ޣައްޒާގެ އުތުރުގައި ޚިދުމަތް ދެވޭ ގޮތަށް ހުރި ހަމައެކަނި ހޮސްޕިޓަލް، ކަމަލް އަދްވާން ހޮސްޕިޓަލުން މީހުން ހުސްކުރުމަށް އިސްރާއީލުން އަންގައި، އެ ހޮސްޕިޓަލް އަންދާލާއިފިއެވެ.
އެ ހޮސްޕިޓަލުން މީހުން ހުސްކުރި ކަމަށް އިސްރާއީލުން ބުނި ނަމަވެސް އެ ހޮސްޕިޓަލުގައި ތިބި 75 ބަލިމީހުންނާއި 180 މުވައްޒަފުންގެ ތެރެއިން 25 ބަލިމީހުންނާއި 60 ސިއްޚި ޚިދުމަތްތެރިން އަލިފާން ރޯކޮށްލިއިރު ހޮސްޕިޓަލުގައި ތިބި ކަމަށް ޣައްޒާގެ ސިއްހަތާބެހޭ ވުޒާރާއިން ބުނެއެވެ. ހޮސްޕިޓަލުގެ މުވައްޒަފުންނާ ގުޅުން ކެނޑިފައިވާ ކަމަށްވެސް އެ ވުޒާރާއިން ވަނީ ބުނެފައެވެ.
އަލިފާން ރޯކޮށްލާފައިވާ ތަންތަނުގެ ތެރޭގައި ލެބް އަދި ސާޖަރީ ޑިޕާޓްމަންޓް ހިމެނެއެވެ.
ކަމަލް އަދުވާން ހޮސްޕިޓަލަށް ފާއިތުވި ތިން މަސް ދުވަހުގެ ތެރޭގައި އެތައް ފަހަރަކު އިސްރާއީލުން ވަނީ ހަމަލާދީފައެވެ. ފަލަސްތީނުގެ ސިއްހަތާބެހޭ ވުޒާރާއިން ބުނީ މީގެ އެއްދުވަސް ކުރިން ހޮސްޕިޓަލަށް ދިން ހަމަލާއެއްގައި ފަސް ސިއްހީ ޚިދުމަތްތެރިން ޝަހީދުކޮށްލާފައިވާ ކަމަށެވެ.
އެ ވުޒާރާއިން ބުނީ ހޮސްޕިޓަލްގައި ތިބި މީހުން ގަދަކަމުން ނެރެ، ހޮސްޕިޓަލްގެ ގޯތި ތެރޭގައި ބޭތިއްބުމަށްފަހު، އެމީހުން ލައިގެންތިބި އަންނައުނު ބޭލުމަށް އިސްރާއީލު ސިފައިން އަމުރުކުރި ކަމަށެވެ. އަދި ބައެއް ބަލި މީހުން އެ ސަރަހައްދުގައި ހުރި އިންޑޮނޭޝިއާ ހޮސްޕިޓަލަށް ގެންދިޔައިރު، އެހެން މީހުން ގެންދިޔަ ތަނެއް ނޭނގޭ ކަމަށްވެސް ސިއްހަތާބެހޭ ވުޒާރާއިން ބުނެފައިވެއެވެ.
އިސްރާއީލުގެ އެ އަމާލާ ގުޅިގެން ދުނިޔޭގެ ސިއްހަތު ޖަމިއްޔާއިން ބުނީ ޣައްޒާގެ ސިއްހީ ނިޒާމު ފުނޑުފުނޑުކޮށްލުމަކީ ސިއްހީ ފަރުވާއަށް ބޭނުންވާ ފަލަސްތީނުގެ ދިހަހާސް މީހުންނަށް މަރުގެ ހުކުމް އިއްވުން ކަމުގައެވެ. އަދި އެ ބިރުވެރިކަން ނިމުމަކަށް ގެނެސް ސިއްހީ ނިޒާމު ރައްކާތެރިކޮށް، ހަނގުރާމަ ހުއްޓާލަން ޖެހޭ ކަމަށެވެ.
އިސްރާއީލުގެ އަސްކަރިއްޔާއިން ބުނާ ގޮތުގައި އެމީހުން އެ ސަރަހައްދުގައި އަސްކަރީ އޮޕަރޭޝަން ހިންގަނީ ފަލަސްތީނުގެ މިނިވަން ކަމަށް މަސައްކަތްކުރާ ހަމާސް ޖަމާއަތުގެ ހަނގުރާމަވެރިންނާ ދެކޮޅަށެވެ. އެގޮތުން ކަމާލް އަދުވާން ހޮސްޕިޓަލްގެ ތެރޭގައި ހަމާސްގެ ހަނގުރާމަވެރިން ހަރަކާތްތެރިވާ ކަމަށް އިސްރާއީލުން ތަކުރާރުކޮށް ބުނި ނަމަވެސް އެކަމުގެ އެއްވެސް ހެއްކެއް ފޯރުކޮށްދީފައެއް ނުވެއެވެ. ހޮސްޕިޓަލުގެ އޮފިޝަލުން ވަނީ އެކަން ދޮގުކޮށްފައެވެ.
މިދިޔަ އަހަރު އޮކްޓޫބަރު ހަތް ވަނަ ދުވަހުން ފެށިގެން އިސްރާއީލުން ޣައްޒާއާ ދެކޮޅަށް ކުރާ ހަނގުރާމައިގައި މިހާތަނަށް ގާތްގަޑަކަށް 45،436 ފަލަސްތީނު މީހުން ވަނީ ޝަހީދުކޮށްލާފައެވެ. ހަމަލާތަކުގައި ޒަޚަމްވި މީހުންގެ އަދަދު ވަނީ 108،038 އަށް އުފުލިފައެވެ.