މާލޭގެ ހީނާމާގެ ޕާކިން ސަރަހައްދުގައި މިއަދު އިމިގްރޭޝަނުން ޚާއްސަ އޮޕަރޭޝަނެއް ހިންގައި، ވިސާ ނެތި ރާއްޖޭގައި އުޅެމުންދާ 17 ބިދޭސީއަކު އެ ޚިދުމަތުގެ ބެލުމުގެ ދަށަށް ގެންގޮސްފިއެވެ.
އެ އިދާރާއިން ބުނީ ބިދޭސީންގެ ބޮޑު ކޮންޓްރޯލެއް އޮންނަ ކަމަށް އަބަދު ވެސް އާންމުންގެ ފަރާތުން ކަންބޮޑުވުން ލިބެމުން އަންނަ ހީނާމާގެ ޕާކިން ސަރަހައްދަށް އަމާޒުކޮށް، ޓާކްސްފޯހުން މިއަދު ރެއިޑު އޮޕަރޭޝަނެއް ކުރިޔަށް ގެންގޮސްފައިވާ ކަމަށެވެ.
މި އޮޕަރޭޝަނުގެ ތެރެއިން، އެ ސަރަހައްދަށް އެއްވެއުޅޭ ބިދޭސީންނާއި ބިދޭސީން އިސްވެ ތިބެ ހިންގަމުންދާ ފިހާރަ، ކެފޭ ފަދަ ތަންތަން ބަލައިފާސްކޮށްފައިވާ ކަމަށް އިމިގްރޭޝަނުން ބުންޏެވެ. އެ ތަންތަނުން ވިސާ ނެތި، ރާއްޖޭގައި ގަވާއިދަށް ޚިލާފަށް މަސައްކަތް ކުރަމުންދާ 17 ބިދޭސީއަކު ބެލުމުގެ ދަށަށް ގެނެވިފައިވާ ކަމަށް އިމިގްރޭޝަނުން ބުންޏެވެ.
ރާއްޖޭގައި ދިމާވެފައިވާ ބިދޭސީންގެ މައްސަލަ ހައްލު ކުރުމަށް މި ސަރުކާރުން ވަނީ ޚާއްސަ އިސްކަމެއް ދީގެން މަސައްކަތްތަކެއް ފަށައިފައެވެ. އެ މަސައްކަތުގެ ތެރެއިން އިމިގްރޭޝަނުން ދަނީ ރާއްޖޭގައި ގަވާއިދާ ޚިލާފަށް އުޅެމުންދާ ބިދޭސީން ހޯދައި އެ މީހުންނާމެދު ފިޔަވަޅު އަޅަމުންނެވެ. އަދި ރާއްޖޭގައި އުޅެމުންދާ ބިދޭސީންގެ ބަޔޯމެޓްރިކް ޑޭޓާ އެއްކުރުމުގެ މަސައްކަތް ފަށައި، އެ ކަމުގައި ވެސް ކުރިއެރުންތަކެއް ހޯދަމުން އެބަދެއެވެ.
ގަވައިދާ ޚިލާފަށް ރާއްޖޭގައި އުޅޭ އަދި ވިޔަފާރިކުރާ ބިދޭސީންގެ މައްސަލަ ހައްލުކުރުމަށް އިމިގްރޭޝަނުން ވަރަށް ގިނަ މަސައްކަތްތަކެއް ފާއިތުވި އަހަރު ވެސް ކޮށްފައިވެއެވެ. އެގޮތުން، ހުޅުމާލެއާއި މާލޭގައި މާސް އިންސްޕެކްޝަންތަކާއި، ރެއިޑް އޮޕަރޭޝަންތައް ހިންގާފައިވެއެވެ.
އިމިގްރޭޝަންގެ ކޮންޓްރޯލާ ޖެނެރަލް ޝައްމާން ވަހީދު މީގެ ކުރިން ވިދާޅުވި ގޮތުގައި ބިދޭސީންގެ މައްސަލަތައް ހައްލުކުރުމަށް ކުރިއަށް އޮތްތަނުގައި އަތޮޅުތެރެއަށް އޮޕަރޭޝަންތައް ފުޅާކުރާނެއެވެ. އަދި މިހާރު އެ މަސައްކަތްތައް ފަށާފައިވާކަން ވެސް ފާހަގަކުރެވެއެވެ.
ބިދޭސީންގެ މައްސަލަ ޙައްލުކުރުމަކީ ސަރުކާރުން ޚާއްސަ އިސްކަމެއް ދީގެން ކުރިއަށްގެންދާ މަސައްކަތެއް ކަމަށާއި އެ މަސައްކަތުގެ ދަށުން މާލޭގައި ހިންގާ އޮޕަރޭޝަންގެ އިތުރުން މީހުން ދިރިއުޅޭ އެހެން ރަށްރަށާއި ރިސޯޓުތަކާއި ސިނާއީ ރަށްތަކާއި ދަނޑުވެރިކަމަށް ދޫކޮށްފައިވާ ރަށްތަކުގައި ދިރިއުޅޭ ބިދޭސީންގެ މައުލޫމާތު އެއްކުރުމުގެ މަސައްކަތް ވެސް ކުރަމުންދާކަމަށް އިމިގްރޭޝަނުން ވަނީ ބުނެފައެވެ.