މެދުކެނޑިފައިވާ އިސްރާއީލުން ފަލަސްތީނުގެ ޣައްޒާގައި ކުރަމުންދާ ހަނގުރާމަ ހުއްޓައިލުމުގެ މަޝްވަރާތައް އަންނަ ހަފްތާގައި ފެށުމަށް އެއްބަސްވެފައިވާ ކަމަށް އިސްރާއީލުގެ ބޮޑު ވަޒީރު ނަތަންޔާހޫގެ އޮފީހުން ބުނެފިއެވެ.
އިސްރާއީލުން އެކަން ހާމަކުރީ، މެދުއިރުމަތީގައި ހަނގުރާމަ ފެތުރުމަށް އިސްރާއީލުން ބޭނުންވާ ކަމަށް އީރާނުން ބުނުމާއި، ޣައްޒާ ހަނގުރާމަ ދިގު ދަންމަން ނަތަންޔާހޫ މަސައްކަތްކުރައްވާ ކަމަށް ޣައްޒާގެ ވެރިކަންކުރާ ހަމާސް ޖަމާއަތާއި އިސްރާއީލަށް ފާޑުކިޔާ ބައެއް ފަރާތްތަކުން ތަކުރާރުކޮށް ބުނަމުންދާ ދަނޑިވަޅެއްގައެވެ.
އެމެރިކާ، ގަތަރު އަދި މިސްރު މެދުވެރިން ހަނގުރާމަ ހުއްޓައިލުމުގެ އާ އެއްބަސްވުމެއް ހޯދުމަށް މަސައްކަތް ކުރަމުން އަންނަތާ މަސްތަކެއް ވެއްޖެއެވެ.
ބުރާސްފަތި ދުވަހު ތިން ގައުމުގެ ލީޑަރުން ނެރުނު ޖޮއިންޓް ބަޔާނެއްގައި ބުނީ މި މަހުގެ 15 ވަނަ ދުވަހު ގަތަރުގެ ވެރިރަށް ދޯހާ ނުވަތަ ޤާހިރާގައި ފަށާ މަޝްވަރާތަކަށް ދައުވަތުދޭ ކަމަށެވެ.
އިސްރާއީލުގެ އަސްކަރިއްޔާއިން ބުރާސްފަތި ދުވަހު ބުނީ އެ މީހުން މިހާރު ހަމަލާދެމުން އަންނަނީ އަނެއްކާ ވެސް ޣައްޒާގެ ދެކުނުގައި އޮންނަ ޚާން ޔޫނިސްއަށް ކަމަށެވެ، އިސްރާއީލު ސިފައިން ވަނީ އޭޕްރީލް މަހު ޚާން ޔޫނިސްއަށް ހަމަލާ ދިނުން ހުއްޓައިލައި އެ ސަރަހައްދުން ފައިބައިފައެވެ.
ޚާން ޔޫނިސްގެ ބައެއް ހިސާބުތައް ހުސްކުރުމަށް އިސްރާއީލުން އަސްކަރިއްޔާއިން ވަނީ އަންގައިފައެވެ. އޭއެފްޕީން އާންމުކޮށްފައިވާ ފޮޓޯތަކުން ފެންނަ ގޮތުގައި އެ ސަރަހައްދު ހުސްކުރަން އެންގުމުން އާންމުގެ އެތައް ބަޔަކު ވަނީ ހަލާކުވެ ސުންނާފަތިވެފައިވާ މަގުތަކުގައި ފައިމަގުގައާއި، އަސް ގާޑިއަލުގައި އެ ސަރައްހަދުން ނުކުމެފައެވެ.
އޮކްޓޫބަރު ހަތް ވަނަ ދުވަހު ހަނގުރާމަ ފެށި ފަހުން ހަނގުރާމަ މެދުކަނޑައިލައިފައި ވަނީ އެންމެ ފަހަރަކުއެވެ. އެއީ މިދިޔަ ނޮވެމްބަރު މަހު ހަފްތާއެއްގެ މުއްދަތަށެވެ. އެ މުއްދަތުގައި ދެ ފަރާތުގައިތިބި ގައިދީންނާއި އަސީރުން ވަނީ މިނިވަންކޮށްފައެވެ.