އުމްރާއަށް މީހުން ގެންދިއުމަށް އިސްލާމިކް މިނިސްޓްރީއިން ދީފައިވާ ރަސްމީ ލައިސަންގެ ދައްކައިގެން އުމްރާއަށް ފުރަން ކަމަށް ހަދައި އެމްއެމްއޭއިން ޑޮލަރު ނަގައި، އުމްރާއަށް ނުދިޔަ ކުންފުންޏެއް ފާހަގަ ކުރެވިފައިވާތީވެ އެކަން އިތުރަށް ބަލަން ފަށާފައިވާ ކަމަށް, އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެއެވެ.
ވަކި ކުންފުންޏެއްގެ ނަން ހާމަނުކޮށް, މިނިސްޓަރު ޝަހީމް ވިދާޅުވީ, އެ ކުންފުނިން އުމްރާއަށް މީހުން ގެންދިއުމުގެ އުޞޫލާ ޚިލާފުވިކަން ސާބިތު ވެއްޖެ ނަމަ, އެ ކުންފުނި 30,000 ރުފިޔާއިން ޖޫރިމަނާކޮށް ހުއްދަ ހިފަހައްޓައި މި މައްސަލަ ތަޙްޤީޤުކުރަން ޕޮލިހަށް ފޮނުވާނެ ކަމަށެވެ.
އެ މައްސަލަ ފުލުހުންނަށް ހުށަހަޅަނީ, ޑޮލަރު ދޫކުރާނީ ފުރުމުގެ ޓިކެޓާއި ޑޮކިއުމެންޓްސް ހުށަހެޅުމުންކަމުގައި ވެފައި ފޭކު ޑޮކިއުމެންޓް ހުށަހެޅިކަމަށް ތުހުމަތުކުރެވޭތީ ކަމަށް މިނިސްޓަރު ވިދާޅުވިއެވެ.
މީގެ އިތުރުން ޝަހީމް ވިދާޅުވީ އުމްރާއަށް މީހުން ގެންދިއުމުގެ އުޞޫލާ ޚިލާފުވެފައިވާތީ އެ ކަންކަމުގެ ކުޑަބޮޑު މިނަށް ބަލައި، 19 ކުންފުންޏެއް ފަސް ހާސް ރުފިޔާއިން ޖޫރިމަނާކުރި ކަމަށެވެ.
އުމްރާއަށް މީހުން ގެންދިއުމުގައި އަމަލުކުރާން ގެޒެޓް ކޮށްފައިވާ އުޞޫލަށް އަމަލު ނުކުރާ ހުރިހައި ކުންފުނިތަކަށް ފިޔަވަޅު އަޅާނެކަމަށްވެސް ޝަހީމް ވަނީ ވިދާޅުވެފައެވެ.
ޝަހީމް އެފަދައިން ވިދާޅުވެފައިވާއިރު ރާއްޖެއިން އުމްރާގެ އަޅުކަމަށް މީހުން ފޮނުވާ ބައެއް ކުންފުނިތަކުގެ މައްސަލަތައް ވަނީ މި ފަހުން ފެންމަތިވެފައެވެ.
އެގޮތުން މިދިޔަ ޑިސެމްބަރު މަހު, އަލް ހިޖްރަ ޢުމްރާ ގްރޫޕުގެ ހަވާލުގައި އުމްރާއަށް ދިޔަ ދިވެހީންތަކަކަށް ރާއްޖެ ނާދެވި ސައުދީ އަރަބިއްޔާގައިވަނީ ތާށިވެފައެވެ. އެ މީހުން އަނބުރާ ރާއްޖެ ގެނައީ ހައްޖު ކޯޕަރޭޝަންގެ ހަވާލުގައެވެ.