ޖަޕާނަށް ބާރުގަދަ ބިންހެލުމެއް އައިސް، ސުނާމީގެ އިންޒާރެއް

ޖަޕާނުގެ ދެކުނުގެ އައްސޭރިފަށަށް އައި ބާރުގަދަ ބިންހެލުމަކާ ގުޅިގެން ސުނާމީ އަރައިފާނެކަމުގެ އިންޒާރެއް ނެރެފިއެވެ.

ޖަޕާން މީޓިއޮރޮލޮޖިކަލް އޭޖެންސީން ބުނީ, 6.9 މެގްނިޓިއުޑުގެ ބިންހެލުން އައީ އެ ގައުމުގެ ދެކުނުގައި އޮންނަ ކިޔޫޝޫ ކައިރިއަށް، 30 ކިލޯމީޓަރު އަޑިއަށް ކަމަށެވެ. އެކަމަކު، ފަހުން އެމެރިކާގެ ޖިއޮލޮޖިކަލް ސާވޭއިންވަނީ ބިންހެލުމުގެ ބާރުމިން 7.1 އަށް އަރައި ކަމަށް ބުނެފައެވެ.

އެ އޭޖެންސީން ސުނާމީއެއް އަރައިފާނެކަމުގެ އިންޒާރު ދީފައިވަނީ އެއް މީޓަރާ ގާތްކުރާވަރުގެ ރާޅު ކިޔޫޝޫއާއި އެ ރަށް ކައިރީ އޮންނަ ޝިކޯކޫއަށް އަރައިފާނެ ކަމަށް ލަފާކޮށެވެ.

އެ ކަމާ ގުޅޭ އިތުރު ތަފުސީލެއް އެ އޭޖެންސީން ދީފައިނުވެއެވެ.

ޖަޕާންގެ އެންއެޗްކޭ ޕަބްލިކް ޓެލެވިޝަންއިން ވަނީ، ބިންހެލުން އައި ސަރަހައްދާ ކައިރީ އޮންނަ މިޔަޒާކީ އެއާޕޯޓުގެ ކުޑަދޮރުތަކަށް ގެއްލުންތަކެއްވެފައިވާ ކަމަށް ރިޕޯޓުކޮށްފައެވެ.

އެ ގައުމުގެ ޗީފް ކެބިނެޓް ސެކްރެޓަރީ ޔޮޝިމާ ހަޔާޝީ ވަނީ، އެއްވެސް މީހަކަށް އަނިޔާވެ ގެއްލުމެއް ލިބިފައިވޭތޯ ސަރުކާރުން ބަލަމުން އަންނަ ކަމަށް ވިދާޅުވެފައެވެ.

ޖަޕާން އޮންނަނީ، ޕެސިފިކްގެ 'ރިންގް އޮފް ފަޔާ'ގެ ނަން ދީފައިވާ ސަރަހައްދުގައެވެ. އެއީ މުޅި ދުނިޔެއިން ވެސް އެންމެ ގިނައިން ބިންހެލުންތައް އަންނަ ސަރަހައްދެވެ.

އެ ގައުމަށް މި އަހަރު އެންމެ ބޮޑު ބިންހެލުން އައީ އުތުރުގައި އޮންނަ ނޯޓޯއަށް މިދިޔަ ޖެނުއަރީ މަހުގެ އެކެއްގައެވެ. މެގްނިޓިއުޑް 7.6ގެ އެ ބިންހެލުމާ ގުޅިގެން 241 މީހަކު މަރުވިއެވެ.