ގަވާއިދާ ހިލާފަށް އުޅޭ ބިދޭސީންގެ މައްސަލަތައް ރިޕޯޓުކުރަން ތައާރަފުކުރި އިމިގްރޭޝަން ވޮޗަށް މަހެއް ނުވަނީސް އެ ޕޯޓަލް މެދުވެރިކޮށް 277 މައްސަލައެއް ހުށަހަޅާފައިވާ ކަމަށް އިމިގްރޭޝަނުން މިއަދު ބުނެފިއެވެ.
އިމިގްރޭޝަން ވޮޗަކީ ގަވާއިދާ ޚިލާފަށް އުޅޭ ބިދޭސީންގެ މައްސަލަތަކާއި ގަވާއިދާ ޚިލާފަށް ރާއްޖެ އެތެރެވާން މަސައްކަތް ކުރާ މީހުންގެ މައުލޫމާތު ރިޕޯޓްކުރުމަށް ޚާއްސަކޮށްގެން އިމިގްރޭޝަނުން ތައާރަފުކޮށްފައިވާ 24 ގަޑިއިރު ޚިދުމަތް ލިބޭ އޮންލައިން ޕްލެޓްފޯމެކެވެ.
"ސަން"އަށް މައުލޫމާތު ދެމުން އިމިގްރޭޝަނުން ބުނީ، އެ އިދާރާއަށް މައްސަލަ ހުށައެޅުމަށް ބޭނުންކުރާ އޮންލައިން ޕްލެޓްފޯމް، އިމިގްރޭޝަން ވޮޗް އިފުތިތާހުކުރި ދުވަހުން ފެށިގެން މިއަދާ ހަމައަށް އައިރު 277 މައްސަލައެއް އެ ޕްލެޓްފޯމް މެދުވެރިކޮށް ރިޕޯޓްކޮށްފައިވާ ކަމަށެވެ.
އޭގެ ތެރޭގައި، ނަން ހާމަނުކޮށް ހުށައަޅާފައިވާ މައްސަލަތައް ގިނަކަން ފާހަގަކުރެވޭއިރު ގިނައިން ރިޕޯޓުކޮށްފައިވަނީ ގަވާއިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލަތައް ކަމަށް އިމިގްރޭޝަނުން ވަނީ މައުލޫމާތު ދީފައެވެ.
އިމިގްރޭޝަން ވޮޗު ޕްލެޓްފޯމް ތައާރަފުކުރީ މިދިޔަ މަހު 17 ގައެވެ.
މި ޕްލެޓްފޯމް ލޯންޗްކުރަން ބޭއްވި ރަސްމިއްޔާތުގައި ކޮންޓްރޯލާ ޖެނެރަލް އޮފް އިމިގްރޭޝަން މުޙައްމަދު ޝަމްއާން ވަހީދު ވިދާޅުވީ، މި ޚިދުމަތަކީ އާންމުންނަށް އިމިގްރޭޝަނާ ގުޅިގެން މަސައްކަތް ކުރެވިދާނެ ޕްލެޓްފޯމެއް ކަމަށާއި ޕްލެޓްފޯމާ އެކު އާންމުންނާ ގުޅިގެން ކުރެވޭނެ ވަރަށް ގިނަ މަސައްކަތްތަކެއް އެބަހުރި ކަމަށެވެެ.
މި ސަރުކާރުގެ އަމާޒަކީ ގަވާއިދާ ޚިލާފަށް އުޅޭ ބިދޭސީންގެ މައްސަލަ ތިން އަހަރު ތެރޭގައި ހައްލު ކުރުމެވެ. އެ ގޮތުން، ނުގަވައިދުން އުޅޭ ބިދޭސީން ހޯދަން ކަމާ ގުޅުންހުރި އިދާރާތަކުން ތަފާތު އޮޕަރޭޝަންތައް އަންނަނީ ހިންގަމުންނެވެ.
ގަވާއިދާ ހިލާފަށް އުޅޭ ބިދޭސީންނާ ދެކޮޅަށް ކުރިއަށްގެންދާ ޚާއްސަ އޮޕަރޭޝަންގެ ތެރެއިން މިހާތަނަށް 2،000 އަށްވުރެ ގިނަ ބިދޭސީން ވަނީ ޑީޕޯޓުކޮށްލައިފައެވެ.
ގަވާއިދާ ޚިލާފަށް އުޅޭ ބިދޭސީންގެ ރެޖިސްޓްރީއެއް ހަދައި، ގަވާއިދަށް ފައްތަން މަސައްކަތް ކުރުމާއި ގަވާއިދާ ޚިލާފަށް ބިދޭސީން ހިންގާ ވިޔަފާރިތައް ހުއްޓުވުމުގެ އިތުރުން ކުށްކުރާ ބިދޭސީން އަނބުރާ ގައުމަށް ފޮނުވުމަކީ އިމިގްރޭޝަނުން ޚާއްސަ އިސްކަމެއް ދީގެން ކުރަމުން އަންނަ ކަމެކެވެ.