ހުސްވި 2024ވަނަ އަހަރުގެ ޑިސެންބަރު މަހު ދެ ލައްކައަށްވުރެ ގިނަ ފަތުރުވެރިން ރާއްޖެ އައިސްފައިވާ ކަމަށް އިމިގްރޭޝަނުން ބުނެފިއެވެ.
އިމިގްރޭޝަނުން މިއަދު އާންމުކުރި އަދަދުތަކުގައިވާ ގޮތުން، މިދިޔަ އަހަރު ޖުމްލަ ދެ މިލިއަނަށްވިރެ ގިނަ ފަތުރުވެރިން ރާއްޖެ އައިއިރު، ޑިސެންބަރުމަހު އެކަނި ވެސް 208،980 ފަތުރުވެރިން ރާއްޖެ އައެވެ. އެއީ 2023ވަނަ އަހަރުގެ ޑިސެންބަރުމަހާ އަޅައިބަލާއިރު، 14،289 ފަތުރުވެރިންގެ އިތުރުވުމެކެވެ.
އިމިގްރޭޝަނުން އާންމުކުރި ހިސާބުތަކުގައިވާ ގޮތުން، ޑިސެންބަރުގައި އެވަރެޖުކޮށް ދުވާލެއްގެ މައްޗަށް ރާއްޖެ އަންނަ ފަތުރުވެރިންގެ އަދަދުހުރީ 6،741 ގައެވެ. އެ މަހުގެ ތެރޭގައި އެއް ދުވަހެއްގެ މަތީން 9،440 ފަތުރުވެރިން ރާއްޖެ އައެވެ. އެންމެ މަދުން ފަތުރުވެރިން ރާއްޖެ އައި ދުވަހު ވެސް، އަދަދު ހުރީ 4،908 ގައެވެ. މިއީ 7.3 ޕަސެންޓުގެ ކުރިއެރުމެކެވެ.
ޑިސެންބަރުގެ ތެރޭގައި އެންމެ ގިނައިން ފަތުރުވެރިން ރާއްޖެ އައި ގައުމުތަކުގެ އެންމެ ކުރީގައި އުޅެނީ އިޓަލީއެވެ. އެ ގައުމުން 21،153 ފަތުރުވެރިން އައިއިރު، ދެވަނައަށް އެންމެ ގިނަ ފަތުރުވެރިން އެ މަހުގެ ތެރޭގައި ރާއްޖެ އައީ އިނގިރޭސިވިލާތުންނެވެ. އެ ގައުމުން 20،459 ފަތުރުވެރިން އައިސްފައިވެއެވެ.
ތިންވަނައަށް އެންމެ ގިނަ ފަތުރުވެރިން ރާއްޖެ އައީ ރަޝިޔާއިންނެވެ. އެ ގައުމުން އައިސްފައިވަނީ 20،303 ފަތުރުވެރިންނެވެ. މި ލިސްޓުގެ ހަތަރުވަނައިގައި އުޅޭ އިންޑިއާއިން 16،749 ފަތުރުވެރިން އައިއިރު، ފަސްވަނައިގައި އޮތް ޖަރުމަނުން 14،172 ފަތުރުވެރިން އައިސްފައިވެއެވެ.
މިދިޔަ އަހަރު ރާއްޖެ އައިސްފައިވަނީ ޖުމްލަ 2،046،579 ފަތުރުވެރިންނެވެ. އެއީ މިދިޔަ އަހަރަށް ސަރުކާރުން ކަނޑައެޅި އަމާޒަށްވުރެ 46،579 އިތުރު އަދަދެކެވެ.
ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމުގެ މަސައްކަތް ސަރުކާރުން އަންނަނީ ފުޅާ ދާއިރާއެއްގައި ކުރަމުންނެވެ. އަދި ފަތުރުވެރިން ރާއްޖެ އައިސް ހޭދަކުރާ ދުވަސް އިތުރުކުރުމަށް ޓަކައި ވެސް މަސައްކަތްތަކެއް އަންނަނީ ކުރަމުންނެވެ.