ސަލްމާން ޚާން ކުޅޭ ފިލްމަކަށް މަދުވެގެން 300 ކްރޯޑު ރުޕީސް (35 މިލިއަން ޑޮލަރު) ނުލިބޭނަމަ އެކަމާ ސަލްމާން ކަންބޮޑުވެ، ވަރަށް ބޮޑަށް މާޔޫސްވާ ކަމަށް ޑައިރެކްޓަރު ނިކިލް އަދުވާނީ ބުނެފިއެވެ.
ސަލްމާން ޚާނާ އެކު ގިނަ ފިލްމުތަކެއްގައި މަސައްކަތްކޮށްފައިވާ ޑައިރެކްޓަރު ބުނެފައިވާ ގޮތުގައި ފަހަކަށް އައިސް އެކްޓަރާ އެކު މަސައްކަތް ނުކުރަނީ ވެސް އެ ސަބަބާ ހެދިއެވެ. ފިލްމު "ސަލާމް-އޭ-އިޝްޤް"، "ކުޗް ކުޗް ހޯތާ ހޭ" އަދި "ހީރޯ"ފަދަ ފިލްމުތަކުގައި ނިކިލް ވަނީ ސަލްމާން ޚާނާ އެކު މަސައްކަތްކޮށްފައެވެ.
މި ފިލްމުތަކުގެ ތެރެއިން ބޮކްސް އޮފީހުގައި ބޮޑު ކާމިޔާބީއެއް ހޯދުނު ހަމައެކަނި ފިލްމަކީ ސަލްމާން ޚާން ކުޑަ ރޯލަކުން ފެނުނު "ކުޗް ކުޗް ހޯތާ ހޭ"އެވެ.
ފިލްމީ ޚަބަރުތައް ގެނެސްދޭ އިންޑިއަން އެކްސްޕްރެސްއަށް ދިން އިންޓަވިއުއެއްގައި ނިކިލް ބުނެފައިވަނީ ސަލްމާން ޚާނާ އެކު ފިލްމުތައް އުފެއްދުން މަޑުޖައްސާލަފައިވަނީ އިތުރަށް ހާސްވެ، ކަންބޮޑުވުމަށް ބޭނުންނުވާތީ ކަމަށެވެ. ފިލްމަކަށް އުއްމީދުކުރި ވަރަށް ވުރެ މަދުން އާމްދަނީ ލިބިއްޖެނަމަ އެކަމާ ސަލްމާން ވަރަށް ބޮޑަށް މާޔޫސްވާ ކަމަށާއި އެއީ ކޮނޑުގައި އެޅިފައިވާ ވަރަށް ބޮޑު ޒިންމާއެއްގެ ގޮތުގައި ދެކޭ ކަމަށް ނިކިލް ވަނީ ބުނެފައެވެ.
ސަލްމާން ޚާންގެ އެދުމުގެ މަތިން ނިކިލް ޑައިރެކްޓްކުރި ފިލްމު "ހީރޯ"ގެ ޕްރޮމޯޝަނަލް އިވެންޓެއްގެ މަންޒަރެއް--ފޮޓޯ/ޕިންކްވިލާ
މާޒީގެ ތަޖުރިބާތައް ބަލާއިރު ސަލްމާންގެ ފިލްމެއް ރިލީޒްކުރުމަށް ފަހު ފިލްމު ކާމިޔާބު ނުވެދާނެކަމުގެ ކަންބޮޑުވުންތަކާ ހެދި ޔުނިޓުގެ އެއްވެސް މީހަކަށް ހަމަ ނިދި ނުލިބޭ ކަމަށް އޭނާ ބުންޏެވެ. އެކަން އަލުން ތަޖުރިބާކުރަން ބޭނުންނުވާ ކަމަށާއި ރޭގަނޑުގެ ނިދި އަމާންކަމާ އެކު ލިބުމަށް މިހާރު އެދޭކަމަށް ނިކިލް ވަނީ ބުނެފައެވެ.
ނިކިލް ސިފަކުރާ ގޮތުގައި ސަލްމާނަކީ ފިލްމު އިންޑަސްޓްރީގެ ކޮންމެ މީހަކު ވެސް އެހީއަކަށް އެދުމުން އެހީތެރިވާ އެކްޓަރެއް ކަމަށާއި ނިކިލް ސަލްމާން ބޭނުންވަނީ އެފަދަ ދަނޑިވަޅުގައި ކަމަށް ވަނީ ބުނެފައެވެ. ނިކިލް އެހީއަކަށް އެދިއްޖެ ނަމަވެސް ފަސްނުޖެހި އެހީތެރިވާނެކަމުގެ ޔަގީންކަން އެބައޮތް ކަމަށާއި އެއީ އިންޑަސްޓްރީގެ ހުރިހާ މީހުންނަށް 'މަސީހާ'އެއް ކަމަށް ނިކިލް ވަނީ ބުނެފައެވެ.