އަންނަ މަހުގެ ހަތްވަނަ ދުވަހު އެމޭޒަމް ޕްރައިމްގައި ޕްރީމިއާ ކުރަން ތާވަލުކޮށްފައި އޮތް ވެބް ސީރީޒް "ސިޓަޑެލް: ހަނީ ބަނީ"ގެ މުޅީން އާ ޓްރެއިލާއެއް އެމޭޒަންއިން އާއްމުކޮށްފިއެވެ.
މި ވެބް ސީރީޒަކީ ހޮލީވުޑްގެ މަޝްހޫރު ދެ ޑައިރެކްޓަރުން ކަމަށްވާ އެންތަނީއާއި ޖޯ ރުސޯ މިދިޔަ އަހަރު ގެނެސްދިން ސީރީޒް "ސިޓަޑެލް" ސީރީޒާ ގުޅުވައިގެން އުފައްދާ އެ ސީރީޒްގެ އިންޑިއާގެ ވާޝަންއެކެވެ. ހޮލީވުޑްގެ ވެބް ސީރީޒްގެ ބަތަލާގެ ރޯލް ކުޅެފައިވަނީ ބޮލީވުޑް ބަތަލާ ޕްރިޔަންކާ ޗޯޕްޅާއެވެ.
ދެވަނަ ޓްރެއިލާ ދައްކާލިއިރު މި ސީރީޒްގެ ލީޑުން ކަމަށްވާ ވަރުން ދަވަންއާއި ސަމަންތާ ރުތު ޕްރަބޫގެ އިތުރުން ތަޖުރިބާކާރު އެކްޓަރު ކޭކޭ މެނަން އަދި ސާގިބު ސަލީމް ފެންނާނެކަން ވަނީ އިއުލާނުކޮށްފައެވެ.
ވަރުން ދަވަން އާއި ބަތަލާ ސަމަންތާ "ސިޓަޑެލް" ހަނީ ބަނީ"ގެ ޕްރޮމޯޝަނަލް ހަފްލާއެއްގައި--ފޮޓޯ/ޕީޕިންގްމޫން
މި ސީރީޒްގެ ފުރަތަމަ ޓްރެއިލާ މި އޮކްޓޯބަރު މަހުގެ ކުރީކޮޅު ރިލީޒްކުރިއިރު މާ ބޮޑު ސަސްޕެންސެއް ނެތް ނަމަވެސް ދެވަނަ ޓްރެއިލާއިން މާ ބޮޑަށް ވެސް އެކްޝަންއާއި ޑްރާމާ ފެންނާނެ ކަމަށް ރިޕޯޓުތައް ބުނެއެވެ.
މި ސީރީޒްގެ އިންޑިއާ ވާޝަންގެ ޑައިރެކްޓަރުންނަކީ އެމޭޒަންގެ ކާމިޔާބު ވެބް ސީރީޒް "ފެމިލީ މޭން" ގެނެސްދިން ކުޅަދާނަ ރާޖް އެންޑް ޑީކޭއެވެ.
ރާޖް އެންޑް ޑީކޭ އެމޭޒަން ޕްރައިމަށް ތައްޔާރުކޮށްދީފައިވާ ސީރީޒްތަކުގެ ތެރޭ "ފަރުޒީ" އަދި "ގަންސް އެންޑް ގުލާބު" ހިމެނެއެވެ.