އިންޑިއާގެ މަޝްހޫރު މޮޑެލް/ނެށުންތެރިޔާ މަލައިކާ އަރޯރާއާ އެކު ދިގު މުއްދަތަކަށް ލޯބީގެ ގުޅުމެއް ބޭއްވި ބޮލީވުޑްގެ އެކްޓަރު އަރުޖުން ކަޕޫރު ހުރީ ސިންގަލްކޮށް ކަމަށް އެންމެ ފަހުން އެއްބަސްވެއްޖެއެވެ.
ކުރިއަށް އޮތް ނޮވެމްބަރު މަހުގެ އެއްވަނަ ދުވަހު ރިލީޒްކުރާ ފިލްމު "ސިންގްހަމް އަގެއިން"ގެ ވިލެންގެ ރޯލް ކުޅޭ އެކްޓަރު މިކަމަށް އެއްބަސްވެފައިވަނީ މި ފިލްމުގެ ކާސްޓުންނާ އެކު ބައިވެރިވި ދިވާލީ ޕާޓީއެއްގެ ތެރެއިން ނޫސްވެރިއަކު ކުރި ސުވާލަށް ޖަވާބު ދެމުންނެވެ.
އަރުޖުންއާއި މަލައިކާގެ ދުވަސްވީ ގުޅުން ނިމުމަކަށް އައިކަމުގެ ޚަބަރުތަކެއް މީގެ ކުރިން ފެންމަތިވި ނަމަވެސް ދެ މީހުންގެ ފަރާތުން މިކަމާ ގުޅޭގޮތުން ރަސްމީކޮށް ވަކި އެއްޗެއް ބުނެފައެއް ނުވެއެވެ.
އަރުޖުން ކަޕޫރު މަލައިކާ އަރޯރާއާ އެކު--ފޮޓޯ/ފިލްމުފެއަ
ދާދި ފަހުން މަލައިކާގެ ބައްޕަ މަރުވުމާ ގުޅިގެން ވެސް އެ އާއިލާގެ މެންބަރުންނަށާއި މަލައިކާއަށް ހިތްވަރު ދިނުމަށް އެންމެ ގާތުގައި ހުރީ އަރުޖުން ކަޕޫރެވެ. އެހެންވެ، ގިނަ ބަޔަކު އުންމީދުކުރީ ދެ މީހުންގެ ގުޅުން ރަނގަޅުވެ، އަލުން ގުޅުނީ ކަމަށެވެ.
އެހެންނަމަވެސް، އަރުޖުން މި ވަނީ ރަސްމީކޮށް މި ވަގުތު ހަޔާތުގައި ޚާއްސަ އެއްވެސް މީހަކު ނެތްކަމަށް މީޑިއާގައި ބުނެފައެވެ. މިއީ ދެ މީހުންގެ ގުޅުމާ ގުޅޭގޮތުން އަރުޖުން ރަސްމީކޮށް ހާމަކަން ބޮޑު ގޮތެއްގައި ވާހަކަދެއްކި ފުރަތަމަ ފަހަރުކަން ވެސް ފާހަގަކޮށްލެވެއެވެ.
އަރުޖުންއާއި މަލައިކާގެ ގުޅުން ކެނޑުނުއިރު މީގެ ކުރިން އެކި ފަހަރު މަތިން ދެ މީހުންގެ ކައިވެނީގެ ޚަބަރުތައް ވެސް ދިޔައީ ދެކެވެމުންނެވެ. ޚާއްސަކޮށް މަލައިކާގެ އާއިލާގެ ފަރާތުން އަބަދު ވެސް އެ ކަމާ ކަންބޮޑުވާ ކަމަށް ވަނީ ބުނެފައެވެ.
މަލައިކާއާ ލޯބީގެ ގޮތުން ގުޅުމުގެ ކުރިން އަރުޖުން ވަނީ ބަތަލާ ސޮނާކްޝީ ސިންހާއާ އެކު ލޯބީގެ ގުޅުމެއް ބާއްވާފައި ކަމަށް ރިޕޯޓުތައް ބުނެއެވެ. ހަމައެއާ އެކު ސަލްމާން ޚާންގެ ކޮއްކޮ އަރުޕިތާ ޚާނާ އަރުޖުން ލޯބީގެ ގުޅުމެއް ބޭއްވިކަމުގެ އަޑުތަކެއް އެރިއެވެ.