މިދިޔަ އަހަރު ބަނގުރާ ބުއިމުގެ މައްސަލައެއްގައި ހައްޔަރުކުރި މީހަކު، ކްރިމިނަލް ކޯޓުން 10،666.67 ރުފިޔާއިން ޖޫރިމަނާކޮށްފިއެވެ.
އެ މައްސަލައިގެ ހުކުމުގައިވަނީ، މިދިޔަ އަހަރުގެ އޮގަސްޓު 24ގެ ރޭ މ. ޘަލަޘާއިން މަސްތުވާތަކެތި ބޭނުންކޮށް، ގެންގުޅެ އަދި ވިޔަފާރި ކުރުމުގެ ތުހުމަތުގައި މީހަކު ހައްޔަރުކުރި ކަމަށެވެ. އޭނާ ހައްޔަރުކުރުމަށް ފަހު ސުވާލުކުރުމުން މަސްތުވުމަށް ޓަކައި ދޭތެރެއަކުން ބަނގުރާ ބޭނުންކުރާ ކަމަށް އިއުތިރާފުވެފައިވާ ކަމަށް ޝަރީއަތުގައި ދައުލަތުން ބުންޏެވެ.
އެ މައްސަލައިގައި އެ މީހާގެ މައްޗަށް ކޮށްފައިވާ ބަނގުރާ ބުއިމުގެ ދައުވާގެ ޝަރީއަތުގައި ބުނެފައިވަނީ، އެއީ އޭނާއާ ޖެހުނު ރައްޓެހި ބަޔަކާ އެއްކޮށް ކުރެވުނު ކަމެއް ކަމަށާއި ބަނގުރާ ބުއިން ހުއްޓާލައިގެން އުޅޭތާ ދެ އަހަރު ވެދާނެ ކަމަށެވެ. އޭނާގެ އިއުތިރާފުގައި ވަނީ ގާތްގަނޑަކަށް ތިން ފަހަރު ބަނގުރާ ބޮއެފައިވާނެ ކަމަށެވެ.
އެ އިއުތިރާފާ ގުޅިގެން އޭނާއަށް ޖަލު ހުކުމެއް ކުރެވެން އޮތުމުން، އޭނާ އެދުނީ ޖޫރިމަނާގެ އަދަބަކަށް ބަދަލު ކޮށްދިނުމަށެވެ.
އޭނާގެ އަދަބު ކަނޑައެޅުމުގެ މަރުހަލާގައި، އޭނާއަކީ މިދިޔަ އަހަރުން ފެށިގެން 20،000 ރުފިޔާގެ މުސާރައެއް ލިބޭ މީހެއް ކަމަށާއި ޖޫރިމަނާގެ އަދަބު ކަނޑައަޅަން ޖެހޭނީ އޭނާއަށް ލިބޭ އާމްދަނީއަށް ބަލައިކަން ފާހަގަކޮށްފައިވެއެވެ.
މީގެ އިތުރުން އޭނާގެ ކުށުގެ ރެކޯޑެއް ނެތް ކަމަށާއި އަދަބު ކަނޑައެޅުމުގެ އަސާސީ މިންގަނޑު މަތި ކުރަން ޖެހޭ ފަދަ ސަބަބެއް މައްސަލައިގައި ނެތް ކަމަށް ވެސް ޝަރީއަތުގައި ފާހަގަކޮށްފައިވެއެވެ.
އެ މައްސަލައިގެ ހުކުމުގައި ވަނީ އޭނާގެ މައްޗަށް ބަނގުރާ ބުއިމުގެ ކުށް ސާބިތުވެ، 40 އެތިފަހަރުން ޖަލްދުކުރުމާއެކު 27 ދުވަހުގެ މުއްދަތަށް ޖަލަށް ލުމަށެވެ. އޭނާ ބަންދުގައި ހުރި މުއްދަތަށް ބަލައި އެ މުއްދަތު 16 ދުވަހަށް މަދު ކުރެވޭނެ ކަމަށް ހުކުމުގައިވެއެވެ. ނަމަވެސް ގާނޫނުލްއުގޫބާތުގެ ތަފާތު އަދަބު އެއްހަމަ ކުރާ މާއްދާގައިވާ ގޮތުގެ މަތިން، އޭނާގެ ޖަލު އަދަބު ވަނީ 10،666.67 ރުފިޔާގެ ޖޫރިމަނާ އަދަބަކަށް ބަދަލުކޮށްފައެވެ.
އެ ހުކުމްކުރި ތާރީޚު ކަމަށްވާ، މިދިޔަ ބުރާސްފަތި ދުވަހުން ފެށިގެން ފަސް މަސް ދުވަހުގެ ތެރޭގައި މީރާއަށް އެ ފައިސާ ދެއްކުމަށް އޭނާއަށް ވަނީ ހުކުމްކޮށްފައެވެ.