މިއަދު ރާއްޖޭގައި ފުރަތަމަ ފަހަރަށް އަންހެނަކު ލިޔުއްވި ޚުތުބާއެއް އިއްވައިފިއެވެ.
މިކަމާ ގުޅިގެން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ، މިއަދުގެ ޚުތުބާ ލިޔުއްވީ ހައްވާ ލަތީފް ކަމަށެވެ. އަދި މިއީ ރާއްޖޭގައި އަންހެން އިލްމުވެރިއެއް ޚުތުބާ ލިޔުއްވި ފުރަތަމަ ފަހަރުކަން ފާހަގަކުރައްވައި ޝަހީމް ވިދާޅުވީ، މިއަދު އަލަށް އިސްލާމީ މަރުކަޒުގެ ޓީވީތަކުގައި ޚުތުބާގެ ތަރުޖަމާ ވަގުތުން އަރުވަން ފަށައިފައިވާ ކަމަށެވެ.
އަންނަ ހަފުތާގައި ހުރިހާ ޓީވީތަކަކުން ވެސް ޚުތުބާ ދައްކާނީ ލައިވް ތަރުޖަމާއާ އެކުކަމަށް ޝަހީމް ވިދާޅުވިއެވެ.
މިއަދުގެ ޚުތުބާ އަންހެނަކު ލިޔުއްވުމާ ގުޅިގެން ރާއްޖޭގެ މަޝްހޫރު ލިޔުންތެރިޔާ މުހައްމަދު ސަލީމް (ހޯރަފުށީ ސަލީމް) ފޭސްބުކްގައި ކުރެއްވި ޕޯސްޓެއްގައި ވަނީ، ހައްވައަކީ އަރަބިއްޔާގައި އުޅުއްވި ދުވަސްވަރުން ފެށިގެން ރަހުމަތްތެރިއެއް ކަމަށެވެ.
މި ޚުތުބާ ލިޔުއްވީ ހައްވަކަން އެނގުމުން ހައްވައަށް ގުޅައި މަރުހަބާ ދެންނެވިކަމަށް ސަލީމް ވިދާޅުވިއެވެ. އަދި މި ޚުތުބާ ލިޔެވުނީ ޝަހީމް ދެއްވި ހިތްވަރުންކަމަށް ހައްވަ ވިދާޅުވި ކަމަށް ވެސް އެ ޕޯސްޓުގައި ވެއެވެ.
މި ޕޯސްޓުގައި ސަލީމް ވަނީ، ޝަހީމަށް ޝުކުރު އަދާކުރައްވާފައެވެ. އަދި މިނިސްޓަރު ކުރެއްވީ "ސަތޭކައިގެ ކަމެއް"ގެ ގޮތުގައި ސިފަކުރައްވައި ސަލީމް ވިދާޅުވީ، ބޭނުމީ މިފަދަ އަންހެން ޢާލިމުންނަށް ހިތްވަރާއި ފުރުސަތު ދެއްވާނެ ބޭފުޅެއް ކަމަށެވެ.
މިއަދުގެ ޚުތުބާގެ މައުޟޫއަކީ އާއިލީ ގުޅުން ދެމެހެއްޓުމެވެ. އާއިލީ ގުޅުން ދަމަހައްޓާނެ ގޮތްތަކާއި އާއިލާގެ މުހިންމުކަމުގެ މައްޗަށް މި ޚުތުބާގައި ވަނީ އަލި އަޅުވާލައްވައިފައެވެ.
ހައްވާ ލަތީފަކީ އިސްލާމިކް މިނިސްޓްރީގައި ޑެޕިއުޓީ މިނިސްޓަރުކަން ވެސް ކުރައްވާ ބޭފުޅެކެވެ.