެ ހިއްކައިގެންނެވެ.