އިސްރާއީލުން ޣައްޒާއަށް އިއްޔެ ދިން ހަމަލާތަކުގައި 40 މީހުން ޝަހީދުކޮށްލައިފިއެވެ.
އިސްރާއީލުން ދިން ވައިގެ ހަމަލާތަކުގައި މެދުތެރޭގެ ޣައްޒާގެ އަލް ބުރެއިޖް ކޭމްޕުގައި ހުރި ގެތަކަކަށް ހަމަލާ އަމާޒުވެ، 15 މީހުން ޝަހީދުވެފައިވާއިރު، ކައިރީގައި އޮންނަ އަލް ނޫސެއިރަތު ކޭމްޕަށް އަމާޒުވި ހަމަލާގައި ހަތަރު މީހަކު ޝަހީދުވެފައިވާ ކަމަށް ފަލަސްތީނުގެ ކަމާބެހޭ އިދާރާތަކުން ހާމަކޮށްފައިވެއެވެ.
ނުސައިރަތާއި ބުރެއިޖް ކޭމްޕަކީ ގެދޮރު ގެއްލިފައިވާ ގިނަ ބަޔަކު ދިރިއުޅޭ ކޭމްޕްތަކެކެވެ. އިސްރާއީލުން ބުނާ ގޮތުގައި އެތަންތަނަކީ ޣައްޒާގެ ވެރިކަންކުރާ ހަމާސް ޖަމާއަތުގެ ހަނގުރާމަވެރިން ހަނގުރާމައަށް ބޭނުންކުރާ ތަންތަނެވެ.
އިސްރާއީލުގެ މަތިންދާބޯޓުތަކުން ވަނީ ޣައްޒާ ސިޓީގެ އުތުރުގައި ހުންނަ ގެއަކަށްވެސް ބޮން އަޅައި ފަސް މީހަކު ޝަހީދުކޮށްލައިފައެވެ. ޣައްޒާގެ ދެކުނުގައި އޮންނަ ޚާން ޔޫނިސް ސަރަހައްދަށް އިތުރު ވައިގެ ހަމަލާއެއް ދިން ކަމަށް ފަލަސްތީނުގެ އިދާރާތަކުން ބުނެއެވެ.
އޭގެއިތުރުން ހައްދުފަހަނައެޅި އިސްރާއީލުގެ އަސްކަރިއްޔާއިން ވަނީ ޣައްޒާ ސިޓީގެ އިރުމަތީގައި ހުރި ދެ ސްކޫލަކަށްވެސް އިއްޔެގެ ވަގުތެއްގައި ބޮން އަޅައި ފަލަސްތީނުގެ 15 މީހަކު ޝަހީދުކޮށްލައިފައެވެ. އެ ހަމަލާގައި 30 މީހަކު ޒަހަމްވެފައިވާ ކަމަށް އެ ސަރަހައްދުގެ ސިވިލް އިމަޖެންސީ ސާވިސްއިން ނެރުނު ބަޔާނެއްގައި ބުނެފައިވެއެވެ.
އިސްރާއީލުން ހަމަލާ ދީފައި ވަނީ ޣައްޒާ ސިޓީގެ ތޫފާ ސަރަހައްދުގައި ހުންނަ އަބްދުލްފައްތާހު ހަމޫދާ އާއި އަލްޒަހްރާ ސްކޫލަށެވެ. އަސްކަރިއްޔާއިން ބުނާ ގޮތުގައި އެ ދެ ސްކޫލަކީ ހަމާސްގެ ހަނގުރާމަވެރިން ހަރަކާތްތެރިވާ ދެ ސްކޫލެވެ.
އަދި ހަމާސް އިން އާންމުންނާއި އާންމުންގެ މުދާތައް އަސްކަރީ ބޭނުމަކަށް ބޭނުން ކުރާ ކަމަށް އިސްރާއީލުން ތުހުމަތުކުރެއެވެ. ނަމަވެސް ހަމާސްއިން އެކަން ދޮގުކުރެއެވެ.
މިދިޔަ އަހަރުގެ އޮކްޓޫބަރު މަހުގެ ހަތް ވަނަ ދުވަހު އިސްރާއީލުން ޣައްޒާއަށް ދޭ ހަމަލާތައް ވަރުގަދަކުރި ފަހުން މިހާތަނަށް 39،699 މީހުން ވަނީ ޝަހީދުކޮށްލައިފައެވެ. ހަމަލާތަކުގައި ޒަޚަމްވި މީހުންގެ އަދަދު ވަނީ 91،722 އަށް އުފުލިފައެވެ.