ކާތިކް އާރްޔަން ލީޑް ރޯލް ކުޅެފައިވާ ސްޕޯޓްސް ބަޔޯގްރަފިކަލް ޑްރާމާ "ޗަންދޫ ޗެމްޕިއަން" އެމޭޒަން ޕްރައިމް ވީޑިއޯގައި ސްޓްރީމްކުރަން ފަށަފައިއެވެ.
މި އަހަރުގެ ޖޫން މަހު ސިނަމާތަކުގައި ރިލީޒްކުރި މި ފިލްމަކީ ކާމިޔާބު ގިނަ ފިލްމުތައް އުފައްދާފައިވާ ސާޖިދު ނަދިއަދުވާލާ ޕްރޮޑިއުސްކޮށް ކަބީރު ޚާން ޑައިރެކްޓްކުރި ފިލްމެކެވެ. މި ފިލްމަށް ބޮކްސް އޮފީހުގައި މާ ބޮޑު ތަރުހީބެއް ނުލިބުނު ނަމަވެސް ފިލްމުގައި ކާތިކް ކުޅުނު ރޯލް ފުރިހަމަކަން ގިނަ ބަޔަކު ވަނީ ފާހަގަކޮށްފައެވެ.
ބެލުންތެރިންގެ އިތުރުން ކްރިޓީކުން ވެސް ވަނީ ކާތިކު ފިލްމުގައި ކުޅެފައިވާ ރޯލަށް ތައްޔާރުވި ތައްޔާރުވުންތަކާ އެކު ފިލްމުގައި ދެއްކި ފުރިހަމަ އެކްޓިންއަށް ވަރަށް ބޮޑަށް ތައުރީފުކޮށްފައެވެ. ފިލްމު "ޗަންދޫ ޗެމްޕިއަން"އަކީ އިންޑިއާގެ ފުރަތަމަ ޕެރަލިމްޕިކް ގޯލްޑު މެޑަލިސްޓް އެތުލީޓު މުރްލީކަންތުގެ ހަޔާތުގެ މައްޗަށް ބިނާކޮށް އުފައްދާފައިވާ ފިލްމެކެވެ.
ކާތިކް ބަތަލާ ކިއާރާއާ އެކު ފިލްމު "ބޫލްބުލައްޔާ2"ގެ ޝޫޓިންގްތެރޭ--ފޮޓޯ/ފިލްމުފެއަ
ފިލްމުގައި ކާތިކު ދައްކުވައިދިން މުރްލީކަންތުގެ ރޯލަށް ތައްޔާރުވުމުގެ ގޮތުން އެކްޓަރު ވަނީ ވަރަށް ޚާއްސަ ތަމްރީނުތައް ފުރިހަމަކޮށްފައެވެ. ހަމައެއާ އެކު އެއް އަހަރު ދުވަސް ވަންދެން ކާތިކް ވަނީ ފިލްމަށް ތައްޔާރުވުމުގެ ގޮތުން ފޮނި ކާތަކެއްޗާ ދުރުހުލިވެފައެވެ.
ފިލްމު އެމޭޒަން ޕްރައިމްގައި ޕްރިމިއާކުރާކަން އިއުލާނުކުރަމުން ކާތިކު ބުނެފައިވަނީ ދިރިއުޅުމުގައި ކިތަންމެ ބޮޑު ގޮންޖެހުންތަކަކާ ކުރިމަތިވިޔަސް ފަސް ނުޖެހި އެ ކަންކަމާ ކުރިމަތިލުމުގެ ނަތީޖާ ފޮނިވާނެކަން މި ފިލްމުން ވަރަށް ރަނގަޅަށް ސާބިތުކޮށްދޭ ކަމަށެވެ.
ބެލުންތެރިންނަށް ކާތިކް އެންމެ އަވަހަށް ދެން ފެންނާނީ މި އަހަރުގެ ނޮވެމްބަރު މަހު ގެނެސްދޭ ހޮރޯ ކޮމެޑީ ފިލްމު "ބޫލް ބުލައްޔާ3"އިންނެވެ.